Wïlöölö 42 - Wëël JwøkKanya Ö Uutwää Jocepi Na Ŋëëwge Ki Caammi Ijep 1 'Ba na wïnynyi ya Jeekapi ni Ijep yie da beel, ena köö jï wääte, na «?Aŋø ni raŋŋu nyeŋŋu jaak en?» 2 Ni ö eni ni kööe, «Kawaane awïnynya ni da beel Ijep. Cou kunöce nou ŋëëu ki beel kiperø, kiper nee ø kwøø nøø ba thøø.» 3 Køøre uutwää Jocep karge paari gena ci kunöce kuna ŋëëwge ki beel Ijep. 4 'Ba Benjamen cok Jocepi kär jääŋ Jeekapi ki uutwänni, kiper ena lwäyö ni kanymør da gïn mo raac mo tägö dëëre. 5 Køøre wäät Icriel alöömmö ki jø møøk, ni öge Ijep kuna ŋëëmge ki beel, kiper meel atïmö ni dagø poge Keenan. 6 'Ba Jocep beeye ŋata näk kwäärö Ijep, ni bee eni na en ŋïëwi cere mo beel kiper jø mïëri bëët. Kanyøgø uutwänni aö baŋe ni kuulge wïthge piny nyïme ni määthge gø. 7 Ni ö Jocepi ni neen uutwänni, ni ŋec geni, 'ba eni gena neene kaamar jiy mo kuue, ni cääne ki geni ki luup mo teek ni kööe, «?U kälu kaa cøøn?» Ni köge, «Wa käla powa Keenan ni wa ŋëëmmö ki cam.» 8 Kanyøgø Jocep uutwänni aŋiie, 'ba eni kär ŋec uutwänni. 9 Ni ö Jocepi ni par wïïe ki lääk moe moa läge kiperge; ni kööe jïge, «Uuna ö kany ni uuna dïlëëwe, nou ööi kiper nee jäk mar paac neennu.» 10 Ni løkge gø jïre, «Jïwa bäyö, Kwäärö; wa na laaŋe moï, waana ö kany kiper ŋïëw ki beel. 11 Waana wäät dhaanhø aciel, ni waana jiy mo caana adïëri, ni waani na laaŋe moï, wa patha dïlëëwe.» 12 Ni kö Jocepi jïge, «Jïre bäär. Uuna öö kiper nee jäk mar paac neennu.» 13 Ni løkge gø jïre, «Wa na laaŋe moï, waana uutwëëe apaar kurriiø. Ni waana wäät dhaanhø aciel mo ena yi ŋööm Keenan. Ni mana thiinh odööŋ buut wääwa, 'ba aciel tøørø.» 14 Ni kö Jocepi jïge, «Kaa mana caana gø jïïu, uuna dïlëëwe.» 15 'Ba Jocep akööŋ ri Peerø ni kööe, «U di päänynyö na ennø. Ni näk owääu mana thiinh ba ö kany, u ba doo aay kany. 16 Jäägu ki dhaanhø aciel rou nee owääu käle. 'Ba jøw odööŋ rou bëëdö øt twöc, kiper nee gïru joot ki man näk maru adïëri wala patha adïëri. Aana kööŋ ŋëët Peerø ni ni näk gïna caannu patha adïëri, uuna dïlëëwe.» 17 Ni ö eni ni kïth geni øt twöc ki nïne adäk. 18 'Ba na tïme na dää nïne Jocep aköö jïge, «Kiper nou kwøw, tïïyu gïn noo caana jïïu en, kiper aani a lwäär ki Jwøk. 19 Ni näk uuna jiy mo maru adïëri, beerra man dööŋ dhaanhø acielli dïïu øt twöc, ni cou kuna källu beel jï tuuŋu kiper käc. 20 Ni kälu owääu mana thiinh baŋa, kiper nee ŋäc ni maru adïëri; køøre u ba thøw.» Ni ö geni ni tïïcge mana caan jïge. 21 Køøre gena cäänö yïthakicge keerge, ni köge, «Øøna bääyö dëër owääø, kiper can mare ajoodø, 'ba ïthø kärø ciiø ki kwac mare, ni beeye tiere ni tïme ni gïï mo leth tägö dëëtø en.» 22 Ni kö Rubenni jïge, «?Aŋø, kära caanø jïïu ni käru bääyö dëër nyilaal? 