Wïlöölö 18 - Wëël Jwøk

Kanya Ö Jwøki Na Buuk Aydhak Jï Eeberam Ki Ceera

¹ 'Ba Wuuö Jwøk ree anyoodhe jï Eeberam buut jera døøŋŋø mo Mamrë, ni Eeberam opï piny dho oduŋkaara mare kanya tïm cäŋŋi ni ena dhöör.

² 'Ba kanya ö Eeberammi na tïŋ wïïe maal ni lwïthe nyïme, jiy adäk ajoode ni cuŋŋö ni dïët ki eni. 'Ba na joot geni, ena pär maal ki dho oduŋkaara na bëëde yie ni reŋ baŋge nee røømme ki geni. Kanyøgø cøŋŋe akëël piny nyïmge,

³ ni kööe, na «Awuuö, ni näk mo yiï met ki aani, a na laŋŋï, a kwaya ïïni ki man ba pöödhï ki buuta jaak,

⁴ kiper naa känna ki pïï mo thenh kiper nee tietu lwøgu ki ge, ni jwömmu dëëtu tier jaadhi en;

⁵ naa känna ki gïn cam mo thiinh, kiper nee dëëtu nigethïk; køøre nø uuno pöödhi, kiper uuna nø lïïmmö baŋa, a na laŋŋø maru.» Køøre gena köö, ni «Beer, tïïyï kaawat mana caanï gø.»

⁶ Kar kanyøgøøni Eeberam aput rwäth yo oduŋkaara baŋ Ceera, ni kööe, ni «Laar määnyö ki møø mo pøøth ma rumme adäk, ni cootï gø, ni tïïyï gø na dääpe.»

⁷ Ni ö Eeberammi ni reŋ kaal thuwø, ni lwöte ki nyirøøa mo dëëre beer mo olør, ni wëëk gø ŋat tïïc mare; ni ö ŋat tïïci ni laar nyirøøa jiiŋŋø.

⁸ Køøre Eeberam caak moa cøt ki caak moa näk ciebe ki nyirøøa mana näk ee nø jiiŋŋø kiperge akäle ni cïp ge nyïmge; ni ö eni ni cuŋŋe buutge kanya cämge yie tier jaath.

⁹ Køøre gena köö jïre, ni «Cïï ma Ceera en kaa?» Ni kööe, ni «Eni ena yo oduŋkaara kaace.»

¹⁰ 'Ba dhaanhø aciel røk jøøgø aköö, ni «Ka adïëri møn, cwiino ööi kar kany nø aano duu baŋï; ni ö cïïï ma Ceera ni nyööte ki nyilaal ma dïcwøø.» 'Ba kar kaaca Ceera ïthe ee ciiø dho oduŋkaara ŋää ŋatøgø.

¹¹ Kar kanyøgø Eeberam ki Ceera gena jiy mo onø jalø, ni cwiicge oløny ni thööth døc; këël Ceera ki dëëre kar nyöödö mare onø pöödhö.

¹² 'Ba Ceera aŋeethø ki yi cwïnye, ni kööe, ni «Kawaane ennø aano nø jalø, ni këël dïcwøø mara thuwø onø jalø. ?Aŋø, aani gïr dïcwøø poot dagø cwïnya këët?»

¹³ 'Ba Wuuö Jwøk aköö jï Eeberam, na «?Aperŋø na ŋeeth Ceera, ni kööe, na ‹?A doo nyöötö ki nyilaal møn, ni aano nø jalø ennø?›?

¹⁴ ?Aŋø, da gïn mo dhäthö jï Wuuö Jwøk? Ki kanya näk ocaanø aano duu baŋï cwiino ööi kar kany nø, ni ö Ceera ni nyööte ki nyilaal ma dïcwøø.»

¹⁵ 'Ba Ceera ree amooŋe, ni kööe, na «A kär ŋeethø;» kiper mana lwäye. 'Ba ŋata cäänö aköö, ni «Jïre bäär, ïïna ŋeethø møn.»

Kanya Kwää Eeberammi Kiper Räny Cødam

¹⁶ Køøre jøøgø atïŋŋö ki kaace, ni ge neeta Cødam ya amät piny; ni ö Eeberammi ni aae ki geni ciel ni jietha geni.

¹⁷ Ni kö Wuuö Jwøki, na «?Aŋø, gïno tïïa en daa mooŋø ki Eeberam?

