Tiet Ciik 30 - Wëël Jwøk

Bëëtö Mana Beer Mano Joot Ki Køør Mano Duu Baŋ Wuuö Jwøk

¹ «'Ba kanyo nø täk gïïögø bëët dëëtu, ni beege gwïëth ka acëënne moa cïba nyïmmu, kanyo parru wïthu ki geni nou ena kwöra ö Wuuö Jwøki na näk Jwøu na keeth uuni yïthge dï wïth juurre bëët,

² ni duuu baŋ Wuuö Jwøk na näk Jwøu, ni beege uuni ko obwöre mou, ni leŋŋu dwøre ki cwïnynyu bäre ki jwïëyu bäre ki køør luup bëët mo köömma uuni ki ge dïcäŋi en,

³ kar kaaca Wuuö Jwøk na näk Jwøu cwïnye pädhö ki gïru, ni duu uuni ki kwöra näk uuno maa ki tøŋ yïthge, ni cooŋ uuni kanya ciel ki dï wïth juurre bëët moa keeth uuni yïthge.

⁴ 'Ba këël na bëëde ni uuno keethø dï piny bäre, Wuuö Jwøk na näk Jwøu u cooŋe kanya ciel ki kwörögø, ni duu uuni ki kwöreka.

⁵ Ni ö Wuuö Jwøki na näk Jwøu ni duu uuni yi ŋöömma bëëdö na mar kwäyu, ni putu gø lwør na maru. Ni ö Wuuö Jwøki ni tïïc bëëtö maru ni beer, ni tïïc uuni nou thööth, ni tïmu nou kaala kwäyu.

⁶ 'Ba Wuuö Jwøk na näk Jwøu cwïnynyu ki cwïny nyïïkwaayu wiile wiilø nou mëërru ki eni, e na Wuuö Jwøk na näk Jwøu, ki cwïnynyu bäre ki jwïëyu bäre, kiper nou bëëdu nou kwøw.

⁷ Køøre Wuuö Jwøk na näk Jwøu acëënne moøgø bëët kïthe bäät nyïïmän mou ki bäät jiy moa yïthge reyø ki uuni na caan uuni.

⁸ Kar kaace uuno cäŋ tïmö ni dwør Wuuö Jwøk leŋŋu leŋø, ni gwøgu ciik moe bëët mo köömma uuni ki ge dïcäŋi en.

⁹ Køøre Wuuö Jwøk na näk Jwøu u wëëge kwärö døc ki køør tïïe bëët mo wø tïïyu ki ceŋŋu, ni tïïc obwöre moo nywøllu ni thööth, ki lääc paac mou, ki caammi moo ciek yïth ŋøøm mou. Kiper Wuuö Jwøk yie cäŋa mïnnö ki uuni, ni tïïc bëëtö maru ni beer, kaawat mana bëëde ni yie met ki kwäyu.

¹⁰ Gïïögø tïïc Wuuö Jwøki tïïö ni näk mo dwøre leŋŋu leŋø, ni gwøgu ciik moe moa näk ogöör piny yi wëël ciik man, ni duuu baŋ Wuuö Jwøk na näk Jwøu ki cwïnynyu bäre ki jwïëyu bäre.

Luubö Mana Caan Kiper Man Jier Bëët Kwøw Wala Bëët Thøø

¹¹ «'Ba ciik man ni köömma uuni ki gø dïcäŋi en patha ciik mo teek kiperu ki man kwanynyu tiere, ni patha gïn mo kare bäär ki uuni.

¹² Ciik manøgø ba caal gïn mo ena maal, mou cäänö kipere, ni kööu, na ‹?Aŋa noo ci maal kiperø, nee käle jïïø, ni caan gø jïïø nee wïnynyø, kiper nee gwøø?›

¹³ Ni ciik manøgø ba caal gïn mo ena løø naama dwøŋ løøga, mou cäänö kipere, ni kööu, na ‹?Aŋa noo ŋut løø naama dwøŋ løøga kiperø, nee käle jïïø, ni caan gø jïïø nee wïnynyø, kiper nee gwøø?›

¹⁴ 'Ba luubö manøgø kare cään ki uuni døc, ni ena dhøgu, ni ena cwïnynyu, kiper nee gwøgu.

¹⁵ «Neennu, dïcäŋi kwøw ki bëëtö mo beer acïba nyïmmu, ni cïba thøø ki bëëtö mo teek nyïmmu.

¹⁶ 'Ba a köömma uuni dïcäŋi ki man mëërru ki Wuuö Jwøk na näk Jwøu, ki man caathu køøre, ni gwøgu ciik moe ki luup ŋøl moe, kiper nou bëëdu nou kwøw ni nyaayu, nee Wuuö Jwøk na näk Jwøu nou gwïëdhe yi ŋöömmo cou yie nou lwørru na maru.

¹⁷ «'Ba mara caana caanø jïïu dïcäŋi ennø. Ni näk mo cwïnynyu gaa wøk, ni ba leŋŋu dwøre, ni ö wïthu ni maaŋŋi ni tïmu nou wøøra juu møøk, ni tïnynyu geni,

¹⁸ ka adïëri møn, u thum ki thøø. U ba bëëdö ki kany mo bäär yi ŋöömmo ŋutu yie løø Naam Jördan løøga nou cou yie nou lwørru na maru.

¹⁹ «Dïcäŋi ennø, maal ki piny atïmö ni beege gïïo ŋäc luummi en yïthakiyø ki uuni. Kwøw ki thøø acïba nyïmmu, ni cïba gwïëth ka acïëni nyïmmu. Kiper manøgønø, jierru kwøw, kiper nee uuni ki nyïïkwaayu nou bëëdu nou kwøw.

²⁰ 'Ba gïna dou tïïö kiree beeye ki man mëërru ki Wuuö Jwøk na näk Jwøu, ni leŋŋu dwøre, ni göögu ree, kiper beeye gïno jïtu ki kwøw ki køøre, noo døøc nïr kwøw mou mo thööth, kiper nou bëëdu yi ŋöömma kööŋ Wuuö Jwøki kipere ni cïbe cïbö jï kwäyu, ni beege Eeberam ki Aydhak ki Jeekap.»