Tiet Ciik 32 - Wëël Jwøk

Duut Modhe

¹ 'Ba luup moa en yi duut na caan Modhe beege ii; ena köö, «Wui maal ki piny, beerra man cegu ïthu ki gïno caana; ni wïnynyu luup moo ö wøk ki dhaa.

² Beerra man tïm luup pwöc 'moa ni caala pï køth; ni tøønge kaamar thööy mo tøøna bäät luum mo marr; ni tïme kaamar køth mo thiinhnhi bäät gïï mo opiidhø;

³ kiper a køpa gïr Wuuö Jwøk. Beerra man pwøø Wuuö Jwøk na näk Jwøø kiper dööŋö mare.

⁴ Wuuö Jwøk na näk Jwøø teek, ni tïïe moe beege karge; ni uutjïëthe moe bëët tiir. Ena Jwøk mo mare di ŋäädhö, ni bäŋ gïn mo raac jïre; eni beer ni mare thïïŋ.

⁵ «'Ba jø Icriel gïïa tïïcge dëëre beeye gïï mo reyø. Kiper rääö marge gena tïmö ni patha obwöre moe, ni tïmge na beenhnhø mo raac mo döönni.

⁶ ?Aŋø, u na jø Icriel, u ka bøøre møn, ni wïthu ba leer, uuna cäŋ tïmö nou tïïya gïï mo reyø na kar gïïa beyø na tïïc Wuuö Jwøki jïïu? ?Aŋø, eni paa wääu na cwääc uuni, na tïïc uuni ni tietu këëtge piny?

⁷ «Parru wïthu ki nïne mo acääŋŋe, ni caarru wïthu ki cwiiri moa beet beenhnhe mou bëët. Pëënynyu wëëgu, nee caange jïïu; ni pëënynyu jäle mou thuwø, nee caange jïïu.

⁸ Jwøa Dwøŋ ni en Maal, kanya pääŋ ŋøøm jï wïth juurre, ni beeye kanya pääŋ jiy ki dïge, keee mo jiy aŋøre, ni cïp kur wäät Icriel kur keere ki køør kwäänge.

⁹ Kiper kure, eni na Wuuö Jwøk, beege jiye ma jø Icriel, ni beege geni na nyïïkwaac Jeekap na dööŋ jïre na moe.

¹⁰ «Gena joode ni bëëtö marge teek, ni caala bëët dï paap mo otal, na kany mo dïtëën mo lääy jwöŋö yie. Ni ö eni ni ciel geni dïër ni koor ge; ni gwøk ge kaamar guu waŋ.

¹¹ Kaawat man wø ö odhuuthi wø käl nyïïe wøk ki yi øde ni määde bäätge, ni peer bwöpe, ni käär nyïïe ki bäät bwöpe, Wuuö Jwøk thuwø jiye ma nyïïkwaac Jeekap akääre ni ee gwøø.

¹² Beeye Wuuö Jwøk keere na bwøth geni, ni bäŋ jwøk mør mo ena buutge.

¹³ «Gena wëëk Wuuö Jwøki bëëtö kwöra perge leth bäät thuuri; ni camge cam mana ciek yïth pwöth. Ni ö Wuuö Jwøki ni caam ge ki maar kïc man wø joot yi kïdi; ni caam ge thuwø ki mäth jenni mo wø piith yi ŋöömma näk gii.

¹⁴ Ni caam ge ki mäth dhäk, ki caa dïëk, ki rïŋ nyïïdïëk mo olør; ki rööm ma thwönhi mo beyø mo käla Baacan, ka atëëe ma thwönhi, ki beel mo beyø døc; ni mäthge ki kwøk nyïïomøki mo met.

¹⁵ «'Ba jø Icriel na jier Wuuö Jwøki nee bëëtge ki bëëtö mo tiir, kanya nø cämge ni lørge, ni døøŋ dëëtge, ni tïm dëëtge ni beyø, gena tïmö kaamar dhieŋ mo bädö; ni wecge Jwøk na cwääc geni, ni taakge eni na Jwøa teek ni wø køny geni.

¹⁶ Wuuö Jwøk atïïcge nee këëye ki køør juuga path na lamge. Ni cwaatge yi Wuuö Jwøk këël mana wëëre ki køør gïïa raac yie ki ge na tïïcge.

