Tiet Ciik 8 - Wëël Jwøk

Pwöc Modhe Kiper Man Ba Wïl Wïci Ki Wuuö Jwøk

¹ «'Ba ciik moi bëët ni köömma uuni ki geni dïcäŋi en, beerra man koorru wïthu ki ge, ni kïthu ge bäät tïïc, kiper nou bëëdu nou kwøw nou nyaayu, nou cou yi ŋöömma kööŋ Wuuö Jwøki kipere nee cïbe jï kwäyu, ni lwørru gø na maru.

² 'Ba wïthu wär caarru ki jöö mana ö Wuuö Jwøki na näk Jwøu na käär uuni ki gø dï paap ki yïth cwiiri moi na pïëraŋween ii. Wuuö Jwøk gïï mo leth akäl bäätu, kiper nou pwönynye, kiper nou päänynye, nee gïna en cwïnynyu nee ŋääe, ki man näk mo ciik moe gwøgu gwøø wala ba gwøgu.

³ 'Ba uuna pwönynye nou näk käci, ni cäŋ u caammø ki møga cwøl ni meena, ni beeye cam mo kuyu dïkwøŋ ni kuc kwäyu thuwø. Gïnögø atïïe kiper nee ŋäyu ni dhaanhø ba doo kwøw ka cam keere, 'ba eni wø kwøw ka luup bëët mo wø ööi ki dhi Jwøk.

⁴ 'Ba ki yïth cwiiri moi na pïëraŋween ii, abïïe moa en dëëtu kär ränynyö, ni tietu kär kwöt ki wääth.

⁵ Køøre nø, dou ŋääö ki cwïnynyu ni Wuuö Jwøk na näk Jwøu, mare beeye pwöc ki uuni, kaawat man wø ö dhaanhe wø pwöny wääde.

⁶ «Kiper manøgønø, gwøgu ciik Wuuö Jwøk na näk Jwøu, ni cäädhu køøre, ni lwäärru eni.

⁷ Kiper Wuuö Jwøk na näk Jwøu u kïthe yi ŋöömö mo beer, mo yie da näm ki jøør ki nyeŋŋi mo kwödö ki dï gøli ki yïthakic kïte.

⁸ Ni beeye ŋöömö mo caammi ma teeŋi, ki jenni mo nyïïge di camø, ciek yie. Ni yie da maar kïc ki jenni mo nyïïge di tïïö na mädhi.

⁹ Ni beeye ŋöömö mo u cämö yie ki cam mo päl, ni bäŋ gïn cannu. Ni kïte moe yïthge da nywïëny, ni løny jïïu ki man kuunyu jwëëlli wøk ki ri kïte moe.

¹⁰ «'Ba kanyo tïme ni uuno nø jäŋö ki cam, Wuuö Jwøk na näk Jwøu dou pwøø kiper ŋöömma beer na cïbe jïïu.

¹¹ 'Ba gwøgu dëëtu ni ba wïl wïthu ki Wuuö Jwøk na näk Jwøu, ni ba kääŋu ki man gwøgu ciik moe ki luup ŋøl moe mo köömma uuni ki geni dïcäŋi en.

¹² 'Ba kanyo nø cämu ni jäŋŋu, ni gëëdu ki uudi mo beyø ni bëëdu yïthge,

¹³ ni ö pïïth dhäki mou ki pïïth dïëk mou ni nyaacge, ni tïm warkeyi ki gwel-bïrö ni päl jïïu, ni tïm jammi mou bëët ni thööth,

¹⁴ rou wär gwøgu, ni ba jït cwïnynyu ka atöör, ni ba wïl wïthu ki Wuuö Jwøk na näk Jwøu na käl uuni wøk ki yi ŋööm Ijep na näk po laŋ.

¹⁵ Wuuö Jwøk uuna bwødhe ki dï paap mo dwøŋ mo di lwäärö ki yie, mo yie da thwöre mo reyø, ka agarapi; ni beeye kany mo yie da køø, mo pïï ba joot yie; 'ba Wuuö Jwøk pïï akäl wøk ki ri kïnna teek døc kiperu.

¹⁶ Ni ö Wuuö Jwøki ni caam uuni dï paap ki møga cwøl ni meena, ni beeye møø mo kuc kwäyu dïkwøŋ. Wuuö Jwøk gïï mo leth akäl bäätu, kiper nou pwönynye, kiper nou päänynye, nee tïïe jïïu ki gïn mo beer ya aŋuudi.

¹⁷ Kanymør u köö ki cwïnynyu, ni ‹Beeye riek waŋ marwa ki teek bäätwa na tïïc japi ni thööth ii jïwa.›

¹⁸ Patha eni. Ŋata dou cädö kipere beeye Wuuö Jwøk na näk Jwøu, kiper beeye eni ni wø mooc uuni ki teek ki man jïtu ki jap kwärö, kiper nee luumma tuude na kööŋe ki gø jï kwäyu nee nyoodhe jïïu na adïëri, kaawat man bëëde dïcäŋi en.

¹⁹ «'Ba mara caana caanø jïïu dïcäŋi ennø. Ni näk mo wïthu wïl ki Wuuö Jwøk na näk Jwøu, ni caathu køør juu møøk, ni tïnynyu geni, ni lammu geni, u puta thumö na bäre bäre.

²⁰ Kaawat mano ö Wuuö Jwøki noo thöör wïth juurre mo en nyïmmu, uuni thuwø u di thöörö, kiper mana käru dwør Wuuö Jwøk na näk Jwøu leŋø.