Tiet Ciik 27 - Wëël Jwøk

Pwöc Kiper Man Göör Ciik Bäät Kïte, Ki Man Tïïc Gïn Wø Cïp Olämme Bääte

¹ Køøre Modhe ki jø døøŋŋø mo jø Icriel jiy aköömge, ni kö Modhe, ni «Gwøgu ciik moi bëët ni köömma uuni ki ge dïcäŋi en.

² 'Ba kanyo ŋutu løø Naam Jördan løøga yi ŋöömmo cïp Wuuö Jwøki na näk Jwøu jïïu, kanyo nø pïïyu løøga, kïte mo døøŋŋø wär cwödhu piny, ni rwøthu geni ki jïïr mo tar.

³ Køøre luup ciik moi bëët wär gööru bäätge, kanyo nø pïïyu yi ŋöömmo cïp Wuuö Jwøki na näk Jwøu jïïu, ni beeye ŋöömma näk caak ki maar kïc päl yie, kaawat mana caani ya Wuuö Jwøki na näk Jwø kwäyu jïïu.

⁴ 'Ba kanyo tïme ni uuno nø ŋut løø Naam Jördan løøga, kïte moøgø wär cwödhu piny bäät Kïn Gëëbal, kaawat man köömma uuni dïcäŋi en, ni rwøthu geni ki jïïr mo tar.

⁵ Køøre thuwø u doo tïïö ki gïn wø cïp olämme bääte mo tïïc ka kïte kaace jï Wuuö Jwøk na näk Jwøu. 'Ba kïte moøgø kär gut ki gïr tøk.

⁶ 'Ba gïn wø cïp olämme bääte man wø tïïyu jï Wuuö Jwøk na näk Jwøu dou tïïö ki kïte mo kär tøø, ni cïpu bääte ko olämme mo wø waaŋ bäre jï Wuuö Jwøk na näk Jwøu.

⁷ Ni cïpu bääte ko olämme mo wø duunni ki mëër, ni cämu kaace, ni mïn yïthu nyïm Wuuö Jwøk na näk Jwøu.

⁸ 'Ba luup ciik moi bëët wär gööru bäät kïte moøgø ni nyeŋge nëënö.»

⁹ Køøre Modhe ki dïlämme ni beege jø tuuŋ Libay, gena cäänö ki jø Icriel bëët, ni kö Modhe, ni «Wui jø Icriel, lïŋu ni cegu ïthu. Waŋcäŋi uuna tïmö ni uuna jic Wuuö Jwøk na näk Jwøu.

¹⁰ Kiper manøgønø, leŋŋu dwør Wuuö Jwøk na näk Jwøu, ni kïthu ciik moe ki gïïa ceme bäät tïïc, mo köömma uuni ki geni dïcäŋi en.»

Pwöc Kiper Luup Acïëni

¹¹ 'Ba ni poot na dïcäŋöca, Modhe jiy acäŋ köömmö ni kööe,

¹² ni «Kanyo ŋutu løø Naam Jördan løøga, jøw ocuŋŋi bäät Kïn Geridhan kiper nee luup gwïëth jïëcge na kar jiy beege jø tuuŋ Cimien, ki jø tuuŋ Libay, ki jø tuuŋ Juuda, ki jø tuuŋ Icakar, ki jø tuuŋ Jocep, ki jø tuuŋ Benjamen.

¹³ 'Ba jøw ocuŋŋi bäät Kïn Gëëbal kiper nee luum acïëni jïëcge na kar jiy beege jø tuuŋ Ruben, ki jø tuuŋ Gaat, ki jø tuuŋ Acer, ki jø tuuŋ Dhebulan, ki jø tuuŋ Daan, ki jø tuuŋ Naptali.

¹⁴ «Køøre jø tuuŋ Libay møøk luup moøgø dege caanø jï jø Icriel bëët ni döötge ege tïŋ maal, ni köge:

¹⁵ « ‹Acïëni oen bäät ŋato määny dëëre ki kït gïn mør jaak wala kït gïrpiny mo oleenyø, ni wø tïïc rëëmme ki cere, ni cwöth gø piny ni ee kanø; kiper beege gïï mo Jwøk yie raac ki ge.› «Køøre ojøl jiyi bëët, ni köge, ni ‹Kare!›

¹⁶ « ‹Acïëni oen bäät ŋato døøc wänni ki menni mo jööt.› «Køøre ojøl jiyi bëët, ni köge, ni ‹Kare!›

¹⁷ « ‹Acïëni oen bäät ŋato daak gïr waŋkeew mar watge.› «Køøre ojøl jiyi bëët, ni köge, ni ‹Kare!›

¹⁸ « ‹Acïëni oen bäät ŋato tïïc cwør nee gaa wøk ki waŋjöö.› «Køøre ojøl jiyi bëët, ni köge, ni ‹Kare!›

¹⁹ « ‹Acïëni oen bäät ŋato daaŋ luum ŋat ma jur mo bëëdö dïïu wala luum dhaanhø ma kïïc wala luum dhaagø ma cï thøø.› «Køøre ojøl jiyi bëët, ni köge, ni ‹Kare!›

²⁰ « ‹Acïëni oen bäät ŋato døø ri cï wänni ni bute ki gø, kiper eni døøya wänni mo jööt.› «Køøre ojøl jiyi bëët, ni köge, ni ‹Kare!›

²¹ « ‹Acïëni oen bäät ŋato ci baŋ gïn ma lääy jaak ni mare niine ki gø.› «Køøre ojøl jiyi bëët, ni köge, ni ‹Kare!›

²² « ‹Acïëni oen bäät ŋato døø ri coki wala nyi wänni ni bute ki gø.› «Køøre ojøl jiyi bëët, ni köge, ni ‹Kare!›

²³ « ‹Acïëni oen bäät ŋato døø ri mii cïïe ni bute ki gø.› «Køøre ojøl jiyi bëët, ni köge, ni ‹Kare!›

²⁴ « ‹Acïëni oen bäät ŋato 'näk watge ki piny.› «Køøre ojøl jiyi bëët, ni köge, ni ‹Kare!›

²⁵ « ‹Acïëni oen bäät ŋato kädi ki gïn wø cïp ki piny kiper nee dhaanhø mo bäŋ gïn mo ee baaø nee 'näk.› «Køøre ojøl jiyi bëët, ni köge, ni ‹Kare!›

²⁶ « ‹Acïëni oen bäät ŋato ba wëëk ciik moi thur karge ki køør mano ba kïth ge bäät tïïc.› «Køøre ojøl jiyi bëët, ni köge, ni ‹Kare!›