1 Korin 12 - Basef Buꞌwami Godi

Presen amamaga bu'wami Ambal Bu'unai Godi nasi'ipami

¹ Ipe' alupipei, ae' a'i enda'mepago basef amama ma presen amamaga bu'wami Ambal Bu'unai Godi naso' ipe' atona etinami. Dei' main, andaiwa'ma enipa ipe' ukup mololaipa ma amama.

² Ipe' pegawa ma fowa' ipe' ata' pape awepa ma pape panda' waf aonai pelolama God, nogota anama ipe' ukup maila god baso'omainai maima mahonde'ipei pailam owa' moga mie'i.

³ Ea' ipe' pegawa emi epen Ambal Bu'unai Godi nafelan na'i basef, ina ni'i basef ni'i, “Jisas owagama higililana,” owa'. Ea' emi epen Ambal Bu'unai Godi a'ani, enin ina anona nemaf ni'i basef ni'i, “Jisas Anan Dembinai,” owa'.

⁴ Presen anama bu'unai Ambal Bu'unai Godi nase'apana na'ai, anama hianai naninani. Anama Ambal Godi atona nase'apana.

⁵ Maol Dembinai hianai naninani nape, ea' Dembinai atotona nape numafiana.

⁶ Waf hianai naninani manda' maolanai, ea' God atotona nase'apa pepel epes hiapai ma la'ifipa monda' maol anama hianai.

⁷ Ambal Bu'unai Godi nawalapa pepel ananinai ma epes hiesi atona etina nagiambama hiesi.

⁸ Epen atitin Ambal Bu'unai Godi nase'an pepela nihi'ambamasa gawa hianai bu'unai naninani ma nowalapa basefa epes hiesi. Ea' enin epen Ambal Bu'unai Godi anama atona nase'ana pepela newalapa basef ofagema waf Godi ma esis amam nematawa sogawam andeande'.

⁹ Ea' enin epen Ambal Bu'unai Godi atona nagiambaman nembale'efa God nataga la'ifin nanda' maol ananinai andeande'. Ea' enin epen nefa' pepela nigiambama epes isima awes nanda'asi sataga bo'wes. Ambal Bu'unai anama atona.

¹⁰ Ea' enin epen Ambal Godi nagiambaman nase'an pepela nenda' amamaga la'ifimi si'i God nanda'ami. Ea' enin epen Ambal Godi nafelan na'i basef Godi. Enin epen nefa' gawa ma newaloga ambagof mamumami hiami, bu'wami o awami. Ea' enin negawa ma na'i diga naninani hianai. Ea' enin epen negawa ma nemboma basefa diga naninani.

¹¹ Ambal Bu'unai Godi anama atona nanda' maol nawalapa presen anama hianai. Ama okom ananinai atona nase'as presen anama bu'unai nafe'ma epes hiesi atona etin.

Ape' amam nematawa Godi si'i alop wa'awa'ana alop atotona

¹² Alop ape' epesi etifina ea' wa'awa'ana hianai ea' alop anama hianai lu'una sa'ona nafe' nail alop si'ina atotona. Krais wapoti' na'ama etin.

¹³ Dei' main, ape' hiapai mofa' baptaisa Ambal Bu'unai Godi atotona. Nanda'apa mataga alop atotona, esis Juda saloma esis owa' Judaisi saloma esis sape wafifisi, saloma esis agof a'asi sape owina enis epes wapoti'. Ape' hiapai mofa' Ambal Godi atotona nape nalomapa la'ela'ef.

¹⁴ Ape' mogawa alop ina etifina, owa'. Alop wa'awa'ana hianai.

¹⁵ I'i bo'waga ni'i, “Ae' ina lagol ape alop si'ina, owa'.” I'i bo'waga anama ni'i basef na'amani, ina andeande', owa'. Basef amama hapaimi. Bo'waga nape alop si'ina anama atona.

