Tiet Ciik 29 - Wëël Jwøk

Luubö Mana Tuut Wuuö Jwøki Ki Jø Icriel Na Nwøc Yi Ŋööm Möap

¹ 'Ba man beeye luubö mana tuut Wuuö Jwøki ki jø Icriel yi ŋööm Möap, na kööm Modhe ki gø, kiper nee caane jïge, ni Wuuö Jwøk nwøya luubö mana kwøŋ tuut ki geni tier Kïn Körëp.

² Køøre Modhe jø Icriel bëët acwøle, ni kööe jïge, ni «Uuni gïïa tïïc Wuuö Jwøki bëët yi ŋööm Ijep dëër Peerø nyeny Ijep ki jø tïïc moe bëët, ki gïïa tïïe ri ŋöömme, ajootu ki nyeŋŋu.

³ Kwör päärö moø ni døøŋŋø yøø, ni beege ŋïïce moa døøŋŋø ki gïï mo rëëma ec, ajootu ki nyeŋŋu.

⁴ 'Ba këël dïcäŋi en Wuuö Jwøk u käre mooø ki cwïny ki man ŋäyu tiet gïïa tägö, wala waŋ mo neennu ge ki gø, wala ïth mo wïnynyu ge ki gø.

⁵ Uuna bwødha ki cwiiri ma pïëraŋween dï paap, na abïïe mou kär ränynyö dëëtu, ni war mou kär ränynyö tietu.

⁶ U kär cämö ki cam mo puura uuni, wala uuno mädhö ki køøŋ nyïïomøki wala teeŋ kwøŋ møøk; 'ba Wuuö Jwøk uuna mooe ki gïn cammu, kiper nee ŋäyu ni beeye eni na Wuuö Jwøk na näk Jwøu.

⁷ «'Ba kanya pïïyu kany, Cëëwön nyeny Ëcbön ki Ög nyeny Baacan, gena ö wøk baŋ leny baŋø, ni böötø geni.

⁸ Ni lwørø ŋøøm moge, ni cïbø gø jï jø tuuŋ Ruben ki jï jø tuuŋ Gaat ki jï thääŋ jø tuuŋ Maneeca nee dööŋe na marge.

⁹ Kiper manøgø nø, gwøgu luum tuut Wuuö Jwøki ki uuni en ki man kïthu gø bäät tïïc, nee gïïo tïïyu bëët thurge karge ni beyø jïïu.

¹⁰ «Dïcäŋi u bëët u cuŋŋö nyïm Wuuö Jwøk na näk Jwøu, ni beege cwøw mo Icriel bëët, ki kwääri mou, ki wïth tuŋi mou, ki jø døøŋŋø mou, ki cuume mou,

¹¹ ko obwöre mou, ki mään mou, ki juurre mo wø bëëdö dïïu, ni wø kaaŋ jenni mou ni wø wøm pïï jïïu;

¹² nou cuŋŋi kiper nou jïëyu ki luumma tuut Wuuö Jwøki na näk Jwøu ki uuni, na kööŋe kipere dïcäŋi en,

¹³ kiper nou tïïe ni uuna jiye dïcäŋi, ni ö eni ni bëëde na Jwøu, kaawat mana caan gø jïïu en, kaawat mana kwøŋ kööŋ ki gø jï kwäyu ma Eeberam ki Aydhak ki Jeekap.

¹⁴ 'Ba luumma tuut Wuuö Jwøki na kööŋe kipere, ba tuude ka uuni keeru,

¹⁵ 'Ba eni tudö ka øøni bëët ni nut ni cuŋŋi kany nyïm Wuuö Jwøk na näk Jwøø dïcäŋi en, ni tuude ka jiy mo poot kär nywølø.

¹⁶ «Bëëtö mana bëëdø ki gø Ijep ŋäyu, ni wääth mana cäädhø ki gø na pöödhø ki dï wïth juurre ŋäyu thuwø.

