Tiet Ciik 4 - Wëël Jwøk

Pwöc Mana Ö Modhe Na Kööm Jø Icriel Ki Man Leŋge Dwør Jwøk

¹ Køøre Modhe aköö, ni «Ennø, u na jø Icriel, beerra man leŋŋu ciik ki luup ŋøl mo Wuuö Jwøk mo pwönynya uuni ki ge, kiper nee kïthu bäät tïïc, kiper nou bëëdu nou kwøw nou cou yi ŋöömmo cïp Wuuö Jwøki na näk Jwø kwäyu jïïu, nee lwørru na maru.

² Kär dee luubö mo meedu bäät luup mo köömma uuni ki geni, ni kär dee luubö mo kälu wøk røkge thuwø, ni gwøgu luup Wuuö Jwøk na näk Jwøu mo köömma uuni ki geni.

³ Gïna tïïc Wuuö Jwøki dëët jøøa caath køør jwøa cwøl ni Baal-Pëëgör ri Kïn Baal-Pëëgör ajootu ki nyeŋŋu. Wuuö Jwøk na näk Jwøu jøøgø anääe dïïu.

⁴ 'Ba uuni bëët na göök dëër Wuuö Jwøk na näk Jwøu, u poot bëëdö nou kwøw këël dïcäŋi en.

⁵ «Ennø, uuna pwönynya ki ciik ki luup ŋøl kaawat mana ö Wuuö Jwøki na näk Jwøa na kööm aani, kiper nee geni kïthu bäät tïïc yi ŋöömö mano cou yie noo lwørru na maru.

⁶ Beerra man gwøgu geni ni kïthu geni bäät tïïc, kiper gïnögø tïmö na gïn mo nyootha leec wïc maru ki ŋäc acaara jï jiy bëët. Ni kanyo ö jiyi noo wïnyge gïr ciik moi, geno kööi, ni ‹Ka adïëri møn, wï juni ni dwøŋ en beege jiy mo wïthge leer ni wïthge da acaara.›

⁷ ?Aŋø, da wï jur mørø mo dwøŋ mo jïge da jwøk mo kare cään ki geni, kaamar Wuuö Jwøk na näk Jwøø ni wø kare cään ki øøni, ni wø wïny lam marø kany wø kwaaø gø?

⁸ ?Wala da wï jur mør mo dwøŋ mo jïge da ciik ki luup ŋøl mo caala ciik moi ni beyø ii ni cïba jïïu dïcäŋi en?

⁹ «'Ba ennø, gwøgu rou døc, ni bëëdu ni rou you koorø, kiper nee wïthu ba wïlge ki gïïa neennu ki nyeŋŋu, nee gïïge ba rwäänyge cwïnynyu ki yïth nïr kwøw mou bëët. 'Ba gïno tïïyu beeye ki man pwönynyu obwöre mou ki nyïïkwaayu ki geni nee ŋäcge.

¹⁰ Kär wïthu wïl ki dïcäŋa cuŋŋu nyïm Wuuö Jwøk na näk Jwøu tier Kïn Körëp, kanya kööe ki aani, ni ‹Cooŋ jiy kanya ciel buuta, kiper nee ge wëëga wïny luupa, kiper nee ge kwänyge ki bëët lwär mana dege a lwäärö ki gø ki yïth nïr kwøw moge bëët moo beetge bäät piny, kiper nee obwöre moge pwönyge thuwø.›

¹¹ Køøre uuna ö buut kïdi, ni cuŋŋu tiere, ni tïm pinynyi ni cøl ni jïte ki pöölö mo odhïŋ mo cøl døc, ni put maaci liel bäät kïdi, ni ö leep maaci ni pïïe maal døc.

¹² Køøre Wuuö Jwøk acäänö ki uuni ni eni ena dï maac. Dwøl mana caan luup ki gø awïnynyu, ni bäŋ dëël mo you neenø; 'ba beeye dwøl keere na wïnynyu.

¹³ Køøre luumma tuude ki uuni na kööm uuni ki gø nee kïthu bäät tïïc acaane jïïu, ni beege ciik moa näk apaar. Ni göör geni piny bäät opäp kïte ariiø.

¹⁴ Kar kaaca Wuuö Jwøk aana köömme ki man pwönynya uuni ki ciik ki luup ŋøl, kiper nee kïthu bäät tïïc yi ŋöömö mano cou yie noo lwørru na maru.

¹⁵ «'Ba dïcäŋa cään Wuuö Jwøki ki uuni bäät Kïn Körëp ni eni ena dï maac, kar kaaca bäŋ gïn mo you joodø mo caala dëël. Kiper manøgø nø, beerra man gwøgu rou døc,

¹⁶ kiper nou ba tïïu ki gïï mo kännö ki raay, ni beeye ki man tëëŋŋu dëëtu ki kït gïrpiny jaak mo kïte caala kït dïcwøø wala kït dhaagø, nee lammu;

¹⁷ ni ba tëëŋŋu dëëtu ki kït gïrpiny mo kïte caala kït lääy mo bëëdö bäät piny, wala kït wenyø ni wø määdö maal;

¹⁸ wala kït gïrpiny mo muulö bäät ŋøøm, wala kït rëëö ni wø en naam.