¹⁷ Gena cïpö ko olämme jï juu mo reyø mo patha Jwøk ma adïëri, ni beege juu mo kucge dïkwøŋ, na juu mo nyärö mo jootge cään mo kär wøør kwäcge dïkwøŋ.

¹⁸ U na jø Icriel, Jwøa teek na cwääc uuni aweyu, ni wïl wïthu ki eni na mooc uuni ki jwïëy.

¹⁹ «'Ba Wuuö Jwøk gïna tïïc wääte ki nyïïe, ni beege jø Icriel, ajoode, ni männe ki geni kiper mana cwaatge yie këël mana wëëre.

²⁰ Køøre ena köö, ni ‹Täärnyïma kana kanø ki geni; nee gïno tägi dëëtge yi nyïme nee jooda. Kiper gena beenhnhø mo raac, ni gena obwöre mo ba ŋääth.

²¹ Aana tïïcge naa këëya ki køør mana lamge juu mo patha adïëri, ni cwaatge yia këël mana wëëra kiper juu moge na näk oballe jaak. 'Ba ge tïïa tïïö nee këëge kiper jiy mo bäŋ karge; ni cwaada yïthge ki ri wï jur mo bäŋ gïn ŋääe.

²² Kiper wëër mara äpö kaamar maac, ni liele këël mano këët Ciöl, kanya näk kar bëët jwïëc jøøa näk othøw; ni waaŋ piny bäre ki gïïa en yie bëët ni thöör ge; këël kïte na näk tietge okëët piny waaŋe waaŋø.

²³ « ‹Gïï mo leth lööra bäät jø Icriel, ni thööya geni ka athëëre 'moa.

²⁴ Ge raany käci raanynyø, ni thumge ki täwe mo leth; ni thumge ki thumö mo raac døc. Ni jääŋŋa lääc paap baŋge nee ge cam; ni jääŋŋa thwöre mo dhøkge da cïm baŋge.

²⁵ Thøø otïmö ni dagø dï paac ki køør leny, ni tïm lwärri ni dagø yïth uudi; ni täk gïïögø dëët wøpe moa näk cwøw ki moa näk mään, ko obwöre moa therø, këël jäle moa näk wïthge da lwaar.

²⁶ Aana köö ni ge daa thöörö na bäre nee bäŋe dhaanhø mo par gïrge këët.

²⁷ 'Ba a lwäära ŋwøc mano tïïc nyïïmän; kiper kanymør tier luubö manøgø daakge daaø, ni köge ni beeye geni ki dëëtge na bööt jø Icriel, ni patha a na Wuuö Jwøk na tïïc gïnögø dëëtge.›

²⁸ «Jø Icriel beege jiy mo wïthge bäŋ acaara, ni tiet luup ba kwaanyge ni beer døøc.

²⁹ Doo na gena jiy mo wïthge leer, tier gïnögø dege kwanyø; ni caarge gïno tägi dëëtge yi nyïme.

³⁰ ?Aŋø, doo na ge kär wec Wuuö Jwøki, Jwøge na teek, na cïp geni ceŋ nyïïmänge, nyimän aciel jø Icriel ma kuma a dee gø riemmø nidïï? ?A nyïïmän ariiø thuwø jiy ma kume apaar a dege gø riemmø nidïï?

³¹ Ka adïëri møn, jwø nyïïmän ba caal Jwøk marø na teek; këël nyïïmän 'moø ki dëëtge gïnögø ŋäcge.

³² 'Ba nyïïmän moøgø ki dëëtge, gena jiy mo reyø kaamar jø Cødam ki Gømöra; ge caala nyïïomøki mo keec mo dëëtge da cïm.

³³ Ge caala køøŋ nyïïomøki mo tïïc ka cïm mar thwöl, ni beeye cïm mar thwöra no olwierø ni wø nääö.

³⁴ «'Ba Wuuö Jwøk aköö, ‹?Aŋø, gïr nyïïmän moøgø patha yaa kan cwïnya cøøn, ni luumge yaa göör piny yi wëëlö mara?

³⁵ Cool kwör beeye mara, ni ŋøl luup ena cera. Yi nyïme kanya wäŋŋa ni ge pädhö yie, ge puta pädhö, kiper ränynyö marge kare cäännö, ni ö gïïa lethi na reyø ni laar päth bäätge.›

³⁶ «'Ba kanyo ö Wuuö Jwøki noo neen gø ni teek mar jiye bäŋgø këët, ni bäŋ dhaanhø mo odööŋ këët, këël laŋŋø, kar kaaca jiye di ŋunnö, ni päth cwïnye ki gïrge, ge na laaŋe moe.

