Wïlöölö 38 - Wëël Jwøk

Luum Juuda Ki Tamar

¹ Kanyøgøøni Juuda buut uutwänni ki nyïïmenni awiie ni aae ni gaa buut nyen mør mo nyeŋŋe cwøl ni Ëra ma nyï Adulam.

² Kanyøce Juuda nyi nyen mør ma nyï Keenan mo nyeŋŋe cwøl ni Cëwa ajoode. Ni ö eni ni nywøm gø, ni ci baŋ gø.

³ Ni ö nyaanøgø ni jït yie ki dhaanhø, ni lwaare ki nyilaal ma dïcwøø, ni ö Juuda ni cak nyeŋ gø ni Er.

⁴ Ni cäŋ yi nyaanøgø jïtö ki dhaanhø, ni lwaare ki nyilaal ma dïcwøø, ni cak nyeŋ gø ni Önan.

⁵ Ni cäŋ nyöötö ki nyilaal mør ma dïcwøø ni cak nyeŋ gø ni Ceela. 'Ba na ö nyaanøgø na nywøl wääde manøgø, Juuda ena Kejip.

⁶ Køøre Juuda wääde ma Er mana näk kanynye anyöömme ki dhaagø mo nyeŋŋe cwøl ni Tamar.

⁷ 'Ba Er, na näk kany Juuda, ena ŋat raay ki nyïm Wuuö Jwøk; køøre ena wëëk Wuuö Jwøki thøø.

⁸ Køøre Juuda aköö jï Önan, «Ci baŋ cï coku, ni bëëdu ki gø kaawat man wø dööŋ dhaanhe ki cï mädhi, ni ciï baŋe ni nywølï wï coku.»

⁹ 'Ba na neeni ya Önanni no obwöre moo nywøle paa moe, ena ci baŋ cï mädhi ni käre kööthe wiiø ki man cige dëër gø, 'ba cøøa piny jaak, kiper nee ba jïte ki nyilaal jï coki.

¹⁰ 'Ba gïna tïïe beeye gïn mo raac ki nyïm Wuuö Jwøk; køøre ena wëëk Wuuö Jwøki thøø thuwø.

¹¹ Kanyøgø Juuda aköö jï cï nyaare ma Tamar, «Ci døø po wäru ni bëëdï ni ïïna cï thøø, këël mano døøŋ wääda ma Ceela.» Kiper Juuda alwäyö ni kanymør Ceela thøw kaamar nyïïmenni. Køøre Tamar aay ni ci kuna bëëde po wänni.

¹² 'Ba kanya tïme na køør cwiiri møøk, cï Juuda nyi Cëwa athøw. 'Ba kanya nø løny Juuda ki cøm cwïny, eni ki nyawatge ma Ëra nyï Adulam gena ci baŋ jø wø nyaar jïëc dïëk moe yi Temna.

¹³ 'Ba acaan jï Tamar, ni «Kwaru cøøa yi Temna kuna nyaar jïëc dïëk moe.»

¹⁴ Køøre Tamar abïïk thøø akäl wøk dëëre, ni lwöte ka abïï mør ni uum gø dëëre. Køøre ena pï piny buut dhi kiir Enayim na en jöör Temna. Gïnögø atïïc Tamarri kiper ajoode ni Ceela anø døøŋŋø, ni eni kär mëëk Ceela nee dööŋe ki gø.

¹⁵ 'Ba kanya jooti ya Juuda, ki jïre ni beeye dhaagø ma kääbi, kiper mana näk täärnyïme ee uumö.

¹⁶ Køøre ena gaa baŋ gø thääŋ øtjöö, ni kööe, «Ööï naa ööa baŋï na dhaagø,» kiper eni kuue ni beeye cï nyaare. Køøre Tamar aköö, «?Agïnaŋø noo mëëgï aani kiper niï ööï baŋa?»

¹⁷ Ni ö Juuda ni løk gø jïre, «Ïïno mooa ki nyidiel ri dïëga.» Ni ö Tamarri ni kööe, «?Agïnaŋø noo cïpï na dïgïti këël mano jääŋŋï gø?»

¹⁸ Ni ö Juuda ni kööe, «?A dïgïti ma ŋø noo mëëga ïïni?» Ni løk gø jïre, na «A manynya gwel lweedø marï man wø käärï ki cwaagï, ka athøra mano ni en cerï enø.» Køøre eni gïïögø bëët acïbe ni ci baŋ gø ni jaac gø.

¹⁹ Køøre Tamar aö maal ni aae, ni käl abïïne wøk dëëre ni dwøk abïïk thøø dëëre.

²⁰ 'Ba na ö Juuda na jääŋ nyidiel ki nyawatge ma nyï Adulam kiper nee dïgïti moa cïbe lwøre baŋ dhaaŋŋøce, nyawatge dhaaŋŋøgø käre joodø.

²¹ Ni ö eni ni pëëny jøøa näk wëëk kaace, ni kööe, na «?Age dhaaŋŋa näk kääbi na en deŋ jöö buut dhi kiir Enayim?» Ni köge jïre, «Kee bäŋ kääbi mo ena kany.»

²² Køøre ena døø baŋ Juuda ni kööe, «Dhaaŋŋøca kära joodø. Këël jøøa näk wëëk paaci thuwø aköö, ni ‹Bäŋ dhaagø ma kääbi kany.› »

²³ Ni løgi ya Juuda jïre, ni «Beerra man bëët jammi moøgø na moe nø, kiper nee jiy ba ŋeethge bäätø. Neenï, kawaane nyidieri ajääŋŋa baŋe, 'ba eni kärï joodø.»

²⁴ 'Ba na tïme na køør dwäde adäk acaan jï Juuda, ni «Cï nyaarï ma Tamar ree atïïe kaamar kääbi, 'ba ki køør mana tïïe, eni kawaane yie da dhaanhø.» Køøre Juuda aköö, «Kälu eni wøk nee waaŋ.»

²⁵ 'Ba na käl eni wøk, ena jäägö ki dwøl baŋ kwari, ni kööe, «Ŋata näk wää japi beeye ŋata mooc aani ki dhaanhø. Beerra man ŋeyï gïïögø. ?Aŋø, wää gwel lweedø man ka athøra man aŋa?»

²⁶ Køøre Juuda japøge aŋiie ni kööe, «Mana tïïe enøgø atïmö ni theemma eni ki mara, kiper eni kära mëëk wääda ma Ceela.» Køøre Juuda kär ci baŋ gø këët.

²⁷ 'Ba kanya tïme na kar lwaar mare, atïmö ni yie da nyïï Jwøk.

²⁸ 'Ba na cäädhe ki mäc, nyilaal aciel dïge cere arwää wøk, ni ö dïcöödi ni tööny cer gø ki waarø mo kwaar, ni kööe, ni «Man beeye mana kwøŋ ö wøk.»

²⁹ 'Ba køøre na ö eni na dwøk cere, coki aput ö wøk, ni tïme ni beeye kaa. Ni kö dïcöödi, «?Aŋø ni jämmï riï keerï en?» Køøre, kiper mana jäm ree keere, nyeŋŋe acak ni Peereth.

³⁰ Køøre nø coki na en waaya kwaar cere aö wøk, ni ö nyeŋŋe ni caai ni Dheera.