Wïlöölö 43 - Wëël Jwøk

Kanya Ö Uutwää Jocepi Na Cäŋge Døø Ijep

¹ Køøre meel atïmö ni dwøŋ døc paac.

² 'Ba na thöörge beel moa kälge ki Ijep, wääge aköö jïge, «Cou, cäŋu døø kuna ŋëëwu ki beel mo nøk kiper nøø jïtö ki cam.»

³ 'Ba Juuda aköö jïre, «Nyenøce waana ceme døc kiree, ni kööe, ni ‹Täärnyïma ba neennu ni näk owääu ba ööi ki uuni ciel.›

⁴ Ni näk owääwa jääŋŋï jääŋŋö ki waani ciel, wa doo cøø ni ŋëëmwa ïïni ki cam.

⁵ 'Ba ni näk eni ba jääŋŋï, wa ba ci kunöce. Kiper acaan nyenøce jïwa, ni ‹Täärnyïma ba neennu ni näk owääu ba ööi ki uuni ciel.› »

⁶ Køøre Icriel aköö, na «?Aŋø na tïïyu gïn ni raac dëëra en? Aperŋø na caannu gø jï nyenøce ni da owääu mør mo odööŋ en?»

⁷ Ni løkge gø jïre, ni «Nyenøce waana tete døc ki bëëtwa ki tuuŋwa. Ni kööe, ni ‹?Wääu poot kwøw? ?Jïïu da owääu mør?› Ni moa løkwa jïre beeye kiper pïëc moøgø moa pëëny waani ki ge. ?Aŋø, ŋäcwa këët ni eni köö, ni ‹Kälu owääu pööthi?› »

⁸ Ni kö Juuda jï wänni ma Icriel, ni «Beerra man jääŋŋï nyilaal ki aani, nee wa ciwa, kiper nee waani ki ïïni ko obwöre mowa nee ø kwøø nøø ba thøø.

⁹ Aani ki dëëra, aano tïmö na waaci kipere; ni tïm luumme ni ena bääta. Ni näk eni ba duua baŋï ni ba cïba gø jïrï, køøre ajäla oen bääta na bäre bäre.

¹⁰ Doo naa wa kär ruu kawaane ennø, doo naa waano nø jïtö ki kwör wäädhi ariiø.»

¹¹ Køøre wääge ma Icriel aköö jïge, «Ni näk ma enøgønø, tïïyu gïn. Lwötu ki gïï mo perge leth dï paac kany, teeŋ ka riie mo ŋwääi ni met, ki nyïïjenni mo beyø mo di camø, ki maar kïc mo thiinh, ni kïthu ge yïth opïri mou, ni kääru ge na muuce jï nyenøce.

¹² Käädu ki gwel mo thööth mo orømø, ni dwøgu gwel moa duuö na en dhøk opïri mou, kiper kanymør ööi ni kuc.

¹³ Lwørru owääu thuwø ni ööu maal ni aayu, ni døøu baŋ nyenøce.

¹⁴ Beerra man ö Jwøki na en teeki jïre ni døøc yi nyenøce mo met ki uuni kiper nee owääu ma Cimien jääŋŋe ki uuni ki Benjamen na aciel. 'Ba ni näk wääta othøw, aano tïmö naa bëëdö ka bëët ränynyö jaak.»

¹⁵ Køøre geni muuce ki gwel mo thööth alwørge, ni kälge Benjamen, ni tïŋge ni cige Ijep, ni cuŋge nyïm Jocep.

¹⁶ Kanya ö Jocepi na joot Benjamen ni ena dïge, ena köö jï nyikeenø mare, «Kïthu jøøgø paac ni ŋaallu dhieŋ ni jiiŋŋu cam kiper nee wa cämwa ki cam waŋcäŋ ki geni.»

¹⁷ Ni ö nyenøgø ni tïïc gïnögø kaa mana caani ya Jocepi jïre, ni kïth jøøgø po Jocep.

