1 Jon 1 - Basef Buꞌwami Godi

Basef ambal namunai napaimi

¹ Afa' wanda' basef amama ma anona aman agilinama Basef anan nase'apa ambal namunai napaipai. Aman anama fowa' gani damba damba nape. Afa' wame' basef ananimi watolona naep mahapilana lagof afa'imi.

² Ambal anama namunai nataga ea' afa' watolona naep afa'imi. Amama atom dei' afa' wawalipipa ma ambal anama nape la'ela'efi. Ambal anama fowa' nape naloma Ahalomapa dei' nataga alihina watolona.

³ Amamaga amama afa' watolom wame'ami dei' wa'ipipam ipe' wapoti' ma pepe ukup etifim pelomafa. Afa' wape wambota atona waloma Ahalomafa naloma Nogalomana ananinai Jisas Krais.

⁴ Afa' wanda' basef amama ma anona nemaf danifel ape'inai notaga lu'una ma ape'.

God anan nafifili nanda' waf bu'unai atona

⁵ Basef amama afa' wame'ama anan na'ama. God anan nafifili afitinai. Ina anona owamb nailana, owa'.

⁶ I'i ape' mi'i mope ukup etifim molomana, ama ape' ata' mape manda' waf aonai si'i mape owamb atona, ape' mambaso'ma ape' atepa ma basef ape'imi maloma fe' ape'inai.

⁷ Anan nafifili afitinai. I'i mope mififil si'i anan waf aonai a'apa, ea' mope ukup etifim moloma sahin owan hiesi. Jisas Nogalomana Godi. Ea' esimbel ananimi masa'opa waf aonai ape' manda'anai hianai hi'alana mataga bo'opa.

⁸ I'i ape' mi'i waf aonai a'apa, ape' mambaso'ma ape' atepa ea' basef endilisimi ina mapaipa, owa'.

⁹ I'i ape' mowalapa waf aonai ape' manda'anai alihina, atuwasi Anan nokwahomapa waf hianai aonai ape' manda'anai nosa'opapa motaga bo'opa andeande'. Basef fowa' na'i endilisimi atom nonda' waf bu'unai andeande'.

¹⁰ I'i ape' mi'i, “Ape' owa' monda' waf aonai”, ape' mofala God ma'i anan aman na'i basef baso'maimi. Ea' basef ananimi ina mape opalef ape'imi, owa'.