¹⁹ 'Ba kany wø raŋŋu maal, nou jootu cäŋ ki dwääy ki ceer, ni wø en maal, gwøgu rou nee wïthu ba maaŋŋi ki man tïme nou lama geni ni tïnynyu geni. Kiper gïïögø beege gïïa cïp Wuuö Jwøki na näk Jwøu jï jiy bëët moa en bäät piny.

²⁰ 'Ba Wuuö Jwøk uuna lwøre ni käl uuni wøk ki Ijep na näk caala këën thäth mo liel, kiper nou tïmu ni uuna jiy moa näk thööge, kaawat man bëëdu dïcäŋi ennø.

²¹ «'Ba Wuuö Jwøk awëër ki aani kiperu, ni put kööŋ ni aani Naam Jördan ba daa ŋølø na bäre bäre, naa ba løny thuwø ki man cøøa yi ŋöömma beer mano cïp Wuuö Jwøki na näk Jwøu jïïu na maru.

²² Kiper aani, a thøøa yi ŋöömmi en, naa ba løny ki man ŋøla Naam Jördan. 'Ba uuni, uuno ŋut løøga, ni lwørru ŋöömmece ni beer ice.

²³ 'Ba ennø, gwøgu rou kiper nee wïthu ba wïlge ki gïna tuut Wuuö Jwøki na näk Jwøu ki uuni, ni ba tëëŋŋu dëëtu ki kït gïrpiny mo kïte caala kït gïn mør jaak, mo uuno kööm Wuuö Jwøki na näk Jwøu kiperge, ni kär tïïyu.

²⁴ Kiper Wuuö Jwøk na näk Jwøu beeye Jwøk ma ŋat keec, ni caala maac ni wø thöör jiy.

²⁵ «'Ba kanyo tïme ni uuno nø bëëtö ki kany mo bäär yi ŋöömmo cou yie, ni uuno jïtö ko obwöre ki nyïïkwaayu, kär dee gïï mo kännö ki raay mo tïïyu, ni beeye ki man tëëŋŋu dëëtu ki kït gïn mør jaak nee lammu, ni beeye gïn mo nëëni ni raac ki nyïm Wuuö Jwøk na näk Jwøu, nou cwaata yie këël mano wëëre.

²⁶ Dïcäŋi en maal ki piny otïmö ni beege gïïo ŋäc luummi en yïthakiyø ki uuni kiper gïno raac noo pïï dëëtu. Ni näk gïna caan Wuuö Jwøki ba leŋŋu, u laara thumö kany mo cään en wï ŋöömö mano cou yie nee lwørru na maru løø Naam Jördan løøga. U ba bëëdö ki kany mo bäär yi ŋöömö manøgø këët, 'ba u put ka thöör na bäre bäre.

²⁷ Køøre Wuuö Jwøk uuno keethe dï wïth juurre, ni dööŋŋu nou nøk yïthakic wïth juurre moo ö Wuuö Jwøki noo riem uuni dïge.

²⁸ 'Ba uuno tïmö nou tïnynya juu møøk moa tïïc jiyi ki ceŋge kaace, ni beege jenni ki kïte mo otieŋø na juu, ni juu mo ba räŋö, ni ba wïnyö, ni ba cämö, ni bäŋ gïn mo ŋwääi jïge.

²⁹ 'Ba Wuuö Jwøk na näk Jwøu omanynyu kanyo enu kaace, 'ba eno jootu kanyo näk mo eni you manynyø ki cwïnynyu ki jwïëyu bäre.

³⁰ 'Ba yi nyïme, kanyo tïme ni gïïögø bëët opïï bäätu, nou ena yïth gïï mo leth, uuno døø baŋ Wuuö Jwøk na näk Jwøu, ni leŋŋu dwøre.

³¹ Kiper Wuuö Jwøk na näk Jwøu beeye Jwøk mo yie bäth; u ba wiie, u ba raanynye, ni wïïe ba wïl ki luumma tuude na kööŋe ki gø jï kwäyu.

³² «'Ba ennø, pëënynyu rou døøc, ni cädu kiper cwiiri moa cääŋŋe moa dïkwøŋ cøøn, ki mana täge ki dïcäŋa ö Jwøki na cwääc dhaanhø bäät piny; ni pëënynyu piny bäre, ki mano täge ki buut piny man nø këël mano këët man nø. ?Aŋø, da teeŋ gïn mo dwøŋ mo otïïö mo caala man en na tïïc Jwøki kiperu? ?Wala da teeŋ gïn mo owïnyö mo caala teeŋ gïnögø?

