Tiet Ciik 5 - Wëël Jwøk

Pwöc Mana Ö Modhe Na Kööm Jø Icriel Ki Man Gwøkge Ciik Bëët

¹ Køøre Modhe jø Icriel bëët acwøle, ni kööe, «U na jø Icriel, cegu ïthu ni wïnynyu ciik ki luup ŋøl moo caana jïïu dïcäŋi en. Pwönynyu rou ki geni, ni gwøgu geni døc, ni kïthu geni bäät tïïc.

² Wuuö Jwøk na näk Jwøø atudö ki luubö ki øøni tier Kïn Körëp ni beeye Kïn Caynay.

³ Wuuö Jwøk luummögø käre tuudö ki kwäyø moa cääŋŋe, 'ba atuude ki øøni bëët, ø ni poot kwøw kany dïcäŋi en.

⁴ Wuuö Jwøk acäänö ki uuni ki dëëtu ki bäät kïdi ni dwøre cura dï maac.

⁵ Kar kaaca aana cuŋŋö yïthakiyu ki Wuuö Jwøk, kiper nee dwør Wuuö Jwøk køba jïïu, kiper mana lwäyu ki maac, nou kär eth bäät kïdi.

Ciik Moa Näk Apaar

⁶ «Køøre ena köö: ni ‹Beeye a na Wuuö Jwøk na näk Jwøu, na käl uuni wøk ki yi ŋööm Ijep, paana näk po laŋ.

⁷ « ‹Kär dee juu møøk jïrï këët nyïma.

⁸ « ‹Kär dëërï tëëŋŋï ki kït gïn mør jaak, mo caala kït gïrpiny mo ena maal, wala mo ena bäät piny, wala mo ena yi naam.

⁹ Kär geni lamï, ni ba tïnynyï geni, kiper aani na Wuuö Jwøk na näk Jwøï, aana Jwøk ma ŋat keec, ni jø wø män ki aani, gïïa bacge kïtha bäät obwöre moge ni jääla geni këël dää beenhnhe, ni put pïï ri ŋweer beenhnhe.

¹⁰ 'Ba jø wø mëër ki aani ni wø gwøk ciik 'moa, mëëya ni wø ba jøøl nyoodha nyoodhø jïge këël mano pïïe ri jiy ma kum kum.

¹¹ « ‹Kär nyeŋ Wuuö Jwøk na näk Jwøï cwølï jaak, kiper ŋat wø cwøl nyeŋ Wuuö Jwøk ki jaak ba doo wec Wuuö Jwøki ka ajäla.

¹² « ‹Gwøk cäŋ jwömö, nee bëëde ni ena kur keere na mar Jwøk, kaawat mana ö Wuuö Jwøki na näk Jwøï na kööm ïïni.

¹³ Tïïï ki nïne abïciel, ni tïïyï tïïe moa diï tïïö bëët ki yïth nïne moøgø.

¹⁴ 'Ba bïriet nïne beeye cäŋ jwömö jï Wuuö Jwøk na näk Jwøï. Kär dee gïn mo tïïyï dïcäŋöce, ïïni wala wäädï wala nyaarï, wala ŋat tïïc marï ma dïcwøø wala ma dhaagø, wala rwaath marï wala arëën marï wala lääy mør røk lääc paac moï, wala wëëllö mo path mo bëëdö ka ïïni, kiper nee ŋat tïïc marï mana näk dïcwøø wala ma dhaagø nee ree jwöme kaawat marï.

¹⁵ Caar wïïï ki mana bëëdï ni ïïna laŋŋø yi ŋööm Ijep, ni ö Wuuö Jwøki na näk Jwøï ni käl ïïni wøk kaace ki køør teek bade ki teek mare na dwøŋ. Kiper manøgønø, Wuuö Jwøk na näk Jwøï ïïna köömme ki man gwøgï cäŋ jwömö.

¹⁶ « ‹Wøør wäru ki meru, kaawat mana ö Wuuö Jwøki na näk Jwøï na kööm ïïni, kiper nee nïr kwøw moï thöönhge, ni jïtï ki bëëtö mo beer thuwø yi ŋöömmo cïp Wuuö Jwøki na näk Jwøu jïïu.