'Ba mara käru wïnynyö. Neennu, kawaane ennø, ajäl remme aö bäätø.» 23 'Ba kucge ni luupge wïnyö jï Jocep, kiper da dïdwök luup buutge. 24 Køøre ena aa kur keere buutge ni jwöŋe. Ni duu baŋge ni cääne ki geni. Ni lwør Cimien ni twöc gø nyïmge. Kanya Ö Uutwää Jocepi Na Døøge Keenan 25 Kanyøgø Jocep acïpö ki dwøl nee opïri moge pääŋ ki beel, ni dwøk gwet ŋati man nø yo opïr mare, ni cïp cam kiper wääth marge. Ni ö gïïögø ni tïï kiperge. 26 Køøre geni opïri mo beel akïthge bäät arëëni moge ni tïŋge. 27 Ba na ö dhaanhø acielli dïge na jap opïr mare kanya butge yie, ni mooya arëën mare ki cam, eni gwel moe ajoode dho opïr mare. 28 Ni kööe jï nyïïmenni, «Gwel 'moa aduui jïra. Nutö cøøn ennø dho opïr mara.» Kanyøgø cwïnyge apädhö ni tïm dëëtge ni kwanynyi, ni cäänge yïthakicge keerge ni köge, «?Agïnaŋø na tïïc Jwøki dëëtø en?» 29 Køøre gena öö baŋ wääge ma Jeekap yi Keenan ni caange jammi bëët jïre moa tägö dëëtge, ni köge, 30 «Nyen mør ma wää ŋøømmi acäänö ki waani ki luubö mo teek døc, ni kööe ni wa cii ni wa liewa poge. 31 'Ba waana köö jïre, ‹Waana jiy jaak, ni wa paa dïlëëwe. 32 Waana uutwëëe ma apaar kurriiø ni waana wäät dhaanhø aciel bëët. 'Ba aciel tøørø, ni mana thiinh beeye no odööŋ ki wääwa yi ŋööm Keenan.› 33 «Køøre nyenøgø na wää ŋøømmi enø aköö jïwa, ni ‹Ki ri gïn nø, u ŋääa ŋääö ni uuna jiy mo marge adïëri. Wiiu owääu aciel buuta kany, ni aayu ni källu beel jï tuuŋu kiper käc. 34 Ni kälu owääu mana thiinh baŋa. Køør manøgøøni nø, u ŋääa ŋääö ni uuna jiy mo paa dïlëëwe, ni puta gø ŋäc ni uuna jiy mo marge adïëri. Køøre owääu päda pädö, ni tïmu nou gädhö yi ŋöömmi.› » 35 'Ba kanya kønyge opïri moge, ŋati man nø gwel moe ajoode yo opïr mare, 'ba na neenge gwel, geni ki wääge bëët, gena put lwäyö døc. 36 Ni kö wääge ma Jeekap jïge, «Uuni nyïïa athöörru buuta. Jocep aløny ni tøør, ni Cimien tøør thuwø. 'Ba kawaane ennø, u manynya man källu Benjamen. Gïïögø bëët na tägö dëëra beege gïï mo leth.» 37 Køøre Ruben aköö jï wänni, «Beerra man cïpï Benjamen jïra. Ni näk mo eni ba duua baŋï, wär wääta karge riet 'nägï. Eni duua duuö jïrï møn.» 38 'Ba Jeekap aköö, «Wääda ba doo aay ki uuni, kiper coki anø thøw, ni bee eni keere na dööŋ. Ni näk da gïn mo leth mo tägö dëëre kanyo aayu ki gø, a na wïïa da lwaar a puta tïmö naa thuunhnha uuni, ni thøøa naa kïmmö.» |
© The Bible Society of Ethiopia
Bible Society of Ethiopia