Wïlöölö 35 - Wëël Jwøk

Kanya Ö Jwøki Na Kööm Jeekap Ki Man Døø Bëthël

¹ Køøre Jwøk aköö jï Jeekap, ni «Ö maal ni ci Bëthël, ni bëëdï yie kaace, ni tïïï ki gïn wø cïp olämme bääte kaace jïra, a na Jwøk na nyooth dëëre jïrï kanya reŋï niï ŋwieya coku ma Icøø.»

² Kanyøgø Jeekap aköö jï jø paare ki jøøa en buute bëët, ni «Wetu juuga path na en dïïu, ni døøyu dëëtu mo waany, ni wiillu abïïe mou.

³ Køøre øøno tïŋŋi ni cøø Bëthël; køøre aano tïïö ki gïn wø cïp olämme bääte kaace jï Jwøk, Jwøa wïny kwac mara kanya ena yïth gïï mo leth, ni beeye Jwøa bëëdö ni nutö buuta yïth kwöra caadha bëët.»

⁴ Kanyøgø jøøgø juuga path bëët na en jïge ki gwet ïthi moge acïpge jï Jeekap, ni ö Jeekapi ni koony ge piny tier jaadha teek na en buut Cekam.

⁵ 'Ba kanya tïŋge wääth marge, lwär mo päl mo käla baŋ Jwøk aö bäät päänye moa näk kwörge cärö ki geni bëët; ni ö jiyi moa en yïth päänye moøgø ni kärge reŋ køør jic Jeekap.

⁶ Ni ö Jeekapi ki jøøa cäädhö ki eni bëët ni pïïcge Löja na näk Bëthël na en yi ŋööm Keenan.

⁷ Ni ö Jeekapi ni tïïe ki gïn wø cïp olämme bääte kaace, ni cwøl nyeŋ kaace ni El-Bëthël, kiper kaace beeye kanya ö Jwøki na nyooth ree jïgø kanya reeŋe ni ŋwieya coki.

⁸ Kanyøgø Diböra, ŋat tïïc mar Rebëëka na pïr gø, athøw, ni koonyi tier jaadha teek kany mo cään ki Bëthël, ni cak nyeŋ jaadhøgø ni Allön-Bakuth.

Kanya Ö Jwøki Na Gwïëth Jeekap Ni Wiil Nyeŋ Gø Na Icriel

⁹ 'Ba kanya duu Jeekapi ki yi Padan-Aram, Jwøk ree acäŋ nyoothø jïgø ni gwïëth gø,

¹⁰ ni kööe jïgø, ni «Nyeŋŋï beeye Jeekap; 'ba nyeŋŋï ba cwøl ni Jeekap këët, 'ba nyeŋŋï ocwøl ni Icriel.» Køøre nyeŋ gø aput Jwøki cwøl ni Icriel.

¹¹ Ni cäŋ Jwøki köö jï Jeekap, ni «Aana Jwøa en teeki jïre; nyöödï ni nyaayï piny, ni ö wï jur na näk lwaa wï jur ni tïme ni käla riï, ni ö nyeye ni öge wøk ki dëërï.

¹² Ŋöömma cïba jï kwaru ma Eeberam ki wäru ma Aydhak, cïba cïbö jïrï; ni cïba gø jï nyïïkwaayï mo ööi køørï.»

¹³ Køøre Jwøk aay buut Jeekap kanya cäänge yie ki gøøni.

¹⁴ Ni ö Jeekapi ni cööth piny ki nyuudhi ma kïdi kanya cään Jwøki ki gøøni yie, ni thïïm bäät gø ki køøŋø na jëëdhi, ni thii maaw bäät gø.

¹⁵ 'Ba Jeekap nyeŋ kanya cään Jwøki ki gøøni yie acaae ni Bëthël.

Luum Thøw Reecal

¹⁶ Køøre gena tïŋŋö Bëthël. 'Ba kanya poode ni karge poot bäyö mëëth ki man pïïcge Eeparata, Reecal ree ajïtö ki mäc lwaar, ni tïm lwaarri mare ni teek døc.

¹⁷ 'Ba ki køør lwaar mo teek døc, dïcöödi aköö jïgø, ni «Kärï lwäyö, kiper nyilaal man poot na dïcwøø.»

¹⁸ 'Ba kanya tïm jwïëy moe ni manynya aay dëëre kiper nee thøøe, eni nyeŋ wääde acaae ni Benöni, 'ba wänni nyeŋ wääde acaae ni Benjamen.

¹⁹ Kanyøgø Reecal aput thøø ni koonyi jöö mana ci Eeparata na näk Bethelem.

²⁰ Ni ö Jeekapi ni cööth piny ki kïdi na nyuudhi bäät bwöye, ni beeye nyuudhi mar bwöc Reecal këël dïcäŋi en.

²¹ Køøre Icriel atïŋŋö kaace, ni aae ni gur oduŋkaara mare piny ŋää kanya cwøl ni Makdal-Adër.

²² 'Ba kanya bëët Icrielli ni bëëdö yi ŋöömmögø, wääde ma Ruben aci baŋ Bila, dhaaŋŋa näk kwanynyø mar wänni, ni butge ki gøøni; ni ö wänni ma Icriel ni wïny gïnögø. 'Ba wäät Jeekap beege apaar kurriiø.

Nyeŋ Wäät Jeekap

²³ Wääte moa nywøle ki Liia beege Ruben na näk kany Jeekap, køøre ki Cimien ki Libay ki Juuda ki Icakar ki Dhebulan;

²⁴ ni wääte moa nywøle ki Reecal beege Jocep ki Benjamen;

²⁵ ni wääte moa nywøle ki Bila, dhaaŋŋa näk ŋat tïïc mar Reecal, beege Daan ki Naptali;

²⁶ ni wääte moa nywøle ki Dhelpa, dhaaŋŋa näk ŋat tïïc mar Liia, beege Gaat ka Acer. Moøgø beege wäät Jeekap moa nywøle yi Padan-Aram.

Luum Thøw Aydhak

²⁷ Køøre Jeekap aö baŋ wänni ma Aydhak yi Mamrë yi Kiriat-Arba na näk Keeprön, kanya ö kwari ma Eeberammi ki wänni ma Aydhak na bëëtge yie na wëëlle.

²⁸ 'Ba kar kaace cwiic Aydhak oløny na dïpa aciel ki pïërabära.

²⁹ Ni ö Aydhaki ni jwïëe ka aŋuudi ni put thøø, ni läp køør tuuŋge, ni ena jaal mo ojal ki jalø ma wøp. Ni ö wääte na näk Icøø ki Jeekap ni koonyge eni.