1 Korin 14 - Basef Buꞌwami Godi

Presen amamaga bu'wami Ambal Bu'unai Godi nase'apami

¹ Ipe' la'ifipa pili' ukup mila epes hiesi pese'asa opalef esis. Ea' ukup ipe'imi mohafel endilisi ma pefa' presen anama bu'unai Ambal Bu'unai Godi nase'apanai. Ea' presen nali'i ma ipe' penda' maol la'ifipa pefa'anai, anama na'ama. Presen Ambal Godi nefelepa ma pewalapa basef Godi si'i profet.

² Ape' mogawa emi egafis sa'i basefa diga naninani esis ina sa'ipa anom basef epes, owa'. Sa'i saloma God atona. Dei' main, ina enis epes sagawa diga anama, owa'. Pepel Ambal Godi atona esis sa'i basef amama fowa' mape mandambahi'i.

³ Ea' emi egafis Ambal Godi nafelasa sa'i basef Godi si'i profet, epes isima sa'ipam sanda'am sa'ipasam sanda'as la'fisa sombale'efa Dembinai ea' sa'ipas safelasa sonda' waf bu'unai nonda' opalef asasimi awanem.

⁴ Emi egafis sa'i basefa diga naninani, esis sanda' esis etis sataga la'ifis. Ea' emi egafis Ambal Godi nafelas sawalapa basef Godi si'i profet, isima sanda' esis amam nematawa Kristen sataga la'ifis.

⁵ Ae' okom na'i ipe' hipei pi'i basefa diga naninani. Ea' emi egafis Ambal Godi nafelasa sowalapa basef Godi si'i profet, esis sikila' epes isima sa'i basefa diga naninani owa' sombomam si'iam alihim. Dei' main, i'i epen inima owa' nembomam ni'iam alihim, basef amama ina migiambama esis amam nematawa Kristen sotaga la'ifis, owa'. Ea' i'i nembomam alihim, basef amama migiambamas sotaga la'ifis.

⁶ Alupipei, ipe' ukup mopama basef amama andeande'. I'i ae' efe'mago ipe' ma i'i basefa anona diga, atuwasi igiambamepa petaga la'ifipa pi'imama? Owa'etin. Ea' i'i embomam i'ipipa anom basef God nihi'ambepam i'ipipa gawa bu'unai ipe' iwalipipama basef ofagema Godi si'i profeta Ambal Godi nefela ae' ie'ipipami.

Ape' mowalapa basef Godi alihima diga

⁷ Amamaga ambal a'ami, si'i batagw moloma gita, amama na'ama etin si'i diga anama hianai. I'i amam owa' mogal melef monda' maguf mamumami motaga, atuwasi membe' aligah mogawa maguf amamumi alihim mi'imama? Owa'etin.

⁸ I'i bugel alof owa' nogal ni'i alihina, amam monda' wandafi mundamafuma mope mondandombola wandaf mi'imama? Owa'etin.

⁹ Ipe' wapoti' na'ama etin. I'i ipe' pi'i basefa anona diga esis owa' sogawanai, atuwasi sogawa basef amama ofagema si'imama? Owa'etin. Atuwasi basef ipe'imi mefe' hi'ilam etin.

¹⁰ Endilisi, naninani nape etap anae'. Ea' ina anona diga falafunai atona, owa'. Basef ofagema mape diga naninani hianai.

¹¹ I'i ae' owa' egawa basef ofagema enin epen na'iami, atuwasi anan okom nopoma ae' ni'i ae' epen a'i anona diga anona wambel. Ea' ae' wapoti' okom napoma enin, i'i na'i anona diga anona wambel.

¹² Ipe' wapoti' na'ama etin. Ipe' ukup mohafel endilisi ma pefa' presen anama bu'unai Ambal Godi nasi'ipanai. Ea' ipe' penda' maol la'ifipa endilisi ma pefa' presen anama nagiambama eses Kristen sotaga la'ifis.

¹³ Ea' epen emi na'i basefa anona diga, anan nenda' betena Goda nese'an gawa nemboma basefa diga anama.

¹⁴ Dei' main, i'i enda' betena anona diga, ambal ae'anai atona nanda' beten, ea' okom ae'anai nape etin.

¹⁵ Ea' dei' enda'am i'imama? Ae' enda' betena ambal ae'anai eloma okom ae'anai wapoti'. Ae' enda' awalefa ambal ae'anai eloma okom ae'anai wapoti'.

^16-17 I'i ipe' pinifela Goda ukup ipe'imi atom, ama epen owa' nefa' presen anama bu'unai Ambal Godi nasi'ipanai, dei' anan negawa ni'imama ma beten anama ipe'inai ma nie'i endilisi? Owa'etin. I'i ipe' penda' beten pi'i basef bu'wami endilisi, ina pigiambama epen inima netaga la'ifin, owa'. Dei' main, anan ina negawa basef amama ipe'imi, owa'.

¹⁸ Ae' anifela God nimeguf hiami ma ae' a'i basefa diga naninani. Ipe' ina la'ifipama pikila' ae' ma presen anama, owa'.

¹⁹ Ea' nemaf anama epe eloma esis amam nematawa mondakolas, ae' a'i i'i basefa amef bandami wenifim biefima okom ae'anai ihi'amba esisa sogawam. Ea' i'i ae' i'ipasa basefa amef laumi motaga hihif si'i 10,000 peleima anona diga na'iami, ea' hapaimi, falafumi atom.

