Tiet Ciik 2 - Wëël Jwøk

Luubö Mana Lam Modhe Kiper Wääth Marge Dï Ŋööm Ëdöm Ki Dï Ŋööm Möap

¹ «Køøre øøna tïŋŋö ni cøøø dï paap ni ø cøra jöör wø ci Naama Kwaar, ni wïdø buut Kïn Cëër ki cwiiri mo thööth, kaawat mana caani ya Wuuö Jwøki jïra.

² «Køøre Wuuö Jwøk acäänö ki aani, ni kööe,

³ ni ‹Uuna nø wïdö buut kïdi man ki kany mo bäär nø. Ennø, beerra man løgu rou ni cou jï løø wï-piny,

⁴ ni köömmï jiy ni kööï, ni «Ennø, u pöödhö ki yi ŋööm tuuŋu, ni beege nyïïkwaac Icøø na bëëdö Cëër. Geni, geno lwäyi ki uuni. 'Ba gwøgu rou døc,

⁵ ni ba kammu geni; kiper bäŋ ŋöömö mo thiinh mo cïba jïïu røk ŋøøm moge. Këël mo thiinh mo caala kar thäny tielø bäŋgø mo cïba jïïu, kiper ŋööm Cëër, mïëya en bäät kïte, yaa nø cïp jï Icøø na mare.

⁶ 'Ba uuni, løny jïïu ki man ŋëëu ki cam baŋge ki gwel, kiper nou jïtu ki gïn cammu, ni ŋëëu ki pïï thuwø baŋge ki gwel, kiper nou jïtu ki gïn maathu.» ›

⁷ Kiper Wuuö Jwøk na näk Jwøu uuna gwïëdhe ki yïth tïïe mou bëët moa tïïyu. Thääyö mana thääyu ki gø dï paabi ni dwøŋ en ŋääe. 'Ba ki yïth cwiiri moi na pïëraŋween ii, Wuuö Jwøk na näk Jwøu bëëdö ka uuni, ni uuni ki dëëtu bäŋ gïn mo you canø.

⁸ «Køøre øøna pöödhö ki buut tuuŋø, ni beege nyïïkwaac Icøø na bëëdö Cëër. Ni wiiø jöör gool mana cwøl na Araaba mana pööth Elath ki Edhiyön-Gabir, ni gaaø ni aaø ki øtjöö mana cør dï paap Möap.

⁹ «Køøre Wuuö Jwøk aköö jïra, ni ‹Kär jø Möap miinnu, ni ba kammu geni ki leny, kiper bäŋ gïn mo cïba jïïu ri ŋöömö marge nee tïme na maru. Kiper poge na näk Ëër yaa nø cïp jï nyïïkwaac Løøt na marge.›

¹⁰ «'Ba jø Ëmim bëëdö kaace dïkwøŋ, ni beege jiy mo dëëtge døøŋŋø ni kwäänge thööth, ni ge bäyö døc kaamar jø Anak.

¹¹ 'Ba ki baŋ jø Möap ge cwøl ni Ëmim, ni ki baŋ jø møøk ge cwøl ni Rapayim, ka teeŋ man wø cwøl jø Anak ki gø.

¹² Jø Öör beege jøøa kwøŋ bëëtö Cëër dïkwøŋ; 'ba ŋöömge akäl nyïïkwaac Icøø ceŋge, ni 'näkge ge, ni läwge karge ni pïge piny yi ŋöömge, kaawat mana tïïc jø Icrielli dëët mïëri moa ŋøøpge cïp Wuuö Jwøki jïge na moge.

¹³ «'Ba Wuuö Jwøk aköö, ni ‹Ennø, uuni ki dëëtu ööu maal ni ŋøllu waŋ Naam Dherëët.› Køøre waŋ Naam Dherëët aŋølø.

¹⁴ 'Ba ki mana tïŋŋø ki Kadëc-Bernia këël mana ŋølø waŋ Naam Dherëët beeye cwiiri ma pïëradäk ka abära ennø, këël mana thum jiyi bëët moa en yi beenhnhø manøca, ni beege jiy moa näk løny jïge ki ciin baŋ leny. Gena thum ki thøø twïër møn, kaawat mana nø kööŋ Wuuö Jwøki jïge.

¹⁵ 'Ba cer Wuuö Jwøk bëëdö ni ena dëëtge ni raanynya geni twïër, këël mana thumge bëët.

¹⁶ «'Ba kanya tïme ni jø leny moøgø bëët thum ki thøø yïthakic jiy,

¹⁷ Wuuö Jwøk acäänö ki aani, ni kööe,

¹⁸ ni ‹Dïcäŋi u pöötha wøk ki dï Ëër na näk po jø Möap.

¹⁹ 'Ba kanyo tïm karu ni cään nou dïët ki ŋööm nyïïkwaac Amön, kär geni miinnu, ni ba kammu geni ki leny, kiper bäŋ gïn mo cïba jïïu røk ŋøøp nyïïkwaac Amön, kiper ŋöömmögø yaa nø cïp jï nyïïkwaac Løøt nee bëëde na marge.›

²⁰ «Ŋöömmögø beeye ŋöömö mo ŋäc ni mar juna cwøl ni Rapayim, kiper Rapayim okwøŋ bëëtö yie dïkwøŋ. 'Ba ge cwøl jø Amönni ni Jamjuma.

