Tiet Ciik 26 - Wëël Jwøk

Pwöc Kiper Man Cïpö Ki Muuce Ri Gïïo Kwøŋ Ciek

¹ «'Ba kanyo cou yi ŋöömmo cïp Wuuö Jwøki na näk Jwøu jïïu enø nee dööŋe na maru, kanyo lwørru gø nou bëëdu yie,

² ŋati man nø dïïu doo lwötö ri gïïo kwøŋ ciek bëët yi ŋöömmo cïp Wuuö Jwøki na näk Jwøu jïïu enø, ni kïth gø yo gupa, ni ci kanyo näk ojier Wuuö Jwøki na näk Jwøu noo caa ri nyeŋŋe.

³ Ni ci baŋ dïlämi mano en bäät tïïc kar kaace, ni kööe jïgø, na ‹A caana gø dïcäŋi jï Wuuö Jwøk na näk Jwøa ni aana pïï yi ŋöömma kööŋ Wuuö Jwøki kipere jï kwäyø nee mëëk øøni.›

⁴ Køøre dïlämi gupa olwøre cer ŋatøgø, ni cïp gø piny nyïm gïn wø cïp olämme bääte mar Wuuö Jwøk na näk Jwøu.

⁵ Ni caan mare nyïm Wuuö Jwøk na näk Jwøu, ni kööe, ni ‹Kwara beeye ŋat Aram mo oööl mo manynya thøø, ni aa Ijep ni bëëde yie na jur ma wëëllö, ni ge nøk. 'Ba gena tïmö na wï jur mo dwøŋ, ni tïmge ni teek kaace, ni kwäänge thööth.

⁶ Ni ö jø Ijepi ni tïïge dëëtwa ki gïï mo reyø, ni caange waani, ni kïthge bäätwa ki tïïe mo teek.

⁷ Køøre waana jwöŋö dëër Wuuö Jwøk na näk Jwø kwäcwa, ni ö Wuuö Jwøki ni wïny döötwa, ni joot caannø marwa ki öölö marwa ki nyøøn mana nyøøn wa piny ki gø.

⁸ Ni ö Wuuö Jwøki ni käl wa wøk ki yi Ijep ki køør teek bade na dwøŋ, ki gïïa døøŋŋø na tïïe na kännö ki lwär, ki ŋïïce ki gïï mo rëëma ec.

⁹ Ni ö eni ni käl wa kany, ni cïp ŋöömö man jïwa, ni beeye ŋöömö mo caak ki maar kïc päl yie.

¹⁰ 'Ba ennø, Awuuö Jwøk, aana kännö ki gïïa ciek dïkwøŋ yi ŋöömma cïpï jïra.› Køøre gupa wär cïp piny nyïm Wuuö Jwøk na näk Jwøu, ni këël cøŋŋe piny nyïme, ni wøør gø.

¹¹ Køøre eni ki ŋat ma tuuŋ Libay ki ŋat ma jur mo bëëdö dïïu, yïthge doo mïnnö ki gïïa beyø bëët moa cïp Wuuö Jwøki na näk Jwøu jïre ki jø paare.

Pwöc Kiper Paac Wïth Jammi Moo Cïp Ri Dää Cwiiri

¹² «'Ba kanyo nø jiiŋŋu paac wïth jammi mou mo dää cwiiri, na näk cwiin cïp paac wïth jammi yie, paac wïth jammi moøgø wär cïpu jï jø tuuŋ Libay, ki juurre mo bëëdö dïïu, ki kïïe, ki määr thuunhnhi, nee cämge ni jäŋge yïth päänye mou.

¹³ Køøre ŋati man nø mare ocaane nyïm Wuuö Jwøk na näk Jwøu, ni kööe, na ‹Awuuö Jwøk, ki køør ciik moï bëët moa köömmï aani ki ge, aani paac wïth jammi mana cïba kur keere jïrï akäla wøk paara, ni puta geni cïp jï ŋat ma tuuŋ Libay, ki ŋat ma jur mo bëëdö dïwa, ki dhaanhø ma kïïc, ki dhaagø ma cï thøø. Ciik moï kära kaalø, wala dagø mo wïïa owïl ki ge.

¹⁴ Aani bäŋ gïn mo yaa camø ree kanya bëëda ni bääta da thøø, ni bäŋ gïn mo yaa daa ree kanya bëëda ni dëëra ba waany, ni bäŋ gïn mo yaa cïbö ree kiper dhaanhø mo othøw. Ïïni na Wuuö Jwøk na näk Jwøa, dwørï aleŋa, ni tïïa jammi bëët moa köömmï aani ki ge.

¹⁵ Awuuö Jwøk, beerra man lwïthï piny ki kar bëëtï na en kur keere maal, ni gwïëthï jiyï ma jø Icriel, ki ŋöömö na cïpï jïwa, ni beeye ŋöömma näk caak ki maar kïc päl yie, kaawat mana kööŋï ki gø jï kwäcwa.›

Pwöc Mana Caan Modhe Na Aŋuudi

¹⁶ «'Ba dïcäŋi en, Wuuö Jwøk na näk Jwøu köömma uuni ki man gwøgu ciik moi, ki luup ŋøl moi. 'Ba rou wär gwøgu ki man kïthu ge bäät tïïc ki cwïnynyu bäre ki jwïëyu bäre.

¹⁷ Dïcäŋi maru anø caannu, ni Wuuö Jwøk beeye na Jwøu, nou cäädhu køøre, nou gwøga ciik moe, ki luup ŋøl moe, nou leŋa dwøre.

¹⁸ 'Ba dïcäŋi Wuuö Jwøk thuwø mare acaane ni kööe ni uuna jiye moa perge leth jïre, kaawat mana caan gø jïïu, ni kööe ni ciik moe bëët dou gwøø.

¹⁹ Ni kööe ni uuno tïïe nou ena maal wïth juurre bëët moa cwääe, ni tïmu ni uuna jiy mo di pwøø, mo nyeŋŋu ŋäc, mo di wøørø, ni uuna jiy mou ena kur keerge jï Wuuö Jwøk na näk Jwøu, kaawat mana caan gø.»