Wëël Kïmmö 2 - Wëël Jwøk

Luum Ajäl Wuuö Jwøk Mana Jääl Jerucalem

¹ Wui, Kwäärö Wuuö Jwøk Dhayan abuŋ piny ki pöölö ki køør wëër mare! Ajiem mar Icriel alëëŋe ki maal ni leeŋ gø yïth ŋøøm. Ni eni kanya tïme na cäŋ wëër mare, bäŋ gïn mo ee caarø kiper kanya bëëdö na køøm tiete.

² Kwäärö Wuuö Jwøk kwör bëëte bëët mo jic Jeekap araanynye, ni cwïnye käre warø. Kwör gwøk røk moa no ogeerø ni teek yïth päänye mo jø Juuda anyaa piny ki køør wëër mare. Eni buc nyec marge ki kwääri moge aleeŋ yïth ŋøøm ni pääta geni.

³ Eni teek mar jø Icriel bäre araanynye ki køør wëër mare ni wø liel kaamar maac. Eni cer cwïïe adøle ki geni nyïm nyïïmän moge. Eni mïëri mo Jeekap awaaŋe ki maac, ni dïïr wïth jammi bëët këël ki moa en deŋge.

⁴ Atheerø mare aniit baŋwa kaawat man wø tïïc nyimänni, ni niide ka cer cwïïe. Jiy bëët moa mïërö ki waŋ anääe kaawat man wø tïïc nyimänni. Wëër mare ni wø liel kaamar maac akïth bäät uudi mo jø Dhayan.

⁵ Kwäärö Wuuö Jwøk atïmö kaamar nyimän. Eni Icriel bäre araanynye, ni raany kwör gwøk røk bëët mo gø. Eni kiiri mo päänye mo Icriel moa no ogeerø ni teek araanynye, ni ö eni ni meet kïmmö ko oduuru mar jø Juuda.

⁶ Eni, kar bëëtö mare atoor piny kaamar abïl koor, ni raany kany wø røømme yie ki jiy. Wuuö Jwøk Dhayan atïïe nee wïïe wïle ki kwör ajwöm moe, ki nïr jwöm moe. Eni nyeya ki dïlämme akwiere ki køør wëër mare ni wø liel kaamar maac.

⁷ Kwäärö Wuuö Jwøk gïn wø cïp olämme bääte jïre akwiere, ni jar øt lam mare na en kur keere. Eni kwör gwøk røk mo pääny acïp ceŋ nyïïmän, ni ö geni ni kwöŋge yi Øt Wuuö Jwøk kaawat man wø tïïc yi cäŋ ajwöma.

⁸ Aŋøl Wuuö Jwøki ki man nyaa kiir Dhayan piny. Eni paac arøme, ni røm dhi cere, ni käre cere dwøk ŋääe këët ki man raany gø. Eni kiiri atïïe ni kïmmö, ni ränyge bëët.

⁹ Dhøk kiir apäänhnhö piny ni buŋi ya ŋøømmi, ni ö dïdëëdi moe ni tøc ge ni raany ge. Nyeya mare ki kwääri moe ge bëëdö dï wïth juurre ni ge mak ka tøŋ. Ciik atïmö ni bäŋgø këët, ni ö nyïïkuk Jwøki ni tïme ni bäŋ gïï wø nyooth ki yi wïc mo jootge baŋ Wuuö Jwøk.

¹⁰ Jäle mo Dhayan gena pï piny yïth ŋøøm jaak ni geno nikïïl. Geni bur ajørge wïthge, ni røøge keece dëëtge na abïïe. Nyïïakuue mo Jerucalem ge bëëdö ni cøŋge ege këël piny ni wïthge ege këël yïth ŋøøm.

¹¹ Aani nyeŋŋa awer ki jwøk, ni jwïëya bëëdö ni kïmmö døc. Aani cwïnya apädhö døc ki kïmmö kiper ränynyö mar jø powa, ki man wø bëët obwöre moa therø ki moa mar na en kööthi ni geno räp piny nyeŋ jïëthe mo pääny.

