1 Korin 1 - Basef Buꞌwami Godi

^1-2 Ae' Pol aposel Jisas Kraisi anda' maol ananinai. Okom Godi atona nofale nandandepe anda' maol anama. Ae' aloma owalomapa Sostenes wape na'ae wasapa' danifel ma nemaf bu'unai nefe'mago ipe' amam nematawa Kristen pape Korin. Ea' anda' basef amama mafe'mago ipe'. Ipe' pape la'ifipa paloma Krais Jisas, God nanda'epa pape bo'wepa nofalepa nosahe'epa ea' Ananipei etipa. Afa' biafa wase'epa danifel ma ipe' paloma epes hiesi ma wambel hiagoma sofala agel Dembinai ape'inai Jisas Krais, Anan Dembinai ma ape', esis wapoti'.

³ Afa' biafa wa'i God ape'inai noloma Dembinai ape'inai Jisas Krais migiambamepago na'a monda' opalef ipe'imi mope awanem.

Pol nanifela God

⁴ Ae' anifela God la'ela'efa ipe'. Dei' main, ipe' pape la'ifipama Krais Jisas ea' God nandahomepa pape andeande'ma Anan atona.

⁵ Ipe' pape la'ifipama Krais pape andeande' endilisi ea' pefa' basef hiami pa'iami maloma gawa hianai bu'unai naninani.

⁶ Dei' main, basef amama bu'wami Kraisi afa' wawalapami mataga alihim mandawalap la'ifima opalef ipe'imi.

⁷ Ea' dei' ipe' pape ukup mohafel endilisi pehafa Dembinai ape'inai Jisas Krais anona nemaf notaga nondawalap alihina. Nemaf anama pape pehafana pefa' presen hianai Ambal Bu'unai Godi nase'epana na'a.

⁸ Jisas Krais nambimb nonda'epa ma pepe la'ifipa la'ela'ef pefe' petagama nemaf akutainai. Nemaf anama Dembinai ape'inai Jisas Krais niefi'ianai ipe' basef ofagema a'epa nemaf anama.

⁹ God nanda' amamaga ananimi hi'alam andeande' nofalepa ma pepe la'ifipa opalef etifim peloma nogalomana Ananinai Jisas Krais Dembinai ape'inai.

Amam nematawa Kristen sandawal biefis

¹⁰ Ipe' sahin owan, a'ipipa basef la'ifimi ma agel Dembinai ape'inai Jisas Krais na'ama. Ipe' pepe wambota atona endilisi pepe opalef etifim. Penda'am na'ama ma ipe' pepe andeande' opalef etifim endilisi ma ipe' ina pendawal biefipa.

¹¹ Ipe' sahin owan ae'ipei, enis epes wambota Kloei sa'ipi sa'i ipe' etipa pafitap.

¹² Ae' a'i na'ama. Ipe' hipei atona etin pa'iam na'ama. Enis sa'i, “Ape' epes Poli.” Enis sa'i, “Ape' epes Apolosi.” Ea' enis sa'i, “Ape' epes Pitai.” Ea' enis sa'i, “Ape' epes Kraisi.”

¹³ Ipe' panda'am na'ama ma main? Ipe' pa'i Krais nandawal wa'awa'ana? Ea' pa'i ae' Pol saunde lawag usi'inai tu'wanainai ma agiambamepa? Owa'etin. Ipe' ina pefa' baptaisa agel ae' Poli, owa'.

¹⁴ Ae' fowa' anda' baptaisima amam amama ipe'imi biam, Krispus naloma Gaius atom. Ae' anifela Goda ina anda' baptaisima enis epes ipe'isi wapoti', owa'.

¹⁵ Amama atom dei' enin epen ina ni'ipipa ni'i ipe' pefa' baptaisa agel ae'anai, owa'.

¹⁶ (Endilisi, anda' baptaisima esis wambota Stefanasi wapoti', ea' ae' ina okom na'i enis wapoti', owa'.)

¹⁷ Dei' main, Krais ina nasapa'e afi'ima enda' baptaisima enis epes, owa'. Anan nasapaho'ma ewalapa basef bu'wami Ananimi i'iam. Ae' ina ewalapam i'iam ila anona gawa amam gawaimi ma'ianai, owa'. Na'ama epes si'i basefa lawag usi'inai tu'wanainai Krais naga'manai si'i basef amama falafumi atom.

