Wëël Kïmmö 4 - Wëël Jwøk

Luum Pänh Cwïny Kiper Ränynyö Mar Jerucalem

¹ Aŋø, warkey otïmö ni cøl nidïï; Aŋø, warkey mana tøŋ ree ee wiilø nidïï! Gïïa beyø na geer Øt Jwøk ki ge, aøc piny këël mana pïïcge nyeŋ jïëthe.

² Wäät Dhayan na beer marge pääri ka warkey mana tøŋ, geno tïmö ni caala dääe nidïï mo wø tïïc dïcwäc dääe ki ceŋge!

³ Këël othööe na näk lääc paap thurge cïpge cïbö jï nyïïge, ni dhwøthge nyïïge; 'ba jø powa gena tïmö ni ge reyø døc kaamar uudö mano en paap.

⁴ Lëëp obwöre moa mar aninäŋ yïth aŋarkwange ki riew, ni ö obwöre moa reegø ni bëëtge ni ge kwääö ki caammi; 'ba bäŋ ŋat mooc geni ki cam.

⁵ Jiy moa wara cam caammi moa beyø, gena näk käci nyeŋ jïëthe, ni ö jøøa piith yi käär abïïe mo beyø ni tïmge ni ge bëëdö wïthur.

⁶ Kiper bääyö mar jø powa atïmö ni kadha eni ki bääyö mar jø Cødam, paana raanynyi na bäre bäre ki kany mo thiinh, ni bäŋ køny mo otïïö kipere.

⁷ Kwääri moe gena bëëdö ni dëëtge tøŋ ni kaala piiø, ni ge tar ni kaala caak, ni ge beyø døc ni kaala nyeŋ kïte moa mïërö, ni mïërö marge caala nyeŋ kïte moa ŋwaŋŋi.

⁸ 'Ba ennø, ge cøl ni kaala belø, ni ge ba løny ki ŋec nyeŋ jïëthe; kööt dëëtge otal røk cuu moge, ni talge ni tïmge kaamar jenni.

⁹ Jiy moa thøw ni 'näk ko opëëllö theemma thøø marge ki jiy moa thøw ni 'näga käci; kiper jiy moa 'näk käci ge thøw ni geno caar käci, kiper na bäŋe caammi mo ociek yïth pwöth.

¹⁰ Këël mään moa bëëdö ni mëër ki nyïïge døc, nyïïge athaalge, nee tïmge na cam jïge, ki køør ränynyö mana raany jø powa ki gø.

¹¹ Wuuö Jwøk wëër mare akäle ni dwøŋ døc; wëër mare ni wø liel kaamar maac ajääŋŋe; ni leeŋ maac yi Dhayan, ni ö maaci ni put tier kiir Dhayan thöör ki waaŋ bäre.

¹² 'Ba nyeye mo bäät piny, këël ki jø wø bëëdö bäät ŋøøm bëët, kärge ŋäädhö ni løny jï nyïïmän ki man tukge kiir Jerucalem ni dønyge yi gø.

¹³ 'Ba gïnögø tägi kaper raay moa tïïc nyïïkuk Jwøki moe, ki raay moa tïïc dïlämme moe, ki køør mana kønyge rem jiy moa beyø piny.

¹⁴ 'Ba kawaane ge thäämmö nyeŋ jïëthe kaamar jiy ma cööye, ni tïmge ni ge ba waany ki køør rem jiy moa kønyge piny, ni tïme ni bäŋ ŋat mo løny jïre ki man gut abïïkge.

¹⁵ Ni tïm jiyi ni kwöŋŋö bäätge, ni «Daagu rou! U ba waany! Aayu! Aayu! Kär wa gutu!» 'Ba kany wø aacge ni ge thääyö jaak dï juurre, jiy møga yïthakic juurre ge köö, ni «Ge ba bëëdö ki waani këët.»

¹⁶ Wuuö Jwøk ki dëëre beeye na keeth geni, ni bäŋ gïn manynye këët kiperge. Dïlämme atïmö ni ba wøør, ni bäŋ ŋat lwäär ki jø døøŋŋø.

¹⁷ 'Ba øøni nyeŋŋø aööl ki raŋ, ni ø raŋŋa køny mo ba tägi. Ni koor mana kurø ki gø, ø koora jiy mo ø ba kønyge.

¹⁸ Gena tïmö ni ge baya tietø kany wø cäädhø, ni dhäth wääthi jïïø ki uutjïëthe moø; aŋuun bëëtö marø kare acäännö, nïne 'moø athum, kiper aŋuun bëëtö marø aöö.

¹⁹ Jiy moa ŋwiec køørø ge rïïŋö døc ni kaala olwiith mana na agweec. Køørø aŋwiecge bäät kïte, ni møørge piny nyïmmø dï paap.

²⁰ ŋata tïïc Wuuö Jwøki nee wïïe thïïmmi ki maaw, na bëëdö ni caala jwïëy moø, amakge ka abïëp marge, ni beeye ŋata cäänø kipere, ni «Ø doo bëëdö tïpö mare yïthakic wïth juurre.»

²¹ Wui, jø Ëdöm, yïthu mïnge ni kanynyu nø, u ni wø bëëdö yi ŋööm Uc; 'ba uuni athöönh ajäla di jääŋŋö baŋu thuwø, ni mäthu ni meerru ni dööŋŋu ki dëëtu.

²² Wui jø Dhayan, ajäl raay mou athum nø; Wuuö Jwøk u ba wëëk bëëtö këët ni uuno maa ki tøŋ. 'Ba u na jø Ëdöm, Wuuö Jwøk u jääle jäälö kiper raay mou, ni wëëk japa reyø na tïïyu nëënne.