²¹ 'Ba këël na bëëtge ni gena jiy mo dëëtge døøŋŋø ni kwäänge thööth, ni ge bäyö kaamar jø Anak, gena raany Wuuö Jwøki nyïm jø Amön; ni ö jø Amönni ni kälge ŋöömge, ni läwge karge ni pïge piny yi ŋöömge.

²² Wuuö Jwøk gïn mo caala manøgø thuwø atïïe kiper nyïïkwaac Icøø na bëëdö Cëër, kanya raany jø Öör nyïmge. Ni ö nyïïkwaac Icøø ni kälge ŋööm jø Öör, ni läwge karge ni putge bëëtö yie këël dïcäŋi en.

²³ Teeŋ gïnögø thuwø atägö dëët jø Awim moa bëëdö yïth mïëri moa näk okëët Geedha. Jø Kaptör moa käl ya acuulla cwøl ni Kariit gena öö ni raanyge jø Awim, ni läwge karge ni putge bëëtö yi ŋöömge.

Luum Böötö Mar Cëëwön Nyeny Ëcbön

²⁴ «'Ba Wuuö Jwøk aköö, ni ‹Ööu maal ni aayu, ni ŋøllu Naam Arnön. Ennø, Cëëwön nyeny jø Amör na bëëdö Ëcbön ki paare bäre anø cïba ceŋŋu. Cou baŋe ni këëdu ki gø, ni tägu ki man lwørru ŋöömme ni tïme na maru.

²⁵ Dïcäŋi ennø, a tägö ki man kïtha cwïny jiy bëët mo bäät piny bäre ki lwär kiperu, ni tïïa geni ni ge böö ki uuni, ni kany wø wïnyge gïru, ge puta bwøk, ni tïm dëëtge ni kwanynyi.›

²⁶ «Køøre aana jäägö ki jiy ki dï paap paana cwøl ni Kedemöth, ni jääŋŋa geni ki dwør mëër baŋ Cëëwön nyeny Ëcbön, ni kööa,

²⁷ ni ‹Beerra man wëëgï wa pöödhö ki dï ŋöömmï. Waano cäädhi ki øtjöö mana dwøŋ keere, ni wa ba doo gaa bäät cwïïcwa wala bäät cämwa.

²⁸ 'Ba kiper nee wa jïtwa ki gïn camwa, beerra man dwøgï cam pwödhö ki waani ki gwel, ni dwøgï pïï pwödhö ki waani ki gwel kiper nee wa jïtwa ki gïn maathwa. 'Ba gïn manywa keere beeye ki man wëëgï wa pöödhö ki dï paarï,

²⁹ kaawat mana tïïc nyïïkwaac Icøø na bëëdö Cëër, ki jø Möap na bëëdö Ëër, këël mano ŋølwa Naam Jördan nee wa pïïcwa yi ŋöömmo cïp Wuuö Jwøki na näk Jwøwa jïwa.›

³⁰ 'Ba Cëëwön nyeny Ëcbön kär jïëy ki man pöödhø ki dï paare, kiper Wuuö Jwøk na näk Jwøu wï Cëëwön nyeny Ëcbön adøøc mo teek, ni tïïc cwïny gø ni teek, kiper nee eni cïp ceŋŋu, kaawat man bëëde dïcäŋi en.

³¹ «Ni kö Wuuö Jwøki jïra, ni ‹Ennø, aana tägö ki man cïba Cëëwön ki paare ceŋŋu. 'Ba ennø, tägu ki man källu ŋöömme, ni putu gø lwør ni tïme na maru.›

³² «Køøre Cëëwön ki jiye bëët gena put ö wøk baŋ leny ki øøni, ni røømmø ki geni kanya cwøl ni Jäc.

³³ Ni ö Wuuö Jwøki na näk Jwøø ni cïp gø ceŋŋø, ni putø eni nyath ki wääte ki jiye bëët.

³⁴ Kar kaace päänye moe bëët aputø mac, ni ö cwøwi ki mään ko obwöre mo päänye bëët ni nääø geni na bäre, ni bäŋ dhaanhø aciel mo obøth.

³⁵ 'Ba gïïa kälø keerge beege lääc paac moa maaø, ki jammi moa twierø yïth päänye moa maaø.

³⁶ Ni bäŋ paac mo odhäthö jïïø, ki mana täge ka Aröör, paana en deŋ Naam Arnön, ki päänya en gool, këël mana këët ŋööm Gelät. Wuuö Jwøk na näk Jwøø, mïëyögø bëët acïp ceŋŋø.

³⁷ 'Ba ø kär ci buut ŋööm nyïïkwaac Amön moa en deŋ Naam Jabök, ki päänye moge moa en mïëya en bäät kïte, këël kwöra näk ø kär kööm Wuuö Jwøki na näk Jwøø ki man cøø yïthge.