³⁷ Køøre Wuuö Jwøk jiye opëënynye ni kööe, ‹?Aŋø, age juuga teek mou, moa ŋääthu na kannu rou buutge?

³⁸ ?Aŋø, juuga cam dwäle mo olämme mou, na maath køøŋ nyïïomøki mou moa cïpu na muuce, ge enge kaa? Beerra man öge maal ni kønyge uuni, ni tïmge na juu mo kanu rou buutge.

³⁹ « ‹'Ba ennø, wär ŋäyu ni beeye aani keera na Wuuö Jwøk, ni bäŋ jwøk mør këët. Beeye aani ni wø wëëk dhaanhø thøø, ni beeye aani ni wø wëëk dhaanhø kwøw. Beeye aani ni wø wëëk jiy jïtö ki ŋwiili, ni beeye aani ni wø køny ŋwiili mo jiy. 'Ba bäŋ jwøk mør mo løny jïre ki man piem dhaanhø cera.

⁴⁰ Ka adïëri møn ceŋŋa ŋaaba maal, ni kööŋŋa ŋëëta keera, ni caana mara ni kööa,

⁴¹ ni tøŋa na beth paa paaø, ni täga ki ŋøl luup, ni tøŋ ena cera. Kwöra coola coolø dëët nyïïmänna, ni jääla jiy mo wø män ki aani.

⁴² Ni tïm dhøk tøøŋi 'moa ni thec ki remø; ni ö opëëllö mara ni thöör geni. Ni ö tøøk leny 'moa ni bïtge ki rem jiy moa näk okëërö ki tøøŋi, ki moa näk omaaø ri leny røk dïbwöthe mo nyïïmän.›

⁴³ «'Ba u na wïth juurre, beerra man mïn yïthu ki jic Wuuö Jwøk bëët, kiper Wuuö Jwøk kwör jiye di coolø, ni cool kwöre dëët nyïïmän moe, ni wëën raay moa tïïc jiy yi ŋöömma cïbe jïge.»

⁴⁴ 'Ba Modhe aöö ki Jøcua o Nun ni caan luup mo duut manøgø ni wïnyö jï jø Icriel bëët.

⁴⁵ 'Ba kanya ö Modhe na lønye ki caan luupögø bëët jïge,

⁴⁶ ena köö, ni «Gwøgu luup moi bëët ni köömma uuni ki ge dïcäŋi en; ni köömmu obwöre mou ki luup ciik moøgø bëët kiper nee gwøkge ni kïthge ge bäät tïïc.

⁴⁷ Kiper luup moøgø patha luup mo oballe jaak kiperu; 'ba beege luup mo duunnö ki kwøw jïïu. Ni luupögø nïr kwøw mou moo beetu meetge meedø yi ŋöömmo ŋutu yie løø Naam Jördan løøga noo lwørru na maru.»

Kanya Ö Jwøki Na Caan Thøw Modhe Ki Køør Bääyö Mare

⁴⁸ 'Ba ni poot na dïcäŋeca Wuuö Jwøk acäänö ki Modhe ni kööe,

⁴⁹ ni «Ciï ni ethï wï Kïn Nebø na en bäät Kïn Abarim yi ŋööm Möap na dïët ki Jerikö; ni neenï ŋööm Keenan mano cïba jï jø Icriel na moge.

⁵⁰ Køøre ïïno thøw bäät kïnno ciï bääte, ni läpï køør jø pou kaamar coku ma Aran na thøø bäät Kïn Öör na läp køør jø poge.

⁵¹ Gïnögø tägö dëërï kiper ïïni ki coku ma Aran uuna bääyö dëëra nyïm jø Icriel yi Kadëc na en dï paap Dhïn ri luum pï Meriba. Ni käru aani wøørø ki wödö ma kare nyïm jø Icriel.

⁵² Kiper manøgønø, løny jïrï ki man neenï ŋööm Keenan ni karï bäär ki gø; 'ba ba løny jïrï ki man ciï yi ŋöömmögø noo cïba jï jø Icriel enø.»