1 Korin 16 - Basef Buꞌwami Godi

Otamba magiambama amam nematawa Godi

¹ Dei' ae' anom basefa otamba ipe' pa'i pekolasoma peso' esis amam nematawa Godi. Ae' ali' ihi'ambas eaf sonda' maol anama ma esis Kristen Galesiaisi sandakolas deindei' ea' dei' a'i ipe' penda'am na'ama etin.

² Sande nimeguf hiami ipe' hipei atona etin ukup mi'i otamba pefa'ama wik nali'i ea' pewaloga otamba amama pembe'am dende' ma ipe' pefa'am mo'oh dei pimafiam ifagw ipe'imi. Ama anona nemaf ipe' ina penda' maol lu'unai pegolopa otamba, owa'.

³ Anona nemaf ae' etagamepa, ipe' pendandepa anom amama mofa' otamba amama mofe' Jerusalem. Ama ae' i'ipama basef amoma mofa'am esapa'am mefe'.

⁴ I'i andeande'ma efe' wapoti', amam mofe' molome.

Pol na'i nefe' niti esis Korin

⁵ Anona nemaf ae' efo'o ili' ewala etap hiagoma Masedonia, ea' efo'o etagamepa. Dei' main, ae' okom na'i ata' ili' ewala etap hiagoma Masedonia efe'.

⁶ Ae' okom na'i ata' epe anom nimeguf elomepa. Ae' ina egawa, epe elomepa nimeguf ma'um nogota naoh mohafel lu'um ea' efe' maina wambel, ipe' pigiambame pimafi ma amamaga, pitumi pehapone eaf.

⁷ Ipe' pegawa ae' andaiwa'ma efo'o itilipa nogota bandana, owa'. I'i Dembinai ni'iam na'ama, a'i epe anom nimeguf elomepa.

⁸ Ea' ae' a'i epe na'ae Efesus efe' etagama nemaf anama Pentikos.

⁹ Dei' main, God nausi'ame eaf nagal alihina ma enda' maol bu'unai eloma amam nematawa hiesi samboma opalef sembale'efa God endilisi. Ea' hiesi sandaiwa'ma sonda' maol anama.

¹⁰ I'i Timoti nofo'o notagamaepa, ipe' pimafiana andeande' ma anan nope opaf bo'ona la'afena ipe'. Dei' main, anan nape nanda' maol Dembinai si'i ae' ape anda'ana.

¹¹ Na'ama enin epen okom ni'i Timoti falafunai nese'ana alafuga, na'ama owa'. Ipe' penda' opaf ananinai nope awanena pese'ana amamaga pigiambamana pitumana pehaponana eaf ma opaf ananinai bo'ona nifi'mai ae'. Ae' epe ehafana noloma enis alupusi.

¹² Basef sahalomapa ape'inai Apolos mape na'ama. Nimeguf hiami a'ipana a'i anan ata' nolomago anom alupumi ata' mofo'o mitiago ipe', ea' anan nandaiwa' endilisi ma nofo'o dei'. Nambimb anan niti Dembinai nonda' eaf, anan nofo'o.

Basef akutaimi Pol na'iami

¹³ Ipe' pindumafuma andeande' pitu la'ifipa pembale'efa Krais. Ipe' ina umbamehepa, owa'. Pitu la'ifipa.

¹⁴ Amamaga hiami ipe' penda'ami, ipe' ukup mimila God noloma epes hiesi.

¹⁵ Ipe' pegawa wambota Stefanasi sali' sataga Kristen sali'ma esis Grik hiesi. Ea' esis ukup ma'ima'i endilisi la'ela'efa sanda' maol sagiambama epes Godi. Alupipei, ae' a'ipipa basef la'ifimi

¹⁶ pepe owina epes isima soloma emi egafis sandao'oma sanda' maol anama.

¹⁷ Dei' ae' endanifel ma Stefanas naloma Fortunatus maloma Akaikus amam mafi'mai ae'. Dei' main, ipe' ina nambimb la'ifipama pifi'i na'ae, owa'. Amam dei' migiambame maho'ofepa mafi'mai ae'.

¹⁸ Amam manda' opaf ae'anai nape bo'ona magiambame ataga la'ifiwi ea' magiambama ipe' wapoti'. Ea' andeande'ma ipe' pefela agof amam na'amaimi.

¹⁹ Ea' amam nematawa Godi sape deindei' etap anama hiagoma Esia sanda'mepago nemaf bu'unai. Akwila naloma Prisila saloma esis amam nematawa Godi sandakolas etifigin ipat asasinai, esis wapoti' sanda'mepago nemaf bu'unai endilisi ma agel Dembinai.

²⁰ Alupusi hiesi sape na'ae sanda'mepago nemaf bu'unai ipe'. Waf amam nematawa Godi, ipe' hipei atona etin pese'ama lagof etin pelomago sahin owan ipe'isi.

²¹ Dei' ae' Pol ahapila pen lagel ae'anai atona anda'mepago basef amama bandami atom. Ae' anda'mepago nemaf bu'unai ipe'.

²² I'i emi egafis sendaiwa'ma soso' opalefa esis Dembinai, okom ae'anai a'i anona nemaf God nohambombagago epes isima hegililas. Dembinai ape'inai, ae' okom nohafel endilisi a'i ine' fi'i.

²³ Ae' a'i okom Dembinai Jisasi nainaila ipe' nigiambamepa na'a nope nolomago ipe' nonda'epa petaga la'ifipa.

²⁴ Ae' a'i okom lu'unai ae'anai nainaila ipe'i nefe'mago ipe' hipei palome mape la'ifipa paloma Krais Jisas.