Wïlöölö 4 - Wëël Jwøk

Luum Keen Ki Eebel

¹ Køøre Adam aci baŋ cïïe ma Iip, ni jït yie ki dhaanhø ni nywøl Keen, ni kö Iipi, ni «Aana jïtö ki nyilaal ma dïcwøø ki baŋ Wuuö Jwøk.»

² Ni cäŋ coki ma Eebel nywøllø. Ni ö Eebelli ni tïme na dïkwääc dïëk. 'Ba Keen atïmö na ŋat puur.

³ Kar kanyøgø Keen akännö ki caammi moa ciek na puure ni cïp gø na muuce jï Wuuö Jwøk.

⁴ Ni ö Eebelli ni känne ki kure røk rïŋ moa beyø mo kaai mo dïëk moe. Ni ö Wuuö Jwøki ni jïëc mar Eebel ko olämme moe.

⁵ 'Ba mar Keen ki muuce moe käre jïëö. Køøre Keen agootø døc ni tïm täärnyïme ni cøl.

⁶ 'Ba Wuuö Jwøk aköö jï Keen, «?Aperŋø ni gootï en? ?Aperŋø na tïm täärnyïmï ni cøl?

⁷ ?Aŋø, ni näk mo marï beer, täärnyïmï ba doo bëëdö ni leer? 'Ba ni näk mo marï ba beer, raay bëëdö no omøør piny dhi øtø marï; ni manynya ïïni. 'Ba gïna diï tïïö beeye ki man böötï gø.»

⁸ Køøre Keen acäänö ki coki ma Eebel nee cige yi pwödhö. 'Ba kanya enge yi pwödhö, Keen aö maal ni 'näk coki ma Eebel.

⁹ Køøre Wuuö Jwøk aköö jï Keen, «?Coku ma Eebel en kaa ŋø?» Ni kö Keenni, «?Aŋø, ŋääa? ?Aŋø, beeye aani na dïkuri mar coka?»

¹⁰ Ni kö Wuuö Jwøki, na «?Agïnaŋø na tïïyï enø? Dwør rem coku ajwöŋ baŋa ki tiet ŋøøm piny.

¹¹ Ennø ïïna cien bäät ŋøøm, ni beeye ŋøøpa øc rem coku piny yie mana kønynyï piny ki cerï.

¹² Kany wäro puurï ŋøøm, bäŋ gïn mo ciek yie jïrï na bäre. Ïïno tïmö na ŋat mo thääyö mo wïïrö jaak bäät piny.»

¹³ Ni kö Keenni jï Wuuö Jwøk, na «Ajäla manøgø kee dwøŋ døc kiree kipera.

¹⁴ Neenï, ennø dïcäŋi en aana riemï wøk yïth ŋøøm; ni bëëda naa ba en buutï këët. Ni tïma ni aana dhaanhø maa thääyö jaak mo wïïrö bäät piny; ni kanymør ŋato wäro joot aani jaak a di nääö.»

¹⁵ 'Ba Wuuö Jwøk aköö jïgø, ni «Ŋato köö jaak ni Keen nääe nääö, kwör di coolø dëëre kwöre abïriiø.» Ni ö Wuuö Jwøki ni muuny dëër Keen ki nyuudhi, kiper nee ŋato wäro joot gø nee ba nääe.

¹⁶ Køøre Keen aay nyïm Wuuö Jwøk ni ci kun bëëde yi ŋööm Nøt na en løø Ëden jï løø kur tuul-cäŋ.

¹⁷ Kanyøgø Keen aci baŋ cïïe, ni jït yie ki dhaanhø ni nywøl Inøk. Ni ö Keenni ni gëëde ki pääny, ni caa nyeŋ gø ri nyeŋ wääde ma Inøk.

¹⁸ 'Ba Inøk Irat anywøle, ni ö Irati ni nywøl Mëjël, ni ö Mëjëlli ni nywøl Matucaël, ni ö Matucaëlli ni nywøl Lamek.

¹⁹ Ni ö Lameki ni nyöömme ki mään ariiø, ni nyeŋ dhaagø maya cwøl ni Ada, ni nyeŋ maya cwøl ni Dhëla.

²⁰ Ni ö Ada ni nywøl Jabal. Ni ö Jaballi ni tïme na kwar jø wø bëëdö yïth oduŋkaare na näk jïge da dhäk ki dïëk.

²¹ Ni nyeŋ coki cwøl ni Jubal. Jubal beeye kwar jø wø pöödö ki thøme ni wø kudhö ko opele.

²² 'Ba Dhëla Tubalkeen anywøle, ni ö Tubalkeenni ni tïme na ŋat thäth ki jap jwëëlli ki jap nywïëny bëët. 'Ba coki mana näk dhaagø nyeŋŋe cwøl ni Nayma.

²³ Køøre Lamek aköö ki määre, «Nya, Ada ki Dhëla, beerra man leŋŋu dwøra. U na määra, beerra man cegu ïthu ki luup 'moa. Aana nägö ki dhaanhø kiper mana këël aani, ni 'näga ki nyilaal kiper mana gøøc aani.

²⁴ Ni näk mo kwör Keen di coolø ki kwöre abïriiø, aani na näk Lamek kwöra tïmö ni cool ki kwöre ma pïërabïriiø ka abïriiø.»

²⁵ Køøre Adam acäŋ ci baŋ cïïe ni nyööt cïïe ki nyilaal ma dïcwøø, ni cak nyeŋ gø ni Cëth; ni kö Iipi, ni «Jwøk acäŋ cïpö ki dhaanhø mør jïra na kar Eebel na 'näk Keenni.»

²⁶ Ni ö Cëthi ni nyööte ki nyilaal ma dïcwøø ni cak nyeŋ gø ni Ënöc. Køør manøgø nø, jiy aput tägö ki man lamge nyeŋ Wuuö Jwøk.