1 Korin 11 - Basef Buꞌwami Godi

¹ Ipe' okokoma waf ae'anai pila ae' si'i ae' okokoma waf Kraisi ailana.

Waf sase'ala balagah ma sanda' lotu

² La'ela'ef ipe' okokoma ae' paila basef amama hiami a'ipipami. Basef amama efa'ami dei' a'ipipam ipe'. Amama atom dei' anifelipa a'i panda' waf bu'unai endilisi.

³ Dei' ae' a'i ipe' pegawa basef amama. Agilinai amam hiami anan Krais atona ea' agilinai ako'unai waulunama'w atona ea' agilinai Kraisi God atona.

⁴ I'i emi aman Ambal Bu'unai Godi nefelona na'ipasa basef Godi si'i profet o nanda' beten ama siti anan nase'ala balaga, aman anama nanda' agel Kraisi nowala.

⁵ Ea' emi nemata'w wapoti' Ambal Godi nafelo'w kwa'ipasa basef Godi si'i profet o kwanda' beten ama owa' kose'ala balaga ako'unai, akwa'w wapoti' kwanda' agel waulunama'wi aona. Amama na'ama etin si'i kwando balaga ako'unai hi'alana.

⁶ I'i nematawa owa' ose'ala balagah awaumi, awo otopa'am bandam. Waf ape' hiapai nape na'ama. I'i ambagof aoma weatopa'am bandam o ondowam hi'ilam, ape' ma'i waf anama aonai nanda' nematawa ambagof aom. Dei' amama atom andeande'ma awo ose'alom.

⁷ Amam ina mose'ala balagah amamumi, owa'. Dei' main, God nanda' amam mandati si'i Anan ama mowalapai pepel lu'unai Ananinai. Ea' nematawa wawalapai pepel lu'unai amami.

⁸ Dei' main, God ina nanda' amana alop nemata'wi, owa'. Anan nanda' nemata'wa alop amani.

⁹ Ea' amama wapoti', God ina okom na'i nemata'w dei' nanda' amana nagiambama akwa'w, owa'. Anan okom na'i aman dei' nanda' nemata'wa kwagiambamana.

¹⁰ Amama atom dei' nematawa ose'ala balagah awaumi ondola'wifa ope owina amam wauhupawa awoumi. Awo ose'alam ombaho'ama umbamahawa ma amam ensel motolowa.

¹¹ Ape' mape la'ifipama Dembinai mape na'ama. Ina nemata'w ato'w kope aman a'akw aman atona nope nemata'w a'ana, owa'.

¹² God nanda' nemata'wa alop amani ea' na'ama etin dei' nanda' amam mataga alop nematawai. Ea' God ofagonama amamaga amama hiami hi'alam.

¹³ Dei' ipe' etipa ata' pewaloga basef amama. I'i nematawa ina ose'ala balagah awaumi onda' betena God, amama andeande' o owa'?

¹⁴ Waf ape'inai amam nematawai atona nihi'ambepa na'ama. I'i amam balagah laumi, amama manda'am ambagof aom.

¹⁵ Ea' i'i nematawa balagah mopaiwa, andeande', balagah si'i sosaf bu'unai awaunai. Dei' main, God atona nase'awa balagah laumi awo ma moso'ala balagah awaumi.

¹⁶ Ea' i'i emi epen nesmbala basef amama, anan negawa ape' ina maila anona waf, owa'etin. Maila waf anama atona. Ea' esis amam nematawa Godi hiesi dei' sailana na'ama etin.

Esis Korin sahambombaga gwa'aimi Dembinai

¹⁷ Ae' a'i i'ipipa anom basef ma ipe', ea' ae' ina efela agof ipe'imi, owa'. Nogota anama pandakolas panda' lotu, amama mahambombagepa.

¹⁸ A'i ili' i'ipipa amama. Nogota anama ipe' pandakolas panda' lotu, ipe' pandawal etin. Ae' ame' basefa ipe' na'ama. Ea' ae' okom na'i endilisi ipe' pandawal, o owa'?

