1 Korin 10 - Basef Buꞌwami Godi

¹ Alupipei, ae' andaiwa'ma ipe' ukup mose'epama amamaga amama. Esis bafasapa hiesi Israel sape owina elagw amama mali'as safe' ea' hiesi safe' bo'wagah asasimi sowala sambo naoh embel akwahimi

² sawisa elagw maloma naoh embel safe'. Amama mondola'wifa sofa' baptais sape saloma Moses salomana nao'was safe'.

³ Ea' esis hiesi sa' gwa'aimi amama God nase'asami,

⁴ sa' embel amama God nase'asami. Esis sa' embela owap anama God nase'asami nafe' nalomas. Owap anama nondola'wifa Krais atona.

⁵ Ea' God nandaiwa'ma hiesi sape saloma esis. Amama atom dei' saga' hi'alas etap anama wafiguma.

⁶ Ea' amamaga amama hiami mataga mihi'ambapa si'i anona ikwafa ape' motolom mogawa ma ape' ina ukup mimila amamaga awami si'i esis fowa' sanda'am, owa'.

⁷ Ipe' ina ukup mimila god baso'omunai si'i esis fowa' sanda'am, owa'. Baibel na'i esis na'ama na'i, “Amam nematawa sape sanda' gwa'aimi embel sa'am sohafel salemb etin sanda' salamal ki de'iaf sape.”

⁸ Ape' wapoti' ina monda' waf anama aonai so'a waolanai si'i esis fowa' sanda'am, ama nemaf atotona esis 23,000-peleis saga' hi'alas.

⁹ Ea' ape' ina mogwamba God si'i esis fowa' sagwambana ma iguf awami mahasa saga' hi'alas, owa'.

¹⁰ Ipe' ina ukup aom mi'i diga wandafunai peloma God si'i esis fowa' sanda'manam God, ma ensel anama naha epes saga'i nafi'i nahas saga' hi'alas, owa'.

¹¹ Amamaga amama hiami matagama esis, amama si'i anona ikwafa ape' dei' mape nogota anae' felefele'ma na'i hi'ilana. Amama si'i anona ikwafa ape' motolona mundumafuma andeande'. Na'ama monda' waf aonai si'i esis.

¹² Ea' emi egafis si'i esis etis situ la'ifis, esis sundumafuma andeande'. Na'ama sowa ma waf aonai.

¹³ Amamaga meagwamba ipe'i, amama ina anom deiam, owa'. Amama na'ama etin si'i gwamba matagama epes hiesi. God naila basef ananimi endilisimi nanda' amamaga ananimi andeande'. Anan ina nambimb ni'i aho'ma amama meagwamba ipe'i motagama ipe' mikila' pepel ipe'inai, owa'. Nemaf anama amama motagamepa, God nonda' anona eafa nigiambamepa pitu la'ifipa.

Ape' ine' mila god baso'omunai noloma ambagof awami moloma God wapoti', owa'. Hapaimi

¹⁴ Ipe' alupipei endilisi ae'ipei, ipe' pekwaha waf anama pailana god anama baso'omunai, pewa' alafugaha anan.

¹⁵ Ipe' pegawa, dei' a'ipipa. Ipe' etipa pewaloga basef amama ae'ami.

¹⁶ Kap anama aman numafi lotuwi nofalo'mana, anama na'ama. Ape' manifela Goda kap anama nakolasa ape' maloma esimbel Kraisi. Endilisi etis bret anama ape' mawalonai, anama nakolasepa maloma alop Kraisi.

¹⁷ Bret atotona. Amama mihi'ambapa amam nematawa hiapai mape si'i alop atotona. Dei' main, ape' hiapai mandakolas mandao'oma ma' bret atotona.

¹⁸ Ipe' ukup ata' mopoma esis Israel. Epes isima sa' gwa'aimi mafis sondolali ma God balata anama sandatama sape etifigin saloma Goda balata anama.

¹⁹ Basef ofagema do'ok a'ipipami ma'i main? Gwa'aimi mafis maim sondolalima god baso'omunai endilisimi? Amam god anama baso'omunai endilisimi? Ae' a'iam na'ama? Owa'etin.

²⁰ Ae' a'iam a'i amamaga esis sololama Godi sondolalima god baso'omunai, ina sondolali ma God, owa'. Ae' andaiwa'ma ipe' pendakolas peloma god anama baso'omunai, owa'.

²¹ Ipe' ina pea' embela kap Dembinai noloma kap god baso'omunai wapoti', owa'. Ea' ina pea' gwa'aimi balata Dembinai moloma gwa'aimi balata sondolali ma god baso'omunai wapoti', owa'.

²² Ape' ina monda' maol molomas ma god baso'omunai monda' okom Dembinai aona ma ape', owa'. Ape' ina mi'i ape' la'ifipai mikila' Dembinai, owa'.

²³ Ipe' pa'i, “Andeande'ma monda' amamaga mamumami hiami.” Amama endilisi, ea' ina amama hiami magiambamapa, owa'. Ipe' pa'i, “Andeande'ma monda' amamaga mamumami hiami.” Ea' ina amamaga hiami manda'apa mataga la'ifipa ma bale'ef, owa'.

²⁴ Ipe' ina ukup mopoma ipe' etipa pindumafuma pepe andeande', owa'. Ipe' ukup mopoma enis epes wapoti' ma pigiambamas sope andeande'.

²⁵ Mafis hiami satalom stowa, amama ipe' penda'am. Ina ukup mope hiahiam pindahahali'mam, owa'.

²⁶ Dei' main, “Etap anae' naloma amamaga hiami, amama Dembinai atom.”

²⁷ I'i enin epen owa' neambale'efa Kraisi nefalepa ni'i pefe' pelomana pea' gwa'aimi ma pi'i peafe', andeande'. Pefe' pea' gwa'aimi amama enin nandandombama neasi'ipami. Ipe' ina ukup motamea hiahiam pendahahali'mam, owa'.

²⁸ Ea' i'i enin epen nili' ni'ipipa ni'i, “Mafis amama sondolalima god baso'omunai”, ipe' pegawa basef ananimi ina pea'am, owa' hapaimi. Ipe' pi'i uwahipin epen inima.

²⁹ Ae' ina a'i ipe' peme' basef mape opalef ipe'imi nomon ma'iami pilam, owa'. A'i pila basef mape opaf ananinai nomon ma'iami epen inima na'ipipei. Na'ama enin epen ni'i, “Ae' ape wafifiwei. Dei' maina okom enin epen ina la'ifina nohopa ae'?

³⁰ I'i ae' inifela Goda ea'am, dei' maina enin epen nehopa ae' ma ea' mafis amama anifela Godami? Na'ama ae' andaiwa'.”

³¹ Dei' ae' egwa basefa epen inima. I'i ipe' pi'i pea' gwa'aimi embel maim o penda' maim amamaga, penda'ama pefela agel Godi atona lu'una.

³² Ipe' ukup mopoma epes hiesi, esis Juda soloma esis owa' Judaisi, soloma amam nematawa isima Godi. Ea' ipe' ina penda' anona waf nonda' esis sowa ma waf aonai, owa'.

³³ Si'i ae' wapoti' anda' maol lu'unai ma igiambama epes hiesi ma ukup mi'i waf bu'unai hianai ae' anda'anai. Ae' ina anda'am agiambama ae' imafi ae' atowe, owa'. Anda'ama agiambama amam nematawa hiesi ma God nofa'as sotanimani.