¹⁶ Ea' aliga wapoti' ni'i, “Ae' ina naep ape alop si'ina, owa'.” I'i aliga ni'iam na'ama, ina andeande', owa'. Basef amama hapaimi. Aliga nape alop si'ina anama atona.

¹⁷ I'i alop hianai si'ina ea' naep atom hi'ilam, dei' neme' basef ni'imama? Owa'. I'i alop hianai si'ina aligah atom mope hi'ilana, dei' neme' alogw ni'imama?

¹⁸ Ea' alop ina nataga si'i na'ama, owa'. God atona fowa' nogawa okom na'i alop atona etin lu'una sa'ona dei' nanda'ana nape nandahama si'i okom ananinai atona na'iam.

¹⁹ I'i alop wa'ana nope anona alop etifina hi'ilana, alop anama si'ina ina nape alop endilisinai, owa'.

²⁰ Alop ina nataga nandanda' na'ama, owa'. Alop wa'awa'ana sa'osa'ona hianai, ea' alop si'ina etifina.

²¹ Naep ina la'ifima mi'ipa lagof mi'i, “Afa' wandaiwa'ma ipe' pepe pelomafa. Afa' atofa ope, andeande'.” Ea' balaga wapoti' ina la'ifima ni'ipa bo'wagah ni'i, “Ae' andaiwa'ma ipe' pepe pelome, owa'. Ae' atowe epe, andeande'.” Owa'etin.

²² Alop anama wa'awa'ana falafuna ape' ma'i owa' la'ifina, i'i anama owa' nondala nope, anona nemaf alop anama si'ina ina la'ifina, owa'.

²³ Ea' alop anama wa'ana ape' ambagof awamunai, ape' mofalo'mana endilisi mumafiana andeande'.

²⁴ Ea' alop wa'awa'ana owa' ambagof awamunai, anama ape' ina mofalo'mana mumafiana na'ama, owa'. Alop anama wila ma nandala nape. God atona nasa alop anama wa'awa'ana hianai nail etifigin nataga alop atotona. Alop wa'awa'ana hianai agof a'anai God nandana nataga bu'unai.

²⁵ Anan nanda'am na'ama ma alop anama ina anona nemaf nondawal wa'awa'ana, owa'. Alop anama hianai wa'awa'ana nimafiana atona etin.

²⁶ I'i alop wa'ana neme' ekepehana, alop hianai si'ina atuwasi neme' ekepehana na'ama etin. I'i enis epes sinifela wa'ana, hianai si'ina nondanifel hi'ilana nolomana.

²⁷ Amama atom dei' ipe' hipei pape alop Kraisi si'ina. Ea' ipe' hipei atona etin alop wa'awa'ana ananinai atona.

²⁸ God nahapona enis epes ananisi sape na'ama ma sios. Mali'i aposel, sagi'i profet, safe'ma wenifi, esis tisa sawalipasa basef ofagema Godi. Ea' sagi'ma amama epes isima sanda' betena sanda' la'ifimi si'i God nanda'ami. Ea' epes isima sanda' awes nanda'asi sataga bo'wes wapoti' ea' esis isima sagiambama enis epesi, saloma amam mumafi maol siosi naninani hianai saloma isima sogawa ma si'i diga naninani hianai.

²⁹ Dei' ipe' ukup mape ma'imama? Ipe' pa'i amam hiami mape aposel atom? Pa'i amam hiami mape profet atom? Ipe' pa'i amam hiami mape tisa atom? Pa'i esis hiesi sanda' amamaga la'ifimi si'i God nanda'ami?

³⁰ Pa'i esis hiesi sofa' presen anama bu'unai ma sonda' awes nanda'asi sataga bo'wes wapoti'? Pa'i esis hiesi sogawa ma si'i diga naninani hianai? Pa'i hiesi sogawa ma somboma basefa diga anama naninani? Owa'etin.

³¹ Ea' ipe' hipei ukup mohafela pefa' presen amamaga bu'wami mali'i. Ea' dei' a'i ihi'ambepa anona eaf bu'unai nikila' endilisi presen anama hianai.