¹² Ni ge bëëdö ni geno räp piny nyeŋ jïëthe mo pääny kaamar ŋat ŋwellø, ni ge jwöŋö dëët mëëkge, na «?Age cam ki køøŋ nyïïomøki?» ni bëëtge ni ge thøwø kööth mëëkge.

¹³ ?Wui, jø Jerucalem, agïnaŋø noo caana kiperu? ?Uuni, u päära gø ki gïnaŋø? ?Wui, jø Dhayan, gïna jwørru päära gø ki ŋø nee lønye ki man cøma cwïnynyu? Kiper ränynyö maru caala ŋwellø mo ree ee luut piny kaamar naama dwøŋ. ?Aŋa ni dwøk bëëtö maru kare?

¹⁴ Nyïïkuk Jwøk mou, gïï wø nyooth ki yi wïc ni wø køpge jïïu beeye tööt ki cwøk. Geni raay mou kärge thaaŋø jïïu, ki man dwøk bëëtö maru kare dhi cer bëët laŋ. 'Ba marge atïmö ni ge bwødha u wøk ki luup tööt ni ge köö ni caana Jwøki.

¹⁵ Jiy bëët mo wø pöödhi ki waŋjöö ceŋge paŋge paŋø bäätu ni ge buua uuni, ni ge tuuŋŋa wïthge bäät Jerucalem, ni ge köö, na «?Aŋø, man paa beeye pääny mana cäänge kipere, na näk wøp na mïërö døc, ni piny bäre yie met ki gø?»

¹⁶ Nyïïmän mou bëët dhøkge ajapge bäätu, ni buuge ni ge kaaca lakge, ni köge, ni «Wïthge dïïrwa dïïrö ennø. Ka adïëri møn, man beeye cäŋa koorwa kiperge; waana pïï yie ennø, ni jootwa gø.»

¹⁷ 'Ba Wuuö Jwøk gïna manynye atïïe, ni wëëk luumme thur kare, na näk ee nø ŋøl yïth nïra cääŋŋe. Eni uuna raanynye ni cwïnye käre warø, ni tïïc nyimän nee kanynye bäätu. Eni teek mar nyimän ameede.

¹⁸ Jiy ajwöŋö ki cwïnyge bäre jï Kwäärö Wuuö Jwøk. Wui, jø kiir Dhayan, beerra man bëët pï nyeŋŋu ni muulö waŋcäŋ ki wäär kaamar naam. Kär dëëtu jwömmu ko oduuru, ni ba wëëgu pï nyeŋŋu cuŋŋö.

¹⁹ Pänynyu maal kany wø ö jø koorri mo wäär noo täkge ki koor, ni jwöŋu ni döötu ena maal. Gwääru cwïnynyu wøk bäre kaamar pänh jwïïö nyïm Kwäärö Wuuö Jwøk. Thaaŋu ceŋŋu maal baŋe kiper kwøw mar obwöre mou moa therø na näk oräp piny ki käc nyeŋ jïëthe.

²⁰ Wui, Wuuö Jwøk, neenï ni raŋï gø. ?Teeŋ gïn aŋa na kwøŋï gø tïïc dëëre? ?Aŋø, mään obwöre moa käl dëëtge na gwøkge dege camø? ?Aŋø, dïlämme ki nyïïkuk Jwøk doo nääö yi Øt Lam mar Kwäärö Wuuö Jwøk?

²¹ Obwöre ki jäle, ge bëëdö ni geno päänhnhö yïth ŋøøm nyeŋ jïëthe ni geno thøw, ni ö nyïïakuue ki wøpe ni nääi ko opëëllö. Ïïni, gena 'nägï yi cäŋ mar wëër marï, ni 'nägï geni ni cwïnyï kärï warø.

²² Ïïni jiy acwølï kipera kaawat man wø cwøl jiy cäŋ ajwöma, ni ö lwärri mo dwøŋ ni ciel aani dïër. Yi cäŋ wëër mar Wuuö Jwøk bäŋ ŋat mo obøth wala mo okwøw. Jiy moa gwøa na piidha, wïthge adïïr nyimänni mara.