1 Korin 15 - Basef Buꞌwami Godi

Krais naga' ea' notanima nohafel wapoti'

¹ Ipe' alupipei, dei' ae' a'i efela ukup ipe'imi wapoti' ma basef amama bu'wami Godi ali' a'ipipami. Ipe' pefa' basef amama atom dei' manda'epa pembale'ef paitu la'ifipa.

² Ae' a'ipipa basef amama bu'wami. I'i ipe' pembale'am andeande', God nofa'epa pitanimani. I'i owa', pembale'am ina pailam.

³ Basef ali' ai'ipami, amama ae' fowa' ali' efa'ami. Amama na'ama. Krais naga'ma nakwaha awami ape' manda'ami, si'i Baibel fowa' na'iam.

⁴ Ea' esis sofa'ana salana hi'agif. Ama nimeguf biam mafe' ea' nafe'ma wanomi, God nafelona wapoti' si'i Baibel na'iam.

⁵ Ea' nali' natagama Pita ea' nagi' natagama alupumi aninimi 12-peleim.

⁶ Ea' nataga nandawalapa esis amam nematawa Kristen hiesi satolona, isima alupusi saila anan hiesi endilisi sikila' 500-peleis. Dei' anda' basef amama mafe'mago ipe', a'i alupusi isima hiesi dei' enis sape, enis saga' ea'.

⁷ Ea' natagama Jems natolona. Ea' natagama amam aposel hiami matolona.

⁸ Ea', ae' agi' endilisi atolona wapoti', natagama ae' si'i awani mama'wan kolan awen.

⁹ Dei' main, ae' si'i so'uso'win falafuwei la'afena amam aposel. Ae' ina dei' bo'awe ma epes sofale si'i ae' aposel, owa'. Dei' main, anda' maol ahambombaga amam nematawa Godi.

¹⁰ Ea' God atona okom nainaili nigiabame na'a nanda'e ape andeande'. Ea' dei' ae' ape. Anan nigiambame na'a, ae' anda' maol ape. Nanda'e la'ifiwi anda' maol Ananinai ikila' anom aposel. Ea' ina ae' atowe anda' maol, owa'. God nagiambame na'a, amama atom dei' ape anda' maol anama la'ela'ef.

¹¹ Ea' basef amama, ae' anda'ana o amam aposel manda'ana, basef amama bu'wami atom. Afa' hiafai wawalipipam ea' amama atom ipe' pame'am pembale'efam.

Anona nemaf epes saga'i sotanima sohafel wapoti'

¹² Afa' la'ela'ef wawalapa basefa Krais naga' ma God nafelona nohafel wapoti'. Dei' maina ipe' enipa pa'i basef amama pa'i, “Epes saga'i ina anona nemaf sotanima sohafel wapoti', owa'.”?

¹³ Ipe' enipa pa'i endilisi esis saga'i ina sotanima sohafel, owa'. I'i basef ipe'imi endilisimi, Krais wapoti', God ina nafelona, owa'. Owa'etin.

¹⁴ I'i endilisi God owa' nofela Krais, dei' basef amama afa' wawalapami falafumi atom ea' waf ipe' pembale'efa Krais falafunai atona wafinai.

¹⁵ I'i na'ama, anom basef wapoti'. Dei' afa' otaga amam wambaso'ami wawalapa basef Godi. Dei' main, afa' wa'i basef alihim wawalapama God nafela Krais nohafel hi'agif wapoti'. Ea' i'i endilisi God owa' nofela saga'i, anan ina nafela Krais wapoti', owa'.

¹⁶ Ipe' enipa pa'i God ina nofela epes saga'i, owa'. I'i basef ipe'imi endilisimi, God ina nafela Krais wapoti', owa'etin.

¹⁷ I'i endilisi God owa' nofela Krais, dei' waf ipe' pembale'efa Krais ina la'ifina nigiambamepa, owa'. Falafunai atona. Dei' ipe' ata' papoma waf aonai la'ela'ef.

¹⁸ Ea' epes isima sape la'ifisi ma Kraisi saga'i, esis wapoti' hegililas hi'ilas.

¹⁹ Ape' mombale'efa Krais ea' mape mohafa Anan. I'i mombale'efana mope mohafana anae', nimeguf mape etap anae', mope aom endilisi mope migi'. Andeande'ma epes hiesi si'i uwahipis enis epes, ea' ape' mombale'efana si'i uwahipipa endilisi. Owa'etin.

²⁰ Ina na'ama, owa'. Krais naga' dei' endilisi God nafelona nohafel wapoti'. Anan nohafel na'ama nali'ma epes saga'i si'i gwa'aimi mali' maof aofi.

