Wïlöölö 11 - Wëël Jwøk

Kanya Ö Jwøki Na Keeth Dhøk Jiy

¹ 'Ba kar kanyøgøøni jø bäät piny bëët atïmö ni cäänö ka dhøk aciel, ni luup moge dïët na aciel bëët.

² 'Ba kanya paanyge dëëtge jï løø kur tuul-cäŋ, gena aay ni jïtge ki gool yi ŋööm Cinaar ni bëëtge yie.

³ Kanyøgø gena cäänö yïthakicge keerge, ni köge, ni «Øøni nø, beerra man tïïø ki thuube ni bulø geni ni beyø døøc.» Køøre gena jïtö ki thuube mo gëëtge ki ge na kar kïte, ni jïtge ko odhöönh mo nwaaŋ na gïn caamge thuube ki gø.

⁴ Ni köge, ni «Øøni nø, beerra man gëënnø dëëtø ki pääny ki øt pööki mo wïïe guta maal, kiper nee nyeŋŋø wïnye, kiper nøø ba keethø bäät piny bäre.»

⁵ 'Ba Wuuö Jwøk aö piny kuna neen pääny ki pööki mana geer jiyi.

⁶ Køøre Wuuö Jwøk aköö, «Ennø, jøøi gena tuuŋ aciel, ni dhøk marge aciel bëët. Teeŋ gïn ennø atäkge ki man tïïcge gø; ni gïn wø caarge jaak yi nyïme nee tïïcge, ba dhäthi jïge møn.»

⁷ Ni kö Wuuö Jwøki, «Øøni nø, beerra man cøø piny baŋge ni kierø wï dhøk marge kaace, kiper nee ŋati man nø nee dhi wati maya ba wïnynye.»

⁸ Køøre gena keeth Wuuö Jwøki kaace bëët dï piny bäre, ni kärge päänyögø geerø këët.

⁹ Kiper manøgønø, nyeŋ kaace acwøl ni Babel, kiper kaace beeye kanya ö Wuuö Jwøki na kier wï dhøk mar jø bäät piny bëët yie, ni wëëk geni keethø kaace bëët dï piny bäre.

Luum Nyïïkwaac Cëm

¹⁰ Man beeye luum nyïïkwaac Cëm. Kanya tïme na køør cwiiri ariiø mo jwïïö, ni Cëm cwiiri moe dïpa, ena nyöötö ki wääde mo nyeŋŋe cwøl ni Arpakat.

¹¹ 'Ba køør kanya ö Cëmmi na nywøl wääde ma Arpakat, ena cäŋ bëëtö ki cwiiri ma dïpe abïïc, ni nyööde ki wääte ki nyïïe møøk.

¹² Ni ö Arpakati ni bëëde ki cwiiri ma pïëradäk kurbïïc, ni nywøl wääde ma Ceela.

¹³ Køør kanya ö Arpakati na nywøl wääde ma Ceela, ena cäŋ bëëtö ki cwiiri ma dïpe aŋween ka adäk, ni nyööde ki wääte ki nyïïe møøk.

¹⁴ Ni ö Ceela ni bëëde ki cwiiri ma pïëradäk, ni nywøl wääde ma Eber.

¹⁵ Køør kanya ö Ceela na nywøl wääde ma Eber, ena cäŋ bëëtö ki cwiiri ma dïpe aŋween ka adäk, ni nyööde ki wääte ki nyïïe møøk.

¹⁶ Ni ö Eberri ni bëëde ki cwiiri ma pïëradäk kurŋween, ni nywøl wääde ma Pelek.

¹⁷ Køør kanya ö Eberri na nywøl wääde ma Pelek, ena cäŋ bëëtö ki cwiiri ma dïpe aŋween ki pïëradäk, ni nyööde ki wääte ki nyïïe møøk.

¹⁸ Ni ö Peleki ni bëëde ki cwiiri ma pïëradäk, ni nywøl wääde ma Reew.

¹⁹ Køør kanya ö Peleki na nywøl wääde ma Reew, ena cäŋ bëëtö ki cwiiri ma dïpe ariiø ka abïŋween, ni nyööde ki wääte ki nyïïe møøk.

²⁰ Ni ö Reewi ni bëëde ki cwiiri ma pïëradäk kurriiø, ni nywøl wääde ma Ceeruk.

²¹ Køør kanya ö Reewi na nywøl wääde ma Ceeruk, ena cäŋ bëëtö ki cwiiri ma dïpe ariiø ka abïriiø, ni nyööde ki wääte ki nyïïe møøk.

²² Ni ö Ceeruki ni bëëde ki cwiiri ma pïëradäk, ni nywøl wääde ma Neeyör.

²³ Køør kanya ö Ceeruki na nywøl wääde ma Neeyör, ena cäŋ bëëtö ki cwiiri ma dïpe ariiø, ni nyööde ki wääte ki nyïïe møøk.

²⁴ Ni ö Neeyörri ni bëëde ki cwiiri ma pïërariiø ka abïŋween, ni nywøl wääde ma Teera.

²⁵ Køør kanya ö Neeyörri na nywøl wääde ma Teera, ena cäŋ bëëtö ki cwiiri ma dïpa ka apaar ka abïŋween, ni nyööde ki wääte ki nyïïe møøk.

²⁶ Ni ö Teera ni bëëde ki cwiiri ma pïërabïriiø, ni nywøl wääte ma Abram ki Neeyör ki Aaren.

Luum Teera Wää Abram

²⁷ 'Ba man beeye luum nyïïkwaac Teera. Teera anyöötö ni nywøl wääte na näk Abram ki Neeyör ka Aaren; ni ö Aarenni ni nywøl wääde ma Løøt.

²⁸ 'Ba Aaren athøw ni wänni ma Teera poot nut ni kwøw. Ni eni thøøa yi Ur yi ŋöömma nywøli yie na näk po jø Kaldia.

²⁹ Ni ö Abrammi ki Neeyör ni nyöömge dëëtge ki mään. Ni nyeŋ cï Abram cwøl ni Caray, ni ö nyeŋ cï Neeyör ni cwøli ni Milka. Milka beeye nyi Aaren. Aaren beeye wää Milka ki Icka.

³⁰ 'Ba Caray atïmö na bwøc, ni jïre bäŋ nyilaal.

³¹ Køøre Teera wääde ma Abram ki nyïïkwaare ma Løøt wär Aaren ki cï nyaare ma Caray na näk cï wääde ma Abram alwøre, ni tïŋge na aciel bëët ki yi Ur po jø Kaldia, ni ge cøøa ŋööm Keenan. 'Ba na pïïcge paana cwøl na Aaren, gena put bëëte kaace.

³² 'Ba cwiiri bëët moa beet Teera beege cwiiri ma dïpe ariiø ka abïïc. Køøre Teera athøø Aaren.