Wïlöölö 44 - Wëël Jwøk

Kanya Ö Jocepi Na Päär Uutwänni Ki Ri Ogubayu

¹ Køøre Jocep nyikeenø aköömme ni kööe, ni «Pääŋ opïri mo jøøgø ki beel moo rømø ki tëër marge, ni dwøgï gwet ŋati man nø dho opïr mare,

² ni kïthï ogubanynya näk mara mana näk tïïc ka warkey dho opïr nyilaal mana thiinh ki gwel mo beel moe.» Ni ö nyikeenø ni tïïc gïnögøøni kaa mana caani ya Jocepi jïre.

³ 'Ba na tïme na aruunnø, jøøgø awëëk wääth, ni aacge ka arëëni moge.

⁴ 'Ba na nø aacge ni karge poot cään mëëth ki paac, Jocep aköö jï nyikeenø, ni «Ci läp køør jøøgø; noo magï geni, kööï jïge, na ‹?Aŋø ni tïïyu gïn mo raac na kar gïna beer na tïïc jïïu en?

⁵ ?Aŋø, ogubanynyøgø na kwallu enø, paa gïn wø mäth kwääya ki gøøni, ni beeye gïn wø køny gøøni ki man ŋec gïï mo poot ena nyïm? Uuna bääyö døc ki gïna tïïyu enøgø.› »

⁶ 'Ba kanya reŋ køørge, gena maae, ni caan luummögø jïge.

⁷ Ni köge jïre, «?Aperŋø na ö kwääcwa na caan teeŋ luummögø? Laaŋe moï teeŋ gïnögø ba dïge tïïö.

⁸ Neenï, gweta jootwa dhøk opïri mowa aduuwa baŋu ki yi ŋööm Keenan. ?Warkey a dewa gø kwalø nidïï yi øt kwääyï?

⁹ 'Ba dï laagï bëët, ŋato jootï gø baŋe, wär eni thøøe, ni tïmwa ni waana laak kwääcwa.»

¹⁰ Ni köö nyikeenø, «Beerra man tïme kaawat mana caannu enøgø; ŋato joot gïnögø baŋe otïmö na laŋŋa, 'ba u bëët bäŋ ajäla bäätu.»

¹¹ Køøre opïri moge alaarge øl piny, ni ö ŋati man nø ni jap opïr mare.

¹² Ni ö nyikeenø ni määnye ni tägi ka jøøa døøŋŋø ni päth baŋ moa therø. Ni joot ogubayu yo opïr Benjamen.

¹³ Køøre abïïe moge aputge jeeyø, ni ö ŋati man nø ni kïth opïr mare bäät arëëne ni døøge pääny.

¹⁴ 'Ba na pïïc Juuda ki uutwänni yi øt Jocep, Jocep ki dëëre poot nutö kaace, ni ö geni ni päthge piny nyïme.

¹⁵ Ni kö Jocepi jïge, na «?Agïnaŋø na tïïyu en? ?Aŋø, kuyu ni aana dhaanhø mo løny jïre ki man ŋäc gïrpiny mo tïïc no okanø?»

¹⁶ Ni kö Juuda, na «?Agïnaŋø noo caanwa këët jï kwääcwa? ?Waano loopwa ŋø? ?Rewa owaanywa gø nidïï? Kiper Jwøk bääyö mar laaŋe moï ee nø joot. 'Ba ennø waani bëët ki ŋata joot ogubayu cere waano tïmö na laak kwääcwa.»

¹⁷ 'Ba Jocep aköö, «Manøgøøni ba doo løny jïra ki man tïïa gø. Ŋata joot ogubayu cere keere beeye noo tïïa na laŋŋa. 'Ba uuni bëët, cou baŋ wääu ki met ec.»

¹⁸ Køøre Juuda anyiik buut Jocep, ni kööe, «Wui, kwäärö, a kwaya ïïni, wec aani na näk laŋŋï nee dwøra caana jïrï, ni ba gootï ki aani, kiper ïïni ï caala Peerø ki dëëre.

¹⁹ Ï na kwäärö, waani na laaŋe moï, waana pëënynyï ni kööï, ni ‹?Jïïu da wääu, wala owääu?›

²⁰ Ni caanwa gø jïrï, ni ‹Wääwa dagø ma jaal, ko owääwa mo thiinh ma aŋuudö; 'ba coki athøw, ni bee eni keere na dööŋ jï menni; ni wänni mëër ki gø døc.›

²¹ «Køøre ïïna köö jï laaŋe moï, ni ‹Kälu eni baŋa kany kiper nee eni jooda.›

²² Ni caanwa gø jï kwääcwa, ni ‹Nyilaal ba løny ki man aae buut wänni, kiper ni näk mo aay buut wänni, wänni thøw.›

²³ Køøre ïïna köö jï laaŋe moï, ‹Ni näk owääu mana thiinh ba öö kany ki uuni, uuni täärnyïma ba dou neenø këët.›

²⁴ 'Ba na døøwa baŋ laŋŋï ma wääwa, luubö mana caanï, ï na kwäärö, acaanwa jïre.

²⁵ «'Ba na kö wääwa, ni ‹Cou, døøu Ijep ni ŋëëwu ki cam mo thiinh jïïø,›

²⁶ waana köö jïre, ni ‹Wa ba cii këët. 'Ba ni näk mo owääwa mana thiinh aay ki waani, waani wa cøø. Kiper ni näk owääwa mana thiinh ba aay ki waani, täärnyïm nyenøce ba løny ki man neenwa gø.›

²⁷ «Køøre laŋŋï ma wääwa aköö jïwa, ni ‹Ŋäyu no obwöre ariiø keerge na nywølwa ki cïïa;

²⁸ maya aay buuta ni kära eni joodø këët këël kawaane; ni mana ŋääa kipere beeye ni eno cööt lääyi na thäŋi møn.

²⁹ Ni näk coki källu kälö thuwø buuta, ni päth gïn mo lethi bääte, a ni wïïa da lwaar en, a puta tïmö naa thuunhnha uuni, ni thøøa naa kïmmö.›

³⁰ «'Ba ennø ni näk aano døø baŋ laŋŋï ma wära, ni nyilaal kär døøk ki waani, køøre nø, kaawat man bëëde ni kwøw mare ena ri nut nyilaal mare,

³¹ noo joot gø ni nyilaal kär öö ki waani, eni puta thøø, ni ö wääwa na näk wïïe da lwaar ni put thuunh waani, ni thøøe ni kïmmö.

³² Aani na laŋŋï, aana tïmö na waaci mar nyilaal jï wära, ni kööa, ni ‹Ni näk eni ba duua baŋï, ajäla otïmö ni ena bääta nyïmï na bäre bäre.›

³³ «'Ba kawaane ennø a kwaya ïïni, beerra man tïma ni aana laŋ kwääya na kar nyilaal, ni weyï eni nee aae ki uutwänni.

³⁴ ?Kiper aano døøa baŋ wära nidïï ni näk nyilaal tøør buuta? Aana lwäyö kiper gïna raac mano neena noo tägi dëër wära.»