Wïlöölö 48 - Wëël Jwøk

Kanya Ö Jeekapi Na Gwïëth Wäät Jocep

¹ 'Ba na tïme na køør manøgøøni acaan jï Jocep, ni «Wäru tuu døc.» Ni ö Jocepi ni lwør wääte riet na näk Maneeca ki Ipariem, ni put aay ki geni.

² Kanyøgøøni acaan jï Jeekap, ni «Wäädï ma Jocep aö baŋï.» Køøre Icriel dëëre anithïk, ni ö maal ni bëëde bäät pëëm.

³ Ni kö Jeekapi jï Jocep, «Jwøk na en teeki jïre ree anyoodhe jïra yi Löja yi ŋööm Keenan ni gwïëth aani,

⁴ ni kööe jïra, ‹Ïïno tïïa niï kännï ki nyïëdi, ni nyaayï, ni tïmï na lwaa wï jur, ni cïba ŋööm Keenan jïge, ge na nyïïkwaayï moo ööi køørï, ni tïm ŋöömö na marge na bäre bäre.›

⁵ «'Ba kawaane Maneeca ki Ipariem na näk wäätï moa nywølï yi ŋööm Ijep kanya pooda naa poot kär ö baŋï Ijep, gena 'moa. Geno tïmö na 'moa kaamar wääta ma Ruben ge ki Cimien.

⁶ 'Ba moo cäŋï nywøllø køørge, beege moï geni. Ni ŋöömö mano dööŋ jïge na marge ojootge ki køør Maneeca ki Ipariem.

⁷ Kiper kanya ööa ki yi Padan, kanya poode ni piny poot bäär mëëth naa poot kär pïï Eeparata, meru ma Reecal athøø buuta øtjöö yi ŋööm Keenan, ni koonya gø kaace øtjöör Eeparata, paana cwøl ni Bethelem.»

⁸ 'Ba kanya ö Icrielli na joot wäät Jocep, ena köö, ni «?Moi aŋaani?»

⁹ Ni kö Jocepi jï wänni, «Beege wääta moa cïp Jwøki jïra kany.» Ni kö Icrielli, «Beerra man kälï geni baŋa, kiper nee geni gwïëdha.»

¹⁰ 'Ba kar kanyøgøøni nyeŋ Icriel onø tïmö ni rääbö, ni eni ba rääŋö ni beer. Ni ö Jocepi ni käl wääte kany mo cään ki wänni, ni ö eni ni nuum dhøkge ni gääm geni.

¹¹ Ni kö Icrielli jï Jocep, «Aani kära caarø ni täärnyïmï jooda joodø, 'ba ennø Jwøk aana käle ki man jooda wäätï thuwø.»

¹² Køøre Jocep wääte adaae bäät cøŋ wänni, ni kuul wïïe piny nyïm gø.

¹³ Ni lwør wääte riet ni käl geni buut wänni, ni Ipariem ena bäät cer cwïïe kuna dïët ki bäät caam Icriel, ni ö Maneeca ni en bäät caame kuna dïët ki bäät cer cwïï Icriel.

¹⁴ 'Ba Icriel ceŋŋe agwäye ni rwaak cere mana näk cwïïe ni cïp gø bäät wï Ipariem ŋata thiinh, ni cïp caame bäät wï Maneeca, këël na bëëde ni Maneeca beeye kaa.

¹⁵ Ni ö eni ni gwïëth Jocep ni kööe, «Jwøa cääth kwara ma Eeberam ki wära ma Aydhak køøre, Jwøa bwøth aani ki yïth nïne bëët këël dïcäŋi en,

¹⁶ na näk nyïïatwiella køny aani yïth gïïa reyø bëët, beerra man gwïëth obwöre moi, ni bëët nyeŋŋa ki nyeŋ kwara ma Eeberam ki nyeŋ wära ma Aydhak ni di cwølø ki køørge, ni tïmge ni thööth na lwaak mo päl dï piny bäre.»

¹⁷ 'Ba kanya ö Jocepi na neen wänni ni cere mana näk cwïïe ee cïp bäät wï Ipariem, yie atïmö ni ba met ki gø; ni mak cer wänni kiper nee daae wï Ipariem nee kïth wï Maneeca.

¹⁸ Ni kö Jocepi jï wänni, «Manøgø paa kare Awuuö, kiper Maneeca beeye kaa. Cïp cer cwïïï bäät wïïe.»

¹⁹ 'Ba wänni akweer ni kööe, «Ŋääa, wääda. Ŋääa ni Maneeca beeye kaa. Eni thuwø tïmö na lwaak mo dwøŋ; 'ba coki mana thiinh en otïmö ni dwøŋŋa eni, ni tïm nyïïkwaaye na lwaa jiy mo thööth.»

²⁰ Køøre gena gwïëdhe dïcäŋögø, ni kööe, «Jø Icriel ogwëëth rou ni köge, ni ‹Jwøk uuno tïïe kaamar Ipariem ki Maneeca.› » Ki køør manøgøøni Icriel Ipariem atïïe ni ena nyïm ki Maneeca.

²¹ Køøre Icriel aköö jï Jocep, «Ennø, kara aløny ni cään ki man thøøa, 'ba Jwøk obëëdö buutï, ni cäŋ ïïni dwøk yi ŋööm kwäyu.

²² 'Ba ŋöömö mana lwøra ri leny baŋ jø Amör acïba jïrï ni kaala mana cïba jï uutwäru.»