1 Korin 13 - Basef Buꞌwami Godi

Ape' ukup mimila enis amam nematawa endilisi

¹ I'i ae' egawa ma i'i diga naninani epesi soloma enseli wapoti' ma ae' owa' okom mimilas ese'asa okom igiambamas, basef ae'ami falafumi atom si'i saha olef wata malef etini.

² I'i Ambal Bu'unai Godi nose'e presen amamaga bu'wami nefele ma ewalipasa basef Godi ma egawa okom hiami Godi mape mandamabahi'i hi'ilam, ama egawa gawa hianai wapoti', ma embale'efa God la'ifiwi endilisi ma la'ifiwi ma i'ipama halafutagw mindiki'ah mefe' gani to'wan, ea' ae' owa' okom ninila esis amam nematawa endilisi, ae' falafuwei atowe.

³ I'i ae' ese'asa amamaga hiami ae'ami hi'ilama esis isima kwahusima hiahaom ma enda' maol Godi i'i aho'ma enis epes sandaiwa'ma Godi si'i sehe sofe nif ega'. Ea' ae' owa' okom ninilas ese'as opaf, ea' hapaimi. Anona nemaf amamaga amama hiami ina migiambame, owa'etin.

⁴ Emi egafis ukup maila enis epes endilisi, esis sanda' waf bu'unai na'ama. Esis ina mehip sagwamasa waf aonai esis sanda'masanai, owa'etin. Esis sape satilis. Esis sati epes hiesi uwahipis sagiambamas. Esis ina kowalasa epes amamaga hiamisi, owa'etin. Ea' ina safela agof asasimi atom, esis ina ukup ma'i esis etis, owa'etin.

⁵ Esis ukup maimailas sape andeande'. Esis ina ukup mapoma amamaga asasimi endilisi, owa'etin. Esis ina ukup wandafum mehip, owa'. Ea' ina ukup mapoma waf aonai enis epes sanda'masanai, owa'etin.

⁶ Esis ina sandanifel ma waf aonai ikiakanai, owa'etin. Esis sandanifel ma waf endilisinai bu'unai atona.

⁷ Nimeguf hiami dondol esis sanda' waf anama na'ama. Esis ukup mape awanema maina nemaf sefa' nimanimi lu'wami. Esis sagiambama epes alifisi saloma epes isima ena la'ifisa sagiambama esis etisi. Esis sombale'efa God endilisi sape sehafana ma nigiambama esis soloma enis wapoti'. Esis saitu la'ifisa nimanimi matagamas.

⁸ Waf anama ukup maimaila enis epes endilisi, anama anona nemaf ina higililana, owa'etin. Ea' waf anama Ambal Godi nafelapa ma mowalapa basef ananimi, anama anona nemaf higililana hi'ilana. Presen anama bu'unai ma epes sogawa sa'i diga naninani, diga anama anona nemaf hi'ilana. Presen anama epes sogawa ma waf Godi, gawa anama anona nemaf hi'ilana wapoti'.

⁹ Dei' main, dei' ata' mogawa gawa tu'wanina atona. Presen anama Ambal Bu'unai Godi nafelasa sowalapa basef ananimi si'i profet, basef amama wapoti' ata' tu'wanim atom.

¹⁰ Ea' anona nemaf amamaga God okom na'i meataga migi' endilisi motaga, nemaf anama amamaga amama dei' motaga tu'watu'wanim atuwasi hi'ilam.

¹¹ Fowa' ae' ata' ape si'i awani a'i basef si'i awani. Ae' ameme'ma amamaga si'i awani. Ea' nemaf anama ataga dambewe, akwaha waf anama fowa' ape so'uwe anda'anai.

¹² Dei' mati amamaga mataga, ea' ina mandawalap alihim endilisi, ata' owa'. Mataga si'i mapela embel mati ambal atona. Ea' anona nemaf owagama nemaf dahandahama motaga, muti naep alihim. Dei' ata' egawa tu'watu'wan atom. Ea' nemaf anama egawa amama endilisi si'i God nogawa ae'.

¹³ Dei' waf wenifina nape, anama na'ama. Waf mombale'efa Kraisi naloma waf mope mohafa God, waf ukup maimailasanai. Waf anama wenifina. Ea' nali' endilisi, waf ukup maimailasanai.