Wïlöölö 37 - Wëël Jwøk

Kanya Ö Uutwää Jocep Ni Mänge Ki Eni

¹ Kanyøgø Jeekap abëëdö yi ŋööm Keenan na näk ŋöömma bëët wänni yie na wëëllö.

² Man beeye luum nyïïkwaac Jeekap. Kanya tïm Jocepi o Jeekap na nyilaal mo cwiiye apaar ka abïriiø, ena bëëdö ni kwaaya dïëk ki uutwänni na näk wäät Bila ki Dhelpa na näk määr wänni. Kanyøgø Jocep nyeŋ uutwänni awaae ni cääne ki dwøl mo raac jï wääge kiperge.

³ Kar kaaca Jeekap mëër ki Jocep døc ni kaala wääte møga, kiper mana nywøl gø ni eno nø jalø. Ni mooc gø ka abïï mo mïërö.

⁴ 'Ba na jooti ya uutwänni ni wääge mëër ki eni ni kaala geni, gena männö ki gø døc, ni bëëtge ni ge ba cäänö ki gø ki met ec.

⁵ Kanyøgø Jocep alägö ki lääk. 'Ba kanya par gø jï uutwänni, män marge ki eni aput kadhø døc.

⁶ Ni ö eni ni kööe jïge, ni «Wïnynyu lääga läga ki gø.

⁷ Kanya läga nëëni kere øøni nø, ø ena yi pwödhö ni ø töö ka acook abäy, ni ö acooŋa mara ni cuŋŋe, ni ö mou ni cooŋge rege lak mara ni kuulge wïthge piny nyïm acooŋ abäy mara.»

⁸ Køøre uutwänni aköö jïre, «?Aŋø, riï cuumï cuumö bäätwa? ?Aŋø, ï tïmö møn ni ïïna kwäärö bäätwa?» Køøre män marge ki eni akadhø døc kiper luup moa caane kiper lääk moe.

⁹ Køøre ena cäŋ lägö ki lääk mør, ni par gø jï uutwänni, ni kööe, «Aani nø, aana cäŋ lägö ki lääk mør. Kanya läga nëëni kere cäŋ ki dwääy ki ceer apaar kurciel wïthge ege kuul piny nyïma.»

¹⁰ 'Ba na par gø jï uutwänni ki wänni, ena jook wänni ni kööe, «?A teeŋ lääga ŋø na lägï yøø? ?Aŋø, beeye aani møn ki meru ki uutwäru no ööi no kuul wïthge piny nyïmï?»

¹¹ Ni ö uutwänni ni päŋ cwïnyge ki keec ki eni. 'Ba wänni luummögø akan cwïnye.

Jocep Agath Uutwänni

¹² Kanyøgø uutwänni aci kuna køølge pïïth dïëk wääge yi kany mo cään ki Cekam.

¹³ Ni kö Icrielli jï Jocep, «Uutwäru ena baŋ kwaath ki dïëk buut Cekam. Ööï nø niï jääŋŋa baŋge.» Ni kö Jocepi jïre, «Wøp, a cøø.»

¹⁴ Køøre wänni aköö, «Ciï nø ni neenï uutwäru nee geni dëëtge jööt ki dïëk bëët. Køøre wärï duuï ni caanï gø jïra.» Køøre ena jääŋŋe ki yi gool mar Keeprön, ni ö eni ni ci Cekam.

¹⁵ Ni jooti ya nyen mørri ni eni wïdö jaak yïth pwöth, ni pëënynyi ya nyenøgø, ni «?Ï manynyï ŋø cøøn?»

¹⁶ Ni kö Jocepi, ni «Aani a manynya uutwära. Beerra man caanï kanya kwääcge yie ki dïëk.»

¹⁷ Køøre ŋatøgø aköö, «Dëëtge apaanyge kany, kiper awïnynya ni ge cäänö, ni ‹Ø aa Döthan.› » Køøre Jocep aläp køør uutwänni ni nwän geni yi Döthan.

