1 Jon 4 - Basef Buꞌwami Godi

Basef biefima Ambal Bu'unai Godi naloma ambal aonai nambaso'mami

¹ Alupipei ae'ipei, amam profet mambaso'mami mafe'agon anama etap hiagoma. Ipe' ina pembale'efa epes isima hiesi sa'i, “Ae' Ambal Bu'unai Godi napaiwei.” Owa'. Ipe' ata' pegwaloga ambagof amama hiami pendendomam ama pegawa amam mataga mafi'i Ambal Bu'unai Godi o owa'?

² Ipe' pegawa Ambal Bu'unai Godi na'ama. Emi egafis sa'i, “Endilisi, Jisas Krais nafi'i nataga epen endilisinai”, epes isima Ambal Bu'unai Godi napais opalef asasimi.

³ Ea' emi egafis owa' si'iam na'ama ma Krais, Ambal Bu'unai Godi ina nape esis, owa'. Ambal nape epes isima anan nanda' naumbih naloma Krais. Fowa' pame' basefa ambal aonai na'i nonda' naumbih noloma Kraisi nifi'i dei' nafi'i nape ea' etap anae'.

⁴ Ipe' alupipei ae'ipei, ipe' epes Godi ea' panda' wandaf paloma amam profet awami mambaso'mami pikila'am. Dei' main, Ambal Bu'unai Godi nape nomon opalef ipe'imi anan la'ifinai nikila' aman aonai nape etap anae'.

⁵ Epes isima saila waf etapanai sa'i basef etapami atom, epes etapasi sembale'efam. Dei' main, esis isima etapasi etis.

⁶ Ea' ape' epes Godi. Emi egafis sogawa God, esis seme' basef ape'imi. Ea' emi egafis owa' epes Godi, isima ina same' basef ape'imi, owa'. Ea' amama atom dei' ikwaf anama nihi'ambapa ma mogawa epes isima. I'i Ambal Bu'unai Godi endilisinai nupais, seme' basef ape'imi. Ea' i'i ambal nambaso'mami nupais, ina seme' ape', owa'.

God okom nainailapa endilisi

⁷ Ipe', ae' okom nainailipei, ape' ukup mimila sahin owan ape'isi. Dei' main, waf anama nafi'i God. Emi egafis ukup maimaila sahin owan, esis awasi Godi ea' dei' segawa God saila basef Ananimi.

⁸ Emi egafis owa' ukup mimila sahin owan, esis ina sogawa God, owa'. Dei' main, God okom nainaila epes hiesi.

⁹ God nihi'ambapa anan okom nainailapa na'ama. Anan nasapa' Nogalomana Ananinai atotona nafi'i etap anae' ma ape' mofa' ambal namunai ma Anan.

¹⁰ Basef ofagema ma God okom nainaila ape' amama. Ape' ina mali' ukup maimailana, owa'. Anan nali' okom nainailapa ea' nasapa' Nogalomana Ananinai nafi'i ma nanda' okom wandafunai Godi naga' nakwaha waf aonai ape' manda'anai.

¹¹ Ipe' alupipei, waf anama atona nihi'ambapa God okom nainailopa endilisi. Ea' ape' wapoti' ukup mimila sahin owan ape'isi endilisi.

¹² Ina enin epen nati God, owa'. I'i ape' atepa ukup mimila sahin owan ape'isi, God nope la'ifina ma ape' ea' okom ananinai nainaila ape'i atuwasi nope nolomapa opalef ape'imi nomona monda'am na'ama etin ape' ukup mimila sahin owan ape'isi.

¹³ Dei' ape' mogawa ape' mape la'ifipa maloma God ea' anan nape nalomapa. Dei' main? Anan nase'apa Ambal Bu'unai Ananinai nape nalomapa.

¹⁴ Ea' ape' mogawa Ahalomapa nasapa' Nogalomana ananinai ma nofa'ai epes hiesi sape etapi sotanimani ma anan. Ape' mati amamaga amama ma anan nofa'ai epes sotanimai ma'ipasam.

¹⁵ Emi egafis sawalapa basef alihiguma sa'i, “Endilisi, Jisas anan Nogalomana Godi”, God nape la'ifina nalomas, esis wapoti' sape la'ifisa Anan.

¹⁶ Amama atom dei' ape' mogawa mombale'efa God anan okom nainailapa endilisi. God Anan ofagonama okom nainaila epes hiesi. Emi egafis sape ukup maimaila God naloma epes hiesi la'ela'ef, esis sape la'ifis saloma God ea' Anan nape la'ifina nalomas.

¹⁷ Waf ukup maimaila esis Kristen alupusi endilisi, amama mataga bo'om endilisi ma ape' mitu la'ifipa nemaf anama lu'unai ma God nowalogapa. Dei' main, Anan napaipa nomon, ea' mape etap anae' si'i Krais nape. Ape' ina umbamahapa ma nemaf anama God nowalogapa, owa'.

¹⁸ God okom nainailapa, ape' wapoti' ukup maimailana. Ea' ina umbamahapa, owa'. I'i waf anama notaga bo'ona endilisi ma ape', anama natofa waf umbamahapamanai nowala hi'alana. Dei' main, epes umbamahasa amamaga nimanimi anona nemaf God nowalogasa waf aonai nose'asami. Emi egafis umbamahas, waf ukup maimaila God ina nataga bo'ona endilisi ma esis, ata' owa'.

¹⁹ God nali' okom nainailapa endilisi. Amama atom dei' ape' ukup maimaila anan naloma epes hiesi wapoti'.

²⁰ I'i enis epes si'i, “Ape' ukup maimaila God,” ama esis ukup wandafuma Kristen alupusi, epes isima sambaso'mami. Dei' main? Ina enin epen atitin nati God, owa'. Emi egafis sati alupusi asasisi ma owa' ukup mimilas, epes isima ina la'ifisa ukup mila God owa' seatolona naepi, owa'.

²¹ Amama Krais na'ipapam la'ifimi amama. Emi egafis ukup maimaila God, epes isima ukup mimila sahin owan asasisi wapoti'.