¹⁸ Kiper ka adïëri møn Eeberam tïmö na wï jur mo dwøŋ mo teek, ni bee eni no gwïëth wïth juurre mo bäät piny bëët ki køøre.

¹⁹ Kiper ena jiera, nee obwöre moe këël nyïïkwaaye mo ööi køøre nee pwönynye ki man caathge køør dwøra, a na Wuuö Jwøk, ni ge bëëdö ka bëëtö mo beer, ni ge tïïya tïïe ma adïëri; kiper nee gïna buua jï Eeberam nee tïïa jïre.»

²⁰ Ni kö Wuuö Jwøki, ni «Luup ajäla kiper Cødam ki Gømöra atïmö ni thööth døc, ni ö raay moge ni kathge døc.

²¹ Ennø, a cøøa baŋge kuna neena geni ki man näk gïnögø ege tïïö møn ki køør luup ajäla moa wïnynya; 'ba ni näk paa adïëri, løny ki man ŋääa gø.»

²² Køøre jøøgø rege aløkge ni aacge ni ge coonya Cødam. 'Ba Eeberam adööŋ ni poot cuŋŋö nyïm Wuuö Jwøk.

²³ Ni ö Eeberammi ni nyiik buute, ni kööe, na «?Aŋø, ka adïëri møn, jiy moa bëëtge beyø nyïmï ki moa näk tïïya raay raanynyï raanynyø na aciel bëët?

²⁴ A kanymør da jiy mo bëëtge beyø nyïmï mo jïtö ki kar pïërabïïc yi paanøgø. ?Aŋø, paac manøgø diï raanynyø ni ba wëënnï ki køør jøøgø na pïërabïïc ni bëëtge beyø nyïmï yøø?

²⁵ Ba doo løny ki man tïïyï teeŋ gïnögø na bäre bäre, ki man 'nägï jøøa näk bëëtge beyø nyïmï ki jøøa näk tïïya raay na aciel bëët; caana gø ni jiy moa näk bëëtge beyø nyïmï ki jiy moa näk temma raay iï päärö na aciel bëët. Teeŋ gïnögø ba diï tïïö na bäre bäre. ?Aŋø, ŋat wø ŋøl luup mo bäät piny bëët, bäŋ wø ŋøl luup ma karge cooth?»

²⁶ Køøre Wuuö Jwøk aköö, ni «Ni näk maa jïtö Cødam ki jiy ma pïërabïïc mo bëëtö marge beer nyïma yi päänyögø kiree, løny jïra ki man wëënna paanøgø bäre ni ba raanynya ki køørge.»

²⁷ 'Ba adwøk Eeberammi ni kööe, ni «Ennø, a maaŋŋa raa ki man cääna ki ïïni, ï na Wuuö, këël na bëëde ni aana dëël ma tør na bur jaak.

²⁸ Kanymør dëët jøøgø na pïërabïïc yøø da abïïc mo tøørø. ?Aŋø, päänyögø diï raanynyø bäre kiper na tøør abïïci keerge?» Ni kööe, ni «Ba daa raanynyø ni näk maa jïtö ki pïëraŋween kurbïïc kaace.»

²⁹ Køøre Eeberam acäŋ cäänö jïre, ni kööe, «?A kanymør ni näk beege pïëraŋween keerge noo joot kaace?» Ni kö Wuuö Jwøki, ni «Gïnögø ba tïïa kiper kwään jøøgø na pïëraŋween yøø.»

³⁰ Køøre Eeberam aköö, ni «Wui Wuuö, beerra man ba cwat yiï, kiper a poot cäänö. ?A kanymør ni näk beege pïëradäk noo joot kaace?» Ni kö Wuuö Jwøki, ni «Gïnögø ba tïïa ni näk maa jïtö ki pïëradäk kaace.»

³¹ Køøre ena köö, ni «Raa amaaŋŋa ki man cääna ki ï na Wuuö. ?A kanymør ni näk beege pïërariiø noo joot kaace?» Ni kööe, ni «Ba daa raanynyø kiper kwään jøøgø na pïërariiø yøø.»

³² Køøre Eeberam aköö, ni «Wui Wuuö, beerra man ba cwat yiï, naa cäänna yie man keere. ?A kanymør ni näk beege apaar noo joot kaace?» Ni kööe, ni «Ba daa raanynyø kiper kwään jøøgø na apaar yøø.»

³³ 'Ba kanya løny Wuuö Jwøki ki cäänö ki Eeberam, ena aay; ni ö Eeberammi ni døø kanya bëëde yie.