1 Jon 2 - Basef Buꞌwami Godi

Krais aman nagiambamapai

¹ Ipe' alupipei ae'ipei, ae' okom nainailipa, anda' basef amama mafe'mago ipe' ma ina penda' waf aonai, owa'. I'i enin epen nenda' waf aonai, enin anan niegiambamani nape. Anan Jisas Krais bo'ona andeande'. Anan nahali' Ahalomana ma nokwahoman waf aonai epen anama nanda'anai.

² Anan atona nahagofa okom wandafunai Godi naga' nakwaha waf aonai ape' manda'anai. Ea' ina nakwaha waf aonai ape' manda'anai atona, owa'. Anan nakwaha waf aonai ma epes hiesi etapasi hi'alas.

³ I'i ape' mila basef Godi la'ifipa, ape' mogawa anan endilisi.

⁴ Emi egafis sa'i, “Ape' mogawa God andeande'”, ama esis owa' sila basef Godi, esis sambaso'ami. Ea' basef endilisimi ina mape opalef asasimi, owa'.

⁵ Ea' emi egafis sila basef Ananimi, esis ukup si'im maila God endilisi. Ea' ape' mogawa ape' mape la'ifipa maloma Jisas.

⁶ Emi egafis sa'i, “Ape' mape la'ifipa maloma God”, pe asasinai notaga bo'ona si'i pe Jisas Kraisi.

Emi egafis ukup maimaila sahin owan asasisi, la'ela'ef sape nafifili

⁷ Alupipei ae'ipei, ae' okom nainailipa. Dei' ae' anda' basef amama mafe'mago ipe', ina anona mi'uli dambainai, owa'. Ae' a'ipipa mi'uli anama atona fowa'inai, fowa' damba damba pegawana. Mi'uli anama basef ipe' pame' ea'.

⁸ Basef la'ifimi ma mi'uli anama dei' anda'am mafe'mago ipe', amama dambaimi. Ea' mataga alihima Krais nailam dei' ipe' wapoti' pailam. Dei' main, owamb dei' na'i nofe' ea' nafifili endilisinai nataga nape.

⁹ Emi egafis si'i, “Ape' mape nafifili,” ama esis opalef aoma sahin owan asasisi, epes isima ata' sape owamb la'ela'ef.

¹⁰ Emi egafis ukup maimaila esis sahin owani, esis sape nafifili. Ea' epes isima ina ata' anona waf aonai napais nanda'as sowa, owa'.

¹¹ Ea' emi egafis opalef aoma sahin owan asasisi si'i naumbih, epes isima ata' sape owamb ea' safe' owamb atona sasopama naep asasimi. Ea' ina sati eaf sailana, owa'.

¹² Ipe' awasi ae'ipei, God nakwaha waf aonai ipe' panda'anai hi'alana ma agel Kraisi. Amama atom dei' anda' basef amama mafe'mago ipe'.

¹³ Ipe' ahape, ipe' pegawa aman anama andeande' fowa' damba damba nape la'ela'efi. Ea' dei' anda' basef amama mafe'mago ipe'. Ipe' awomipei, ipe' pali'amona wandaf aman aonai pikila'ana. Amama atom dei' anda' basef amama mafe'mago ipe'.

¹⁴ Ipe' awasi, ipe' pegawa Ahalomapa andeande'. Ea' dei' anda' basef amama mafe'mepago. Ipe' ahape pegawa aman anama fowa' damba damba nape nafi'i nafi'i la'ela'ef nape. Amama atom dei' anda' basef amama mafe'mepago. Ea' ipe' awomipei, ipe' la'ifipei ma penda' waf bu'unai. Ea' basef Godi dei' mape nomon opalef ipe'imi. Ipe' pali'amona wandafa aman aonai pikila'ana.

Ape' ina ukup mimila waf etapanai, hapainai

¹⁵ Ipe' ina ukup mimila waf etapanai o anom amamaga awami mape etapi, owa'. I'i ipe' ukup mimila waf aonai etapanai, ipe' ina ukup maimaila Ahalomapa, owa'.