²¹ Dei' main, anona aman atotona nali' nawalapai waf epes saga'i, ea' na'ama etin anona aman nagi' nawalapai eaf anama saga'i sohafel wapoti'.

²² Amamaga amama na'ama. Epes hiesi Adami hiesi saga'. Ea' na'ama etina epes isima hiesi sape la'ifisa Kraisi, anona nemaf God nonda'as sotanima sohafel wapoti' sofa' ambal namunai ma sope namusi.

²³ Ape' epes hiapai atona etin mope mohafa nogota ape'inai. Aman nali'i, Anan Krais. Anan si'i gwa'aimi mali' maufi. Ea' nemaf anama notanima niefi'ianai, ape' hiapai ananipai mohafel wapoti'.

²⁴ Ea' nemaf akutainai notaga ma amamaga hiami awami higililam hi'ilam. Nemaf anama Krais nohambombaga la'ifimi hiami mamumami bu'wami awami mape ilif etapi hi'ilam, ea' nose'apa la'ifimi ananimi ma numafi amamaga hiami mefe'ma Ahalomana God.

²⁵ Dei' main, Krais nope Dembinai King nefe' nefe' notagama nemaf Anan nohagofa naumbih hiami mofe' owina bo'wagah ananimi.

²⁶ Anan nili' nohagofa naumbih amama hiami ea' nigi' nohagofa ga' endilisi si'i nautamana ananinai nape nagi'i.

²⁷ Dei' main, fowa' God na'iam na'ama na'i, “Anona nemaf ae' enda' amamaga hiami moloma epes hiesi wapoti' sefe' owina Anan.” Basef amama ma'i God nanda' amamaga hiami mefe' owina Krais atona. Ea' mogawa basef amama ma'i amamaga hiami amama ina ma'i God, owa'. Anan nanda' amamaga amama hiami mape owina Krais.

²⁸ Nemaf anama amamaga amama hiami mefe' owina Krais hi'ilam, ea' Nogalomana Godi atotona nefe' owina Anan nali' nanda' amamaga amama mafe' owina Krais. Ea' God nope nili' endilisima amamaga hiami moloma epes hiesi wapoti'.

²⁹ Enis epes sati waf bu'unai enis Kristen sanda'anai sape la'ifisa naumbih sahas saga' ea' epes isima satilis sombale'efa Krais sofa' baptais. I'i epes saga'i anona nemaf owa' sohafel wapoti', epes isima sofa' baptaisa epes sa'i anona nemaf sogawa sotaga sope si'imama? I'i endilisi ma epes saga'i anona nemaf owa' sohafel wapoti', dei maina isima sofa' baptaisa epes saga'i? Owa'etin.

³⁰ Afa' wapoti', la'ela'ef enis epes sa'i sohambombagafa. I'i epes isima sa'i owa' sotanima sohafel, dei' maina afa' wanda'am wape na'ama? Owa'etin.

³¹ Alupipei endilisi, ae' andanifel ma pape la'ifipama Krais Jisas Dembinai ape'inai. Ea' anom basef wapoti' endilisimi atom si'i amama. Nimeguf hiami la'ela'ef ae' ape si'i aga'i.

³² Ae' ape Efesus, anda' wandaf aloma mafis mape aolupi lu'wami. Amama atuwasi efa' amamaga bu'wami i'imama? I'i endilisi esis saga'i owa' sotanima sohafel, si'i anom amam gawaimi ma'i, “Hapaisi, ape' mea' gwa'aimi moloma embela naman meaga'.”

³³ Na'ama enis epes sombaso'mepa. Anom basef gawaimi ma'iam na'ama ma'i, “I'i mofe' moloma epes sanda' waf aonai, esis sohambambaga waf bu'unai ape'inai.”

³⁴ Dei' ipe' pekwaha ukup amama masi'ipei, pitanimani ukup mopan andeande'. Ipe' ina penda' waf aonai wapoti', owa'. Ae' enda'epa ambagof aoma anom basef dei' a'ipipami. Enis epes ipe'isi ina dei' sogawa God endilisi, ata' owa' etin. Ofagema amama ipe' etipa.

Alop nohafili, anona alop

³⁵ Ea' anona aman atuwasi nohali' ae' na'ama ni'i, “Esis saga'i anona nemaf sohafel si'imama? Anona nemaf sofa' maina alop sohafel wapoti'?”

³⁶ Anan nahali'ma basef na'ama okom nahaga nagaol. Dei' main, ape' mawa olelemb witim o amamaga, amama owa' meaga'i nambimb amama ina mope namum, owa'.

³⁷ Amamaga amama mawami, amama ina mataga etifim si'i agof o soh maim, owa'. Ape' mawa nalelef atom o anom gwa'aimi.