¹⁹ Endilisi, ipe' pandawal etin pa'i waf anama bu'unai ma emi egafis saila basef endilisi sotaga sondawalap alihis? Owa'etin.

²⁰ Nemaf anama ipe' hipei pandakolas, ipe' ina pefa' gwa'aimi Dembinai, owa'.

²¹ Ipe' hipei atona etin mehip pali' pa' gwa'aimi ipe'imi atom. Ea' anin nolomahan nape, ea' enin epen na' embel wain hianai nahaga nagaol.

²² Ipe' ifagw a'epama pea' gwa'aimi embel maim? Ipe' pa'i amam nematawa Godi isima awasi falafisi etis? Ipe' pa'i penda' enis epes gwa'aimi a'asi ambagof aom? Dei' atuwasi i'i maim basefa ipe'? Efela agof ipe'imi? Owa'etin. Amamaga amama ipe' panda'ami ae' ina anifelipa efela agof ipe'imi, owa'.

Dembinai Jisas nase'ama gwa'aimi ananimi amam alupumi Ananimi

²³ Basef amama ae' a'ipipami amama ae' efa'ama Dembinai atona. Amama na'ama. Owamb anama Judas nase'ama Jisas nafe' lagof amam naumbih, ma owamb anama Dembinai Jisas nafela bret

²⁴ ea' nanifela God nawalona na'i, “Anama alop ae'anai, ase'epana agiambamepa. Ipe' penda'am na'ama etin ukup okokoma ae'.”

²⁵ Amam ma'am hi'alam, Anan nafelai anona kap embel malanai nanda'am na'ama etin na'i, “Kap anama basef la'ifimi dambaimi ae'ami endilisimi atom. Basef amama esimbel ae'ami atom malo magiambamepa. Nimeguf hiami danda ipe' penda' amama pea' embel, penda'am na'ama ma ukup okokoma ae'.” Fowa' Jisas na'ipa alupumi ananimi na'ama.

²⁶ Nimeguf hiami ipe' pea' bret naloma kap embel amama, ipe' pewalapa basefa Dembinai naga' motaga alihim mefe' mefe' motagama nemaf Anan niefi'ianai.

Emi epen nehambombaga gwa'aimi Dembinai, ofagema ananimi atom

²⁷ I'i enin epen owa' okokom mili' andeande' ma nea' gwa'aimi amama bret naloma embela kap Dembinai nea'am na'a, enin nanda' waf aonai ma alop noloma esimbel Dembinai, ea' epen inima ofagema mopoma enin etin.

²⁸ Ape' hiapai ata' muli' nomonas motamea andeande' mea' bret noloma embel kap amama.

²⁹ Dei' main, i'i epen owa' nomonas motamea andeande' ma basef ofagema ma alop Dembinai ma enin nea' gwa'aimi embel na'a, ofagema mapoma epen inima etin.

³⁰ Amama atom dei' amam nematawa hiesi ipe'isi owa' la'ifis ea' awes hianai nanda'as ea' enis saga' ma waf anama.

³¹ I'i ape' muli' nomonas motamea andeande', anona nemaf ina anom ofagema motagama ape', owa'.

³² Ea' i'i Dembinai nihihi'a waf ape'inai ma nogwa waf aonai ma ape', amama Anan nase'apa nimanimi nanda'apa mope andeande' ma anona nemaf ina higililapa moloma epes saila waf etapanai, owa'.

³³ Ea' dei' ipe' alupipei ae'ipei, maina nemaf ipe' pendakolasa pea' gwa'aimi Dembinai, ipe' ata' pepe pehafa enis sifi'i.

³⁴ I'i emi egafis nolomohas, esis ata' sili' sea' gwa'aimi ifagw asasimi. Na'ama God nonda'mepa basefa ipe'. Basef amama tu'wanim mapani ata' owa' i'ipipami, maina nemaf efe'mago ipe', i'ipipam.