¹⁶ Ape' mogawa epes saloma amamaga hiami mape etapi amama na'ama. Amamaga amama opalef apimi mohafemami maloma epes saloma amamaga amama epes satolom opalef kowalasami maloma amamaga amama enis satilis safela agof lu'umami, amamaga amama ina mafi'i Ahalomapa, owa'. Amama mataga etap anae'.

¹⁷ Waf etapanai naloma amamaga hiami epes ukup mohafemami anona nemaf hegililam, ea' emi egafis saila basefa okom Godi, epes isima sape la'ela'ef hihif.

Naumbih Kraisi mataga ea'

¹⁸ Ipe' alupipei ae'ipei, ae' okom maimailipa, dei' nemaf na'i hi'ilana. Fowa' ipe' pame' basefa naumbih Kraisi ma'i motaga. Ea' dei' naumbih Ananimi hiami mataga ea'. Ape' mogawa dei' nogota na'i hi'ilana.

¹⁹ Enis epes sakwaha ape' ea'. Fowa' epes isima ina ape'isi endilisi, owa'. I'i ape'isi endilisi, esis sope solomapa la'ela'ef. Owa'. Esis sakwahepa ea'. Amama atom dei' ape' mogawas andeande', epes isima hiesi ina epes ape'isi, owa'.

²⁰ Ea' ipe' Krais nase'epa Ambal Bu'unai Godi ea'. Dei' ipe' hipei pegawa basef endilisimi.

²¹ Ipe' ina pelolama basef amama endilisimi ma dei' enda'mepago basef amama, owa'. Ipe' pegawam. Ea' pegawa basef baso'maimi ina mawalapa basef amama endilisimi, owa'. Amama atom dei' anda'ago basef amama ma ipe'.

²² Aman nambaso'masi anan emi? Anan aman anama nambaso'mas na'i Jisas ina Krais, God nasapa'ana nafi'i, owa'. Aman anama naumbih Kraisi. Anan nowa' alafugama Ahalomapa naloma Nogalomana wapoti'.

²³ Emi egafis sowa' alafugaha Nogalomanai, esis sowa' alafugaha Ahalomana wapoti'. Ea' emi egafis saso' opalefa Nogalomanai, Ahalomapa nape nomona opalef asasimi.

Ambal Bu'unai Godi nawalipapa basef endilisimi

²⁴ Basef amama fowa' damba damba ipe' pame'ami, amama hapilam opalef ipe'imi la'ifipa. I'i ipe' pembale'efa basef amama pali' pame'ami opalef ipe'imi la'ifipa, ipe' pepe la'ifipa peloma Jisas Nogalomana Godi noloma Ahalomana mope la'ela'ef molomepa.

²⁵ Krais na'ipapa basef endilisimi la'ifimi, Anan anona nemaf nose'apa ambal namunai mope andeande' la'ela'ef.

²⁶ Ae' anda' basef amama mafe'mago ipe' awalapa waf epes isima sa'i seambaso'mipei.

²⁷ Ea' ipe', Krais nase'epa Ambal Bu'unai Ananinai. Ea' Ambal Ananinai nape nalomepa opalef ipe'imi nomon. Amama atom dei' ipe' ina gawa a'epa ma enin epen newalipipa, owa'. Ambal Bu'unai Kraisi nawalipapa ma amamaga hiami ina nambaso'mapa, owa'. Dei' ipe' pembale'efa Krais pape la'ifipa paloma anan.

²⁸ Ipe' awasi ae'ipei, ae' okom nainailipa a'i pepe la'ifipa peloma Anan ama anona nemaf notaga nondawalap, ape' ina ambagof aom, owa'. Ape' mitu la'ifipa ma naep Ananimi.

²⁹ Ipe' pegawa Krais Anan bu'unai andeande' endilisi. Ea' pegawa anom basef wapoti', emi egafis saila waf bu'unai andeande', esis awasi Godi.