³³ ?A da jiy mo owïny dwør Jwøk ni cäänö ki geni ni eni ena dï maac, ni bøthge ki thøø, kaawat maru na wïny gø nou poot bëëdö nou kwøw en?

³⁴ ?Aŋø, a jwøa ŋø na päär gø ki man kääde ki wï jur kiper dëëre dï wï jur mør, kaawat mana tïïc Wuuö Jwøki na näk Jwøu kiperu Ijep, na käl u wøk ki køør päärö mo teek, ki ŋïïce ki gïï mo rëëma ec, ki køør leny ki teek bade ki teek mare na dwøŋ, ki gïïa døøŋŋø na tïïe na kännö ki lwär, na jootu ki nyeŋŋu?

³⁵ 'Ba gïïögø anyooth jïïu kiper nee Wuuö Jwøk ŋäyu, ni beeye eni na Jwøk keere, ni bäŋ Jwøk mør këët.

³⁶ Ena cäänö ni eni ena maal, ni wëëk uuni wïny dwøre ni pwönynya uuni; ni nyooth maac mare na dwøŋ jïïu, ni wïnynyu luup moe ki dï maac bäät piny.

³⁷ 'Ba kiper mana ö Wuuö Jwøki na mëëre ki kwäyu, eni nyïïkwaacge ajiere, ni ö eni ki dëëre ni käl uuni wøk ki dï Ijep ki køør teek mare.

³⁸ Wuuö Jwøk wïth juurre mo døøŋŋø geni ki uuni, moa näk jïge da teek mo kaala teek maru, ariem wøk nyïmmu, kiper nee ŋöömö marge cïbe jïïu, nou kïth yie, nee ci jïïu na maru, kaawat man bëëde dïcäŋi en.

³⁹ «Kiper manøgønø, gïn wär ŋäyu dïcäŋi ennø, ni kïthu gø cwïnynyu, ni Wuuö Jwøk beeye Jwøk ni en maal bäre, ni en bäät piny bäre, ni bäŋ Jwøk mør.

⁴⁰ 'Ba gwøgu ciik moe ki gïïa kööm uuni ki ge mo caana jïïu dïcäŋi en, kiper uuni ki wäätu moo ööi køøru, nou jïtu ki bëëtö mo beer, ni tïm nïr kwøw mou ni thööth yi ŋöömmo cïp Wuuö Jwøki na näk Jwøu jïïu nee tïme na maru na bäre bäre.»

Luum Päänye Adäk Moa Cïp Kur Keerge Na Mo Gwøk Røk

⁴¹ Køøre Modhe päänye adäk ajiere løø Naam Jördan jï løø kur tuul-cäŋ, nee bëëtge ni ena kur keerge,

⁴² kiper nee ŋat mo nägö ki dhaanhø nee wø reŋ kaace, ni beeye ŋat mo wati ee nääö ni ba kame, ni bäŋ gïr män mo ena cwïnye ki gø dïkwøŋ. Teeŋ ŋatøgø løny jïre ki man reŋ yi pääny aciel røk päänye moøgø, kiper nee kwøe.

⁴³ 'Ba päänye moøgø na adäk yøø beege Böcör na en dï paap bäät thuur, yi ŋöömma näk ree ee päärö na näk mar jø tuuŋ Ruben, ki Ramöth na en Gelät na näk mar jø tuuŋ Gaat, ki Gölan na en yi ŋööm Baacan na näk mar jø tuuŋ Maneeca.

Jöö Mana Täk Caan Ciik Jwøk Ki Gø

⁴⁴ 'Ba kar kaace Modhe ciik Wuuö Jwøk acïp nyïm jø Icriel,

⁴⁵ ni beege pwöc ki ciik ki luup ŋøl moa caane jï jø Icriel kanya nø öge wøk ki Ijep.

⁴⁶ 'Ba kar kaaca geno løny ni ge ena løø Naam Jördan yi gool mana dïët ki Bëëth-Pëëgör na en yi ŋööm Cëëwön nyeny jø Amör na bëëdö yi Ëcbön. Nyenynyøgø abööt Modhe ki jø Icriel kanya nø öge wøk ki Ijep.

⁴⁷ 'Ba jø Icriel ŋööm nyeya ma Cëëwön ki ŋööm Ög nyeny Baacan, alwørge, ni beege nyeye ariiø mo jø Amör moa en løø Naam Jördan jï løø kur tuul-cäŋ;

⁴⁸ ni ŋöömmögø tägi ka Aröör, paana en deŋ Naam Arnön, këël mana këët Kïn Ciriyön, ni beeye Armön.

⁴⁹ Ni kälge gool bäre mana cwøl na Araaba na en løø Naam Jördan jï løø kur tuul-cäŋ, këël mana këët Naam Araaba na en tier Kïn Pedhega.