²⁰ Ipe' alupipei, ipe' ina pepe ukup motamea si'i awasi, hapaimi. Waf aonai, ipe' ukup bo'om motamea andeande' ukup mose'epam si'i awasi. Ea' nomonas ipe'imi motaga si'i epes dembesi.

²¹ Anom basefa mi'uli Godi mail buk ma'i, “Dembinai na'i, anona nemaf Ae' enda' enis epes anona wambota sa'i anona diga efelas si'ipasa basef ae'ami epes isima ae'asi, ea' esis ina nambimb sila basef amama, owa'.”

²² Dei' mogawa presen anama pa'i basefa diga naninani, anama ina ikwaf God nanda'ana esis sombale'efanai, owa'. Anan nanda'ana epes isima owa' sombale'efanai. Ea' presen anama Ambal Bu'unai Godi nafelepa pawalapa basef ananimi si'i profet, anama ina ikwaf God nase'asana epes isima owa' seambale'efanai, owa'. Anama ikwaf isima sembale'efanai etis.

²³ Ea' i'i esis amam nematawa Godi hiesi sondowa'anima etifigin ama ipe' hipei pi'i basefa diga naninani ma enis epes owa' sefa' presen anama o enis owa' seambale'efa Kraisi sifi'i sope solomepa, si'i, “Ipe' pahaga pagaoli.”

²⁴ Ea' i'i Ambal Bu'unai Godi nefela ipe' hipei ma pewalapa basef Godi si'i profet ea' enin epen owa' nembale'efa Kraisi o owa' negawa basef Godi andeande'i nifi'i niwis, basef ipe' hipei atuwasi moha okom epen inima ea' moha opaf ananinai ma maina waf napaini.

²⁵ Basef hiami mape mandambaho' okom ananinai, amama atuwasi motaga mondawalap alihima enin nifi'i nindiwa nembawa nitimalo' nefela agel Godi nowalapa basef na'ama ni'i, “Endilisi, God nape nalomepa.”

Waf sanda' lotuwanai notaga andeande'

²⁶ Ipe' alupipei, dei' basef amama akutaimi ae'ami mape na'ama. Nemaf anama pendowa'anima, presen anama hianai Ambal Bu'unai Godi nasi'ipanai napoma ipe' hipei na'ama. Enin epen nenda' anona awaf, enin epen ni'i anom basef Godi niwalipipa, enin epen God nase'ana anom basefa nowalapam, ea' enin epen negawa ma ni'i anona diga, ea' enin epen negawa ma nemboma basef ma diga anama. Ipe' penda' amamaga amama hiami ma pigiambama esis amam nematawa Godi sotaga la'ifis.

²⁷ I'i enis ukup mohafela si'i basefa anona diga, bias o wenis si'i basef atona etin. Ea' ma'um amama. Ea' ina sokolasa malogof si'i, owa'. Si'iam atona etin. Amama ea' ma'um. Ea' enin epen atitin nemboma basef amama.

²⁸ Ea' i'i owa' enin epena nembomam, epen inima na'i nie'i basefa anona diga feso'man nepan ma basef amama maina nemaf sanda' lotuanai. Atuwasi enin etin ni'iam neloma God.

²⁹ Ea' amam profet biam o wanom Ambal Bu'unai Godi nafelama mowalapa basef Ananimi, amam mowalapam. Ea' anom amam mowaloga basef amama.

³⁰ I'i enin epen tol nepe lotu neme' basefa God nihi'amban anom basefa epen inima, aman anama nali' naitu nawalapa basefi feso'mona nope.

³¹ Ipe' hipei Ambal Godi nafelepa pawalapa basef Godi si'i profet, ipe' pewalapam atona etin pi'iam deindei' ma epes hiesi seme'am okokomama monda'as sotaga la'ifis.

³² Emi egafis sofa' presen anama Ambal Godi nafelasa sowalapa basef ananimi si'i profet, sumafi presen anama andeande'.

³³ Dei' main, God ina ofagenama sa'i basef mamumami, owa'. Anan nanda' waf bu'unai opalef etifim mape awanem. Wambel hiagoma esis amam nematawa Godi sondowa'anima sape,

³⁴ awau nematawa ina witu wi'i basef, owa'. Awo feso'mawa ope etin. Sios amam nematawa Godi waf ea' anama atona. Nematawa ina ope uli'ma sios, owa'. Ope owin si'i mi'uli Godi na'iam.

³⁵ I'i awo wi'i ogawa anom basef ofagema, atuwasi ofe'ma ifagw awaumi ohali' wauhupawa mi'ipawa. I'i ano'w nemata'w konda' basef ipe' sios pandakolas, waf anama ina andeande'.

³⁶ Dei' a'i ihali'ipa. Ipe' ofagepama basef Godi? Ipe' etipa pefa' basef Godi ea' enis amam nematawa owa'? Owa'etin.

³⁷ I'i emi egafis ukup mi'i Ambal Bu'unai Godi nafelasa sawalapa basef Godi si'i profet, o si'i esis sefa' anona presen bu'unai, esis sogawa basef amama dei' anda'mepami, amama mi'uli Dembinai.

³⁸ I'i esis sindaiwa'ma basef amama, ipe' wapoti' pindaiwa'ma esis.

³⁹ Ipe' alupipei ae'ipei, ukup ipe'imi mohafel endilisi ma Ambal Godi nefelepa pewalapa basef ananimi si'i profet. Ea' ipe' ina pesopama eafa pie'i basefa diga naninani, owa'.

⁴⁰ Nemaf anama ipe' amam nematawa pendowa'anima penda' lotu, ipe' penda' maol andeande'ma lotu ipe'inai notaga bo'ona.