³⁸ Ea' God atona nanda' nalelef amama pepe'am mataga malo manda' soh afis maim magi' mataga mail si'i Anan atona okom na'i meataga. Ea' Anan atona nanda' lawah si'im maloma soh maima amamaga hiami ma gwa'aimi amama atona etin deindei'.

³⁹ Alop hianai deindeiana ambagof mapainai ina etifina, owa'. Alop epesi anona alop, mafisi anona alop. Amigufi anona alop, agufi anona alop.

⁴⁰ Ea' amamaga mape ilif heveni maloma mape etapi amama hiami mape. Ea' sosafa amamaga, sosaf naninani. Sosaf etapanai anona sosaf.

⁴¹ Aon alipunai anona sosaf, owambunai anona sosaf. Ondowa anona sosaf, ea' ondowa wapoti' hiami mamumami.

⁴² Waf epes sa'i sohafel wapoti', anama na'ama etin. Alop ape' dei' mawanai, anama nambimb aona folo'olana. Alop nohafel wapoti', anama ina anona nemaf aona, owa'. Nope bo'ona la'ela'ef.

⁴³ Alop ape' mawanai, anama aona folo'olana. Alop notanima nohafel wapoti', anama bo'ona endilisi. Alop mawanai anama ina la'ifina, owa'. Alop nohafel wapoti', anan la'ifina.

⁴⁴ Alop anama mawanai, etapanai. Ea' alop notanima nohafel wapoti', ilifanai, Ambal Bu'unai Godi numafiana. Alop anama biefina ilifanai etapanai nape.

⁴⁵ Baibel wapoti' na'i, “Aman nali'i Adam nataga ambal namunai napaina.” Ea' Adam nagi' natagai nataga Ambal Bu'unai ma nase'as ambal namunai epes hiesi.

⁴⁶ Ea' alop ilifanai ina nataga nali', owa'. Alop etapanai nataga nali'. Ea' alop anama ilifanai nataga nagi'.

⁴⁷ Aman nali'i, God nanda' etap nanda'ana nataga ambal napaina. Ea' aman nagi' natagai, Anan aman ilifanai.

⁴⁸ Ape' epes hiapai etapapai, ape' mandati na'ama etin si'i aman anama God nanda' etap nanda'anai. Ape' epes hiapai ilifapai anona nemaf motaga mundati na'ama etin si'i aman anama nafi'i heveni.

⁴⁹ Dei' ata' mape si'i aman anama etapanai ea' anona nemaf mope na'ama etin si'i aman anama nafi'i heveni.

⁵⁰ Ipe' alupipei, dei' a'ipipa basef amama bu'wami. Epes etapasi anona nemaf ina la'ifisa siowis wambel Godi, owa'. Amamaga etapami higililami ina anona nemaf la'ifima mope la'ela'ef, owa'.

^51-52 Ipe' peme'! Dei' ae' a'i ewalapa anom basef mali' mape mandambahi'i ma ipe'. Anona nemaf ape' hiapai ina moga', owa'. Mehip alof akutainai nelef, ape' hiapai mondamboma moho'of mondati na'apa. Dei' main, alof anama nelef ea' esis saga'i sohafel, anona nemaf ina ata' soga' wapoti', owa'. Ea' mope etap anae' wapoti' mondamboma moho'of mondati na'apa.

⁵³ Dei' main, alop anama mawanai anona nemaf notaga namona nope andeande' la'ela'ef.

⁵⁴ Endilisi, alop anama mawanai anona nemaf notaga dambaina nope andeande' la'ela'ef. Ea' alop anama na'i anona nemaf nohafel nondati na'ana nofa' ambal namunai nope la'ela'ef. Nemaf anama anom basef Baibelimi motaga mondawalap ma'i, “God nahagofa ga' nikila' wandaf nanda'am hi'alam.”

⁵⁵ “Ine', ga', pepel ine'inai enima? Ea' wamba'w ine'inai hi'elinai enima? Owa'etin.”

⁵⁶ Wamba'w saga'manai nataga ma waf aonai ea' pepel ma waf aonai nataga na'ama. Ape' epes hiapai matopa' basefa mi'uli Godi hi'alapa. Amama atom dei' mi'uli anama nawalapai pepel ma waf aonai.

⁵⁷ Ape' munifela God. Ama pepel Dembinai ape'inai Jisas Krais atona God nagiambamapa nanda'apa la'ifipa ma dei' mikila' wandafa muli'amona waf aonai.

⁵⁸ Ipe' alupipei ae'ipei endilisi, pepe la'ifipa andeande'. Ina umbamehepa petambel, owa'. La'el'ef pepe la'ifipa penda' maol Dembinai. Dei' main, ipe' pegawa maol anama panda'ana ma Dembinai, ina anona nemaf nowala etin, owa'.