Tiet Ciik 6 - Wëël Jwøk

Pwöc Modhe Kiper Ciik Mana Pere Letha Eni

¹ «'Ba ciik moi beege ciik ki luup ŋøl moa ö Wuuö Jwøki na näk Jwøu na kööm aani ki geni kiper nou pwönynya ki geni, nee kïthu bäät tïïc yi ŋöömmo cou yie nou lwørru na maru,

² kiper nee uuni ki wäätu ki nyïïkwaayu nee Wuuö Jwøk na näk Jwøu nee lwääru, ni ö ciiki moe moa köömma uuni ki geni ni gwøgu geni ki yïth nïr kwøw mou bëët, kiper nee nïr kwøw mou tïmge ni thööth.

³ 'Ba u na jø Icriel, wïnynyu gïï, ni gwøgu ge døc ki man kïthu geni bäät tïïc, kiper nou jïtu ki bëëtö mo beer, ni nyaayu ni tïmu nou thööth yi ŋöömma näk caak ki maar kïc päl yie, kaawat mana buugi ya Wuuö Jwøki na näk Jwø kwäyu jïïu.

⁴ «Wui, u na jø Icriel, wïnynyu gïn. Wuuö Jwøk na näk Jwøø beeye eni keere na Jwøk;

⁵ niï doo mëër ki Wuuö Jwøk na näk Jwøï ki cwïnyï bäre, ki jwïëyï bäre, ki teegï bäre.

⁶ 'Ba luup moi ni köömma uuni ki geni dïcäŋi en dou lääŋŋö ki cwïnynyu,

⁷ ni pwönynyu obwöre mou ki geni døc, ni bëëdu nou cara gïrge cooth kany wø pïïu piny mïëyu, ki kany wø cäädhu jöö, ki kany wø nyaaŋŋu dëëtu piny ki kany wø päyu.

⁸ Ni tïmge ni ge caala nyuudhi mo you twöö ceŋŋu, ni bëëtge kaamar gööre mo ena täärnyïmmu mo wïthu ba wïl ki geni.

⁹ Ni gööru geni dhøk uudi mou ki dhøk käälle mou.

¹⁰ «'Ba yi nyïme Wuuö Jwøk na näk Jwøu uuno kïth yi ŋöömma kööŋe kipere jï kwäyu ma Eeberam ki Aydhak ki Jeekap, kiper nee mëëk uuni, ni beeye ŋöömö mo yie da päänye mo døøŋŋø mo beyø mo ba geera uuni;

¹¹ ni yie da uudi mo päŋ ki jammi mo beyø mo ba kïtha uuni yïthge, ki iidhi mo ba koonya uuni, ka ajïniine mo yïthge da nyïïjenni mo perge leth mo ba piitha uuni; ni cämu ni jäŋŋu.

¹² 'Ba noo jootu gïïögø bëët, gwøgu rou ni ba wïl wïthu ki Wuuö Jwøk na käl uuni wøk ki yi ŋööm Ijep na näk po laŋ.

¹³ «Bëëdu nou lwäära Wuuö Jwøk na näk Jwøu, ni tïnynyu eni, ni kööŋŋu ri nyeŋŋe keere.

¹⁴ Kär dee juu møøk mo cäädhu køørge, ni beege juuk jøø en buutu yøø,

¹⁵ kiper Wuuö Jwøk na näk Jwøu ni en dïïu enø beeye Jwøk ma ŋat keec. Ni näk mou cäädhö køør juu møøk, wëëc Wuuö Jwøk na näk Jwøu puta liel dëëtu kaamar maac, ni thöör uuni bäät ŋøøm.

¹⁶ Kär Wuuö Jwøk na näk Jwøu päänynyu, kaawat mana päänynyu gø kanya cwøl ni Maca.

¹⁷ 'Ba ciik mo Wuuö Jwøk na näk Jwøu dou gwøø døc, ki pwöc moe, ki luup moa kööm uuni ki geni.

¹⁸ Ni tïïu ki gïn mo beer mo tiir nyïm Wuuö Jwøk, nou jïtu ki bëëtö mo beer, kiper nou cou ni lwørru ŋöömma beer na kööŋ Wuuö Jwøki kipere jï kwäyu,

¹⁹ ni riemu nyïïmännu wøk bëët, kaawat mana caan Wuuö Jwøki.

²⁰ «'Ba yi nyïme, kanyo ö obwöre mou noo pëënyge uuni ni köge, ni ‹?Pwöc ki ciik ki luup ŋøl moa ö Wuuö Jwøki na näk Jwøø na kööm uuni ki geni, gwøkwa ge kiperŋø?›

²¹ køøre ocaannu jï obwöre mou ni kööu, ni ‹Waana kwøŋ bëëtö na laaŋe jï Peerø yi Ijep; 'ba Wuuö Jwøk waana käl wøk ki teek bade.

²² Ni ö Wuuö Jwøki ni tïïc ŋïïce ki gïï mo rëëma ec mo døøŋŋø mo leth bäät Ijep ki nyenyge ma Peerø ki paare bäre, ni nëënö jïwa ki nyeŋwa.

²³ 'Ba Wuuö Jwøk waana käl wøk ki kaace, kiper nee wa kïth yi ŋöömma kööŋe kipere jï kwäyø, nee cïbe jïïø.

²⁴ Ni ö Wuuö Jwøki ni kööm waani ki man gwøkwa ciik moøgø bëët, ni kööm waani ki man lwäärwa eni na Jwøø, kiper nøø jïtø ki bëëtö mo beer ni bëëdø nøø kwøw, kaawat man bëëde dïcäŋi en.

²⁵ 'Ba ni näk wïthø yøø koorø, ni gwøø ciik moi nyïm Wuuö Jwøk na näk Jwøø, kaawat mana kööm øøni, marø doo tïmö ni beer nyïme.›