Wïlöölö 17 - Wëël Jwøk

Luumma Tuut Jwøki Ki Abram

¹ 'Ba kanya tïm Abrammi ni cwiiye pïërabïŋween ka abïŋween, Wuuö Jwøk ree anyoodhe jï Abram, ni kööe jïgø, ni «Aana Jwøa en teeki jïre; beerra man cäädhï nyïma, ni bëëdï ni bäŋ gïn mo jøøŋŋi ri bëëtö marï.

² 'Ba aani luumma tuuda tïïa tïïö nee bëëde ni nut yïthakiyø ki ïïni. Ni wëëga ïïni nyaay døc kiree.»

³ Køøre Abram dëëre aleeŋ piny, ni cään Jwøki ki gø ni kööe,

⁴ ni «Aani gïna tuuda ki ïïni beeye en, ïïno tïmö na kwar wïth juurre mo thööth.

⁵ Nyeŋŋï ba cwøl na Abram këët; 'ba nyeŋŋï ocwøl ni Eeberam, kiper ï tïïa tïïö na kwar wïth juurre mo thööth,

⁶ ni wëëga ïïni nyaay døc, ni tïïa wïth juurre ki nyeye ni käla riï.

⁷ Ni ö luumma tuuda ni wëëga gø bëëtö yïthakiyø ki ïïni ki nyïïkwaayï mo ööi køørï, këël yi beenhnhø marge bäre, ni tïm luumma tuuda na gïn mo bëëdö na bäre bäre, kiper naa bëëda ni aana Jwøk maru ki nyïïkwaayï mo ööi køørï bëët.

⁸ 'Ba ŋöömmi ni bëëdï yie ni ïïna wëëllö en, na näk ŋööm Keenan bäre, ocïba jïrï ki nyïïkwaayï mo ööi køørï, nee bëëde na marge na bäre bäre; ni bëëda ni aana Jwøk marge.»

⁹ Ni kö Jwøki jï Eeberam, ni «Ïïni thuwø, luubö mana tuuda ki ïïni diï gwøø, ïïni këël nyïïkwaayï mo ööi køørï ki yïth beenhnhe moge bëët.

¹⁰ Ni luumma tuuda noo gwøgï, nee bëëde yïthakiyø ki ïïni këël nyïïkwaayï mo ööi køørï, beeye en; jiy moa näk cwøw bëët dïïu wär geni daŋ.

¹¹ Ni këël uuni ki dëëtu wär dëëtu daŋŋu, kiper nee tïme na nyuudhi mar luumma tuuda ki uuni.

¹² Ni ö obwöre mou moo näk cwøw bëët ni daŋi kanyo tïme ni nïne abära wøk, këël mano këët ri beenhnhe mou bëët; ni këël laŋŋø mo onywølø paac marï jaak, wala ŋeew ka gwel yi tuuŋ mo path ni ba en ri nyïïkwaayï, wär daŋ bëët.

¹³ Laŋŋø mo onywølø paarï jaak wala ŋeewï ka gwel, ka adïëri møn wär geni daŋ; kiper nee luumma tuuda bëëde ni nëënö dëëtu na luubö mo otuudö na bäre bäre.

¹⁴ 'Ba ni näk da dhaanhø ma dïcwøø mo kär daŋø, ŋatøgø wär tïme ni tøør yïthakic tuuŋge; kiper mana käre luubö mana tuuda gwøø.»

¹⁵ Køøre Jwøk aköö jï Eeberam, ni «Caray na näk cïïï, kär cwølï këët ni Caray, 'ba nyeŋŋe ocwøl ni Ceera.

¹⁶ 'Ba eno gwïëdha, këël mano mooa ïïni ki nyilaal ma dïcwøø mo käla dëëre kiree. Eni gwïëdha gwïëdhö, ni tïme na mii wïth juurre; ni tïm nyeye mo wïth juurre ni käla ree.»

¹⁷ Køøre Eeberam ree aleeŋ piny ni put ŋeethø, ni kööe ki yi cwïnye, ni «?Dhaanhø mo cwiiye oløny na dïpa doo nyöötö ki nyilaal møn? Ceera thuwø cwiiye oløny na pïërabïŋween. ?Eni poot nyöötö ki nyilaal møn?»

¹⁸ Køøre Eeberam aköö jï Jwøk, ni «Wui, Icmiel ni näk bëëdö nyïmï ni kwøw, doo beer.»

¹⁹ 'Ba Jwøk aköö, ni «Ka adïëri møn, Ceera na näk cïïï nyöötö ki dhaanhø ma dïcwøø ni jïtï ki wäädï, ni cagï nyeŋŋe ni Aydhak. Ni ö luumma tuuda ni wëëga gø bëëtö yïthakicwa ki eni na bäre bäre, këël nyïïkwaaye mo ööi køøre bëët.

²⁰ 'Ba luubö mana caanï kiper Icmiel awïnynya; ennø, eno gwïëdha, ni tïïa gø nee känne ki nyïëdi mo thööth, ni wëëga eni nyaay døc. Eno tïmö na wää kwääri apaar kurriiø, ni tïïa eni na wï jur mo dwøŋ døc.

²¹ 'Ba luumma tuuda owëëga bëëtö yïthakicwa ki wäädï ma Aydhak, no lwaar Ceera ki gø cwiino ööi kar kany nø.»

²² 'Ba kanya løny Jwøki ki cäänö ki Eeberam, Jwøk aay buut Eeberam.

²³ Køøre Eeberam wääde ma Icmiel, ki jiy moa nywøl paare bëët na näk laaŋe, këël moa ŋeew ki gwete bëët, jiy moa näk cwøw bëët moa en paare akäle ni put geni daŋ bëët dïcäŋöca kiree, kaawat mana caani ya Jwøki jïre.

²⁴ 'Ba kanya daŋ Eeberam kar kaaca, cwiiye oløny na pïërabïŋween ka abïŋween.

²⁵ Ni ö wääde ma Icmiel ni daŋi ni cwiiye oløny na apaar kurdäk.

²⁶ Ni beeye dïcäŋögø na aciel enø na daŋ Eeberam yie ki wääde ma Icmiel bëët.

²⁷ Ni ö jiyi moa näk cwøw bëët na en paare, moa nywøl paare ki moa ŋeew ki gwel yi tuuŋ mo path, ni daŋ geni ki eni ciel.