¹⁸ Endilisi, epes isima sape eaf higililanai, esis ukup ma'i basefa lawag anama usi'inai tu'wanainai saunda Kraisanai sa'i basef amama falafumi atom. Ea' ape' amam nematawa dei' God nape nofa'apa motanimani mogawa basef amama pepel Godi atona.

¹⁹ Si'i Baibel na'iam na'ama na'i, “Anona nemaf ae' ehambombaga gawa epes isima gawaisi. Ea' emboma ukup epes isima gawaisi sa'i nomonas mamumami hiahiami mapaisi.”

²⁰ Dei' amam gawaimi monda' mi'imama? Ea' amam gawaimi mogawa gawa hianai monda' main? Epes isima etap anae'i sa'i basef sapa'am sandahihianamam sonda' main? Owa'etin. God nanda' gawa epes isima etap anae'isi nataga falafunai si'i gawa epes isima sahaga sagaoli.

²¹ Dei' main, God Anan gawainai na'i epes etapasi ina la'ifisa sogawa Anan ma gawa anama asasinai atona, owa'. God nahopa eaf asasinai. Ea' anan okom na'i nofa'ai amam nematawa sombale'efanai sotanimani. Esis sombale'efa basef amama wa'ipasami epes etapasi sa'i wafimi gawa a'ami. Esis sembale'efa basef amama ea' God nefa'as sotanimani.

²² Esis Juda ukup maimaila siti ikwaf la'ifinai ea' esis Grik ukup ma'ima'i sofa' gawa hianai lu'unai.

²³ Ea' afa' wawalapa basefa Krais naga' lawag usi'inai tu'wanainai. Basef amama mahopa eaf esis Juda sandaiwa'mam sa'i basef awami. Ea' esis Grik ukup ma'i basef amama wafimi gawa a'ami.

²⁴ Ea' amam nematawa God nofalapai, esis Juda saloma esis Grik wapoti', basef amama ma'i Krais Anan pepel naloma gawa anama Godi.

²⁵ Dei' main, basef amama Godi epes sa'i “Gawa a'ami wafimi”, amama gawaimi atom lu'wami mikila' gawa epesi. Ea' amamaga amama epes sa'i “Awami falafumi Godi”, amama la'ifim endilisi mikila' pepel epesi.

²⁶ Alupipei ae'ipei, ipe' ata' ukup mi'i fowa' damba damba God nofalepa ma pembale'efa Krais. Ipe' hipei ina enis epes hiesi la'afena ipe' epes gawaisi ma etap anae', owa'. Owa' enis hiesi agof lu'wamisi. Owa' enis hiesi dembesi la'ifisi, owa'.

²⁷ Ea' God okom ananinai atona nandandepa enis epesa sope Ananisi etis. Epes isima etapasi sa'i gawa a'asi, ea' God nandandepas ea' ma sonda' epes gawaisi ambagof aom. Ea' epes isima etapasi hiesi sa'i falafisi owa' la'ifisi, isima God nandandepas ea' ma sonda' epes isima dembesi la'ifisi ambagof aom.

²⁸ Anan nandandepa epes isima amam nematawa etapasi sa'i owa' la'ifisi, falafisi etis agof a'asi. Anan nandandepasa nohambombaga amamaga amama moloma epes isima la'ifisi agufisi etap anai'isi.

²⁹ Nanda'am na'ama ma enis epes ina la'ifisa sefela agof asasimi atom lu'uma naep Godi, owa'.

³⁰ God nahapona ipe' pape la'ifipa paloma Krais Jisas ea' God nanda' Krais nape ofagonama gawa ape'inai. Anan atona eaf ape'inai ma God nanda'apa mope bu'upai ma naep ananimi ma mope ananipai atepa. Anan atona natalepa nakwahepa ma waf aonai ma mape wafifipa.

³¹ God nanda'am na'ama ma anom basef mail Baibeli ma'iam ma'i, “Emi egafis si'i sefela agof asasimi, esis sondanifel ama Dembinai atona.”