¹⁷ « ‹Kärï nägö ki dhaanhø.

¹⁸ « ‹Kärï kännö ki luk.

¹⁹ « ‹Kärï kwätö.

²⁰ « ‹Kärï cäänö ki tööt dëër wadu.

²¹ « ‹Kär cwïnyï pädhö kiper cï wadu, ni ba päl cwïnyï ki øt wadu, wala pwödhö mare, wala ŋat tïïc mare ma dïcwøø wala dhaagø, wala rwaath mare wala arëën mare; këël gïn mør jaak mo mar wadu, kär cwïnyï päl kipere.›

²² «'Ba Wuuö Jwøk luup moøgø acaane jïïu ni dwøre ena maal, kanya bëëdu ni dëëtu you cooŋ kanya ciel bëët tier kïdi, ni eni ena dï maac, yi pöölö yi muudhö mo cøl døc, ni bäŋe mør mo ee meet bäätge. Ni göör geni bäät opäp kïte ni mëëk gø aani.

²³ «Køøre kanya wïnynyu dwøl ki dï muunhnha cøl, ni maac liel bäät kïdi, dïbwöthe mo wïth tuŋi mou bëët ki jø døøŋŋø mou gena ö baŋa.

²⁴ Ni caange döötu jïra, ni köge, ni ‹Ennø, Wuuö Jwøk na näk Jwøø ajieme ki dööŋŋe anyoodhe jïwa, ni wïnywa dwøre ki dï maac. Dïcäŋi ajootwa møn ni këël Jwøk doo cäänö ki dhaanhø, poot løny jï dhaanhø ki man bëëde ni kwøw.

²⁵ ?'Ba aperŋø ni pootwa ni wa manynya thøø en? Kiper maac man ni dwøŋ en wa thööre thöörö; ni näk dwør Wuuö Jwøk na näk Jwøø poot cäŋwa ka wïnynyö, wa thøw.

²⁶ ?Aŋø, a ŋata ŋa dëët jø bäät piny bëët na wïny dwør Jwøa kwøw ni cäänö ki dï maac, kaamar waani na wïny gø, ni poot bëëdö ni kwøw?

²⁷ Ïïni, nyiik buut Wuuö Jwøk na näk Jwøø, ni wïnynyï gïïo caane bëët. Køøre gïïo caan Wuuö Jwøki na näk Jwøø jïrï bëët ocaanï jïwa. Køøre leŋwa leŋø, ni tïïcwa geni.›

²⁸ «Køøre Wuuö Jwøk luup moa caannu awïnynye kanya cäänu ki aani. Ni kö Wuuö Jwøki jïra, ni ‹Luup moa caan jøøgø jïrï awïnynya. Gïïa caange bëët beege luup mo beyø.

²⁹ 'Ba doo na ge puta bëëtö ki cwïny ma enøgønø na bëëde, ni ge lwäär ki aani ni ciik 'moa gwøkge gwøø cooth, doo beer; køøre geni ko obwöre moge ge doo jïtö ki bëëtö mo beer na bäre bäre.

³⁰ 'Ba ennø, ciï ni caanï gø jïge nee døøge kwör bëëte moge yïth oduŋkaare.

³¹ 'Ba ïïni, cuŋŋï buuta kany, nee ciik ki luup ŋøl ki gïïa kööm u ki ge bëët moo pwönynyï geni ki ge nee caana jïrï, kiper nee gwøkge yi ŋöömmo cïba jïge na marge.› »

³² «'Ba u na jø Icriel, Gwøgu rou, ni kïthu ciik moøgø bäät tïïc kaawat mana ö Wuuö Jwøki na näk Jwøu na kööm uuni. Käru gaa wøk bäät cwïyu wala bäät cämmu.

³³ Cäädhu ki køør ciik bëët moa ö Wuuö Jwøki na näk Jwøu na kööm uuni ki ge, kiper nou bëëdu nou kwøw, nou jïtu ki bëëtö mo beer, ni ö cwiiri mou ni thöönhge yi ŋöömmo lwørru na maru.