¹⁸ 'Ba kanya jootge Jocep ni kare poot bäär mëëth ki geni, ni eni poot kär pïï buutge, gena cuuŋö yïthakicge keerge ki man 'näkge gø.

¹⁹ Ni cäänge yaakicge keerge ni köge, ni «Ŋat lääk aöö ice.

²⁰ Ööu nø nee eni nääø ni leeŋø gø yi buur jaak, ni caanø gø ni kööø ni ena cam lääyi mør mo owär; køøre nø nee lääk moe neenø mano tïmge nidïï.»

²¹ 'Ba gïnögø awïny Rubenni ni wëëk gø bødhø ceŋ uutwänni, ni kööe, «Kär eni nääø.»

²² Ni cäŋ Rubenni köö jïge, «Kär remme kønynyu piny. Beerra man leeŋu gø yi buur man dï paap kany, 'ba kär dee ŋat gut gø ki cere.» Gïnögø acaane ni eni gwøga gø ceŋge kiper nee eni dwøk baŋ wänni.

²³ 'Ba kanya pïïc Jocepi buut uutwänni, geni abïïna mïërö na kääre acöötge wøk dëëre.

²⁴ Ni putge gø mak ni leeŋge gø yi buur. 'Ba buur manøgø beeye buur mo odwön mo bäŋ pïï yie.

²⁵ Køøre gena pï piny nee ge cämge. 'Ba na lwïthge, jø tuuŋ Icmiel mo dïgäthe ajootge ni öö ki yi Gelät ka athïrööle moge, ni ge käära dwøk ki mädhi ma teeŋi, ni kïtha Ijep.

²⁶ Kanyøgø Juuda aköö jï nyïïmenni ki uutwänni, «?Agïnaŋø ni beer no duue jïïø ni näk mo rem owääø yøø køny piny jaak ni mooŋø gø?

²⁷ Ööu nø nee gadhø baŋ jø tuuŋ Icmiel, ni ba gudø gø ki ceŋŋø, kiper eni beeye owääø ni rem dëëtø aciel ki gø.» Køøre luummögø aleŋ nyïïmenni ki uutwänni.

²⁸ Kanya pöönh jø Midienni ki buutge, geni Jocep apëëge wøk ki yi buur, ni putge gø gath ki jø tuuŋ Icmiel ki gwel ma pïërariiø, ni ö jø tuuŋ Icmielli ni kïthge Jocep Ijep.

²⁹ Kanyøgøøni na duu Rubenni na neen Jocep ni tøør yi buur, abïïge ajeeye.

³⁰ Ni døø baŋ nyïïmenni ki uutwänni ni kööe, «Nyilaal tøør. ?Aano cøøa kaa nø?»

³¹ Køøre geni abïïn Jocep akälge, ni ŋätge ki diel, ni cøtge abïï yi remø.

³² Ni ö geni ni jääŋge abïïna mïërö ni kïthge gø baŋ wääge ni köge, «Abïï man ajootwa. Neenï nø ni näk beeye abïïn wäädï wala path.»

³³ Ni ö eni ni ŋec gøøni, ni kööe, «Man beeye abïïn wääda. Ena nø cam lääyi mør mo owär. Jocep dëëre anø cööti na thäŋi møn.»

³⁴ Køøre Jeekap abïïge ajeeye, ni kïth dëëre ki keeca, ni kïmme kiper wääde ki nïne mo thööth.

³⁵ Kanyøgø wääte bëët ki nyïïe bëët aöö ki man cømge cwïnye, 'ba ena kweer ki man cøm cwïnye, ni kööe, ni «Jïra bäär, aani a cøøa kar thøø køør wääda naa kïmmö.» Ni ö Jeekapi ni bëëde ni kïmmö kiper wääde.

³⁶ 'Ba Jocep onø gath jø Midienni ki nyen mør Ijep mo cwøl ni Pötipar, mo tïïö buut Peerø nyeny Ijep, ni ena kwääy jø leny moe.