1 Jon 3 - Basef Buꞌwami Godi

Dei' ape' mape awasi Godi

¹ Eh! Ahalomapa God okom nainailapa endilisi. Ea' Anan nofalapa awasi ananipai. Endilisi, ape' awasi ananipai atepa. Isima sandaiwa'ma Godi sape etap anae', esis ina sogawa God, owa'. Amama atom dei' esis ina sagawa ape' wapoti'.

² Ipe' alupipei, ae' okom nainailipa. Dei' ape' mape awasi Godi. Ea' anona nemaf mope mi'imama, amama ape' ina dei' mogawam, ata' owa'. Ea' ape' mogawa anona nemaf Krais notaga alihina, nemaf anama motolona notaga nope endilisi si'i Anan nape.

³ Emi egafis sape sohafa Anan nufi'i, esis sape sandondombam opalef asasimi la'ela'ef ma sope bo'wes andeande' si'i Krais nape.

⁴ Emi egafis sanda' waf aonai, esis sosambala mi'uli Godi. Dei' main, sanda' waf aonai atona dei' satopa' mi'uli anama.

⁵ Ipe' pegawa Krais nataga ma nakwaha waf aonai ape' manda'anai hi'alana. Anan ina nanda' anona waf aonai, owa'.

⁶ Ea' emi egafis sape la'ifis saloma Anan, isima ina ata' sape saila waf aonai, owa'. I'i emi egafis saila waf aonai, ukup asisimi ina mati Krais sogawana, owa'.

⁷ Ipe' alupipei ae'ipei, pindumafuma andeande'! Na'ama enin epen nembaso'mepa. Emi egafis sanda' waf bu'unai, esis sape andeande' si'i Krais nape.

⁸ Satan nanda' waf aonai fowa' damba damba nafi'i nafi'i dei' ata' nape la'ela'ef. Emi egafis sanda' waf aonai la'ela'ef sapomanai, esis epes Satani. Nogalomana Godi nafi'i nataga nandawalapa main? Ma nohambombaga opeh Satan nanda'ami.

⁹ Emi egafis sape awasi Godi, esis ina sape sanda' waf aonai la'ela'ef, owa'. Dei' main, okom Godi nape opalef asasinai ea' esis awasi Godi. Ea' esis ina la'ifisa ata' sonda' waf aonai la'ela'ef, owa'.

¹⁰ I'i ape' mi'i mogawa epen emi egalin, nogalomana Satani o nogalomana Godi, ape' mogowas na'ama. Emi egalin owa' nanda' waf bu'unai ma owa' okom ninila alupusi ananisi, enin ina epen Godi, owa'.

Waf ukup maimaila sahin owan ape'isi atona etin

¹¹ Basef fowa' damba damba ipe' pame'ami amama. Ape' ukup mimila esis sahin owan endilisi.

¹² Ape' ina mila waf Keini, hapainai. Kein wambota aman aonai Satani ea' naha owalomana Abel naga'. Dei' maina nahana naga'? Anan kowalana ma opeh bu'wami owalomana nanda'ami dei' nahana naga'. Ea' opeh ananimi aom.

¹³ Ipe' sahin owan ae'ipei, i'i esis sape etapi sowa' alafugaha Godi sindaiwa'mepa, ipe' ina gegelelesipa, owa'.

¹⁴ Ape' ukup maimaila esis sahin owan, amama ape' mogawa dei' makwahona waf anama ga'inai mataga mofa' ambal namunai. Dei' main? Ape' ukup maimaila esis sahin owan endilisi. Emi egafis owa' ukup mimila sahin owan asasisi, esis ata' sape la'ela'ef waf ga'inai.

¹⁵ Emi egafis ukup aoma sahin owan asasisi, esis si'i saha enis amam nematawa saga'i. Ea' ipe' pegawa epes saha enis saga'i, esis ina dei' sefa' ambal namunai sapaina sope andeande' la'ela'ef, owa'etin.

¹⁶ Waf anama ape' ukup mimila enis epes mogawana na'ama. Krais nakwaha ambal ananinai ma nagiambamapa. Amama atom ape' wapoti' mokwaha ambagof ape'imi ma migiambama sahin owan ape'isi.

¹⁷ I'i emi egafis amamaga hiamisi ma siti sahin owan amamaga a'ani ma esis owa' ukup mimila sahin owan, epes isima ina ukup maimaila God, owa'. Dei' maina epes isima sa'i, “Ukup ape'imi maimaila God”? Owa', esis sambaso'am.

¹⁸ Alupipei ae'ipei, ape' ina ukup maimaila esis alupisi ma mi'ipasa basefa malogof atom wafimi, owa'. Ape' ukup mimilas endilisi migiambamas monda' waf bu'unai endilisinai mihi'ambamasana.

Epes sembale'efana endilisi, esis ina umbamahasa naep Godi, owa'. Esis la'ifis sape

¹⁹ I'i ape' monda' waf anama ma ukup mimila sahin owan ape'isi, ape' mogawa maila basef endilisimi. Waf anama nanda' opalef ape'imi awanema mope la'ifipa ma naep Godi.

²⁰ I'i basef mape opalef nomoni ma'iami ma'ipapa basef mihi'ambapa waf ape' manda'anai aona, God dembinai nikila' ukup ape'imi ea' nagawa amamaga hiami.

²¹ Alupipei ae'ipei, ae' okom nainailipa. I'i basef mape opalef nomoni ma'iami ma'ipapa basef mihi'ambapa waf ape' manda'anai ina aona, ape' mefe'ma God opalef ape'imi la'ifim.

²² I'i ape' mi'i monda' beten mohali'ana ma anom amamaga, anan nose'apami. Dei' main, ape' maila okom ananinai manda' amamaga anan nandanifel ma ape' manda'ami.

²³ Basef la'ifimi Godi ma'i na'ama ma'i ape' mombale'efa agel nogalomanai Jisas Krais ea' ukup mimila sahin owan ape'isi si'i Anan na'ipapa basef la'ifimi.

²⁴ Emi egafis saila basef Godi la'ifis, esis sope la'ifis soloma God ea' God nape la'ifina nolomas. Anan nase'apa Ambal Bu'unai Ananinai dei' mogawa God nape la'ifina nalomapa.