¹⁸ 'Ba jøøgø gena lwäyö kiper na kïth geni po Jocep, ni köge, ni «Kanymør per gwel wän, na näk odwøk yïth opïri 'moø dïkwøŋ, ni beeye tiere na käl øøni kany; ni eni manynya man kïth luubö mør bäätø, nee ø tïïe ni øøna laaŋe moe, ni cam arëëni 'moø ni tïmge na moe.»

¹⁹ Køøre gena ci baŋ nyikeenø mar po Jocep, ni cäänge ki gø dhi øtø.

²⁰ Ni köge, «Wui, Kwäärö, waana ö kany dïkwøŋ kun ŋëëmwa ki cam.

²¹ 'Ba kanya døøkwa na pïïcwa kanya butwa yie, opïri mowa ajapwa, ni ö ŋati man nø ni joot gwete dho opïr mare, ni gwetwa päŋ karge; 'ba ennø gwetøgø aduuwa.

²² Ni waano kuunnö ki gwel møøk thuwø, nee wa ŋëëwa ki cam. Kucwa këët nø ŋata dwøk gwel mowa yïth opïri mowa.»

²³ Ni løk gø jïge, «Cïbu cwïnynyu piny; käru lwäyö; Jwøu na näk Jwø wääu beeye na cïp kwär manøgøøni jïïu ni dwøk gwetu yïth opïri mou. Aani gwetu alwøra.» Køøre Cimien akäl wøk baŋge.

²⁴ Ni ö nyenøgø ni kïth jøøgø po Jocep ni mooc geni ki pïï, ni lwøkge tietge; ni ö eni ni mooc arëëni moge ki cam.

²⁵ Køøre geni muuce ajiiŋge kiper ööny Jocep ki waŋcäŋ, kiper awïnyge ni geni cämö ki cam waŋcäŋ kaace.

²⁶ Kanya ö Jocepi paayø, geni muuce moa kälge jïre akälge baŋe paac, ni kuulge wïthge piny nyïme ni määthge gø.

²⁷ Ni ö eni ni määth geni ni pëëny jööt dëël marge; ni kööe, «?Wääu dëëre jööt, jaara dwøŋ na cäänu kipere? ?Eni poot kwøw?»

²⁸ Ni köge jïre, «Laŋŋï ma wääwa dëëre jööt; eni poot kwøw.» Ni kuulge wïthge piny nyïme ni wøørge gø.

²⁹ Ni ö Jocepi ni lwïthe ni joot coki ma Benjamen, na näk miige aciel ki gø, ni kööe, ni «?Man beeye owääu mana thiinh, ŋata gïre caannu jïra? Met ec mar Jwøk oen bäätï, wääda.»

³⁰ Køøre Jocep cwïnye apädhö ki gïr coki, ni laar ci kuna many kany jwöŋe yie. Ni ci yi thääŋ øtø maya ni jwöŋe kaace.

³¹ Køøre täärnyïme alwøe ni duu wøk baŋge, ni mak cwïnye ni kööe, «Jiiŋŋu cam ni kälu gø nyïmwa nø.»

³² Ni jiiŋge cam kipere keere, ni jiiŋge mar jøøgø kur keere, ni jiiŋge mar jø Ijep moo cämö ki eni ciel kur keere; kiper jø Ijep ba cämö ki cam ki jø Ibaru, kiper ki man cämge na aciel beeye gïn mo raac døc ki baŋ jø Ijep.

³³ Køøre uutwänni apï piny nyïme, ni ŋati man nø pïïa kare kanya näk ocaanø jïre, ni tägi ki ŋata dwøŋ këël mana këët ri ŋata thiinh. Ni ö geni ni neetge nyeŋge, ni yïthge othäŋŋö.

³⁴ Ni ö Jocepi ni pääŋ cam mana en nyïme jïge, 'ba cam mar Benjamen apöödhö kwöre abïïc ni kaala moge bëët, ni ö geni ni cämge ni mäthge ki eni na aciel ni yïthge met.