¹⁷ Gïïa raac yi Jwøki ki ge na en jï juurre moøgø, ni beege juu moa en jïge, ni beege jenni ki kïte na näk ege tieŋø, ni tïïcge ka warkey ki gwet-bïrö, ajootu thuwø.

¹⁸ 'Ba kär dee dhaanhø dïïu dïcäŋi, ma dïcwøø wala ma dhaagø, wala jø dhi øtø aciel, wala wï tuuŋ aciel, mo cwïnye døøa cään ki Wuuö Jwøk na näk Jwøø, ni cøøe ni tïny juu mo wïth juurre. Kär dee dhaanhø dïïu mo tïmö kaamar jaath mo nywøl ki nyïëdi mo reyø mo keec;

¹⁹ kiper kanymør teeŋ ŋatøgø luup acëënne moi wïnynye wïnynyö, ni ŋwöye ki cwïnye ni kööe, ni ‹Bëëtö mara poot na wøp jaak, këël na bëëda naa cäädhi ka køør teek cwïny mara.› Ka adïëri møn, teeŋ ŋatøgø, paac bäre ränynyö ki køøre.

²⁰ Wuuö Jwøk ba jïëy ki man wëën teeŋ ŋat ma enøgønø na bäre bäre, 'ba ki køør këëny mare, wëër mare liel kaamar maac dëër ŋatøgø. Køøre acëënne bëët moa näk ogöörö yi wëëlö man ööa bääte, ni ö Wuuö Jwøki ni raany nyeŋ gø, ni tïme ni kuc bäät piny.

²¹ Køøre ŋatøgø okwäny Wuuö Jwøki wøk yïthakic wïth tuŋi mo Icriel, nee gïn mo leth täge dëëre ki køør acëënne moa no ogöörö kiper luumma tuut yi wëël ciik man.

²² «'Ba beenhnhø mano ööi cään, ki juurre mo käla kany mo bäär, kanyo jootge täwe ki gïïa leth na tägö yi ŋöömmu, na tïïc Wuuö Jwøki, ge köö,

²³ ni ‹Ŋöömö bäre awaaŋ ni ränynye, ni tïme na bur ni caala acäbö, ni bäŋ gïn mo pïïth yie, ni bäŋ gïn mo ciek yie, ni bäŋe luum mo tuy yie, kaawat gïna tägö dëët päänye moa cwøl ni Cødam ki Gømöra ka Adama ki Dheböym, na raany Wuuö Jwøki ki køør wëër mare.›

²⁴ Køøre wïth juurre bëët ge köö, ‹?Aperŋø na ö Wuuö Jwøki na tïïc gïn yi ŋöömö man? ?Aperŋø na wëëre ki wëëyi ni dwøŋ døc en?›

²⁵ «Køøre oløk jiyi, ni köge, ni ‹Beeye kiper mana wecge luumma tuut Wuuö Jwøki na näk Jwø kwäcge kanya käl geni wøk ki Ijep,

²⁶ ni cige ni tïnyge juu møøk, ni wøørge geni, ni beege juu mo kucge dïkwøŋ, mo kär caan Jwøki jïge nee lamge.

²⁷ Kiper manøgønø, wëër mar Wuuö Jwøk aliel bäätge kaamar maac yi ŋöömmögø, ni ö acëënne bëët moa näk ogöörö yi wëëlö man ni kïthi bäätge.

²⁸ Ni ö Wuuö Jwøki ni cööt ge wøk ki yi ŋöömö marge ni eno gootø døc, ni cwïnye da wëër mo ba thiinh, ni riem geni yi ŋöömö mørø, kaawat man bëëde dïcäŋi en.›

²⁹ «Da luup mo tietge okanø mo ŋäya Wuuö Jwøki keere, 'ba luup bëët mo ciik moi na näk tietge ee nyuth øøni ko obwöre 'moø beege 'moø na bäre bäre, kiper nøø bëëdö ni ø gwøga ge.