Tiet Ciik 19 - Wëël Jwøk

Pwöc Kiper Päänye Moo Tïïc Na Kwör Gwøk Røk

¹ «'Ba kanyo ö Wuuö Jwøki na näk Jwøu noo thöör wïth juurre moo ŋøøpge cïbe jïïu, kanyo lwørru ŋøøm moge, nou bëëdu yïth päänye moge, ki yïth uudi moge,

² päänye adäk wär cïbu kur keerge kiper dëëtu, ni beege päänye mo ena dïër yi ŋöömö maru mano cïp Wuuö Jwøki na näk Jwøu jïïu nou lwørru na maru.

³ Ni pääŋŋu ŋöömmu mano cïp Wuuö Jwøki na näk Jwøu jïïu na kwöre adäk, ni tïnynyu dëëtu ki uutjïëthe moo ci yïth päänye moø na adäk yøø, kiper nee ŋat mo nägö ki dhaanhø nee wø reŋ yi pääny aciel dëët päänye moøgø.

⁴ «Gïna doo bëëdö ni caala ciik kiper ŋat mo nägö ki dhaanhø nee reŋ yi pääny aciel røk päänye moøgø nee kwøe beeye en: Ŋat wäro näk watge ni ba kame, ni bäŋ män yïthakicge dïkwøŋ,

⁵ teeŋ man wø aa dhaanhe paap ki nyawatge, ni ge ŋutö ki jenni, kanyo ŋute ki jaath, ö leyi ö kere ri løk ni pï ri nyawatge, no ö nyawatge ni thøøe, teeŋ ŋatøgø løny jïre ki man reŋ yi pääny aciel røk päänye moøgø, nee kwøe.

⁶ Kiper kanymør ŋato cool kwör gootø døc, ni reŋ køør gø ni mak gø ni 'näk gø, kiper mana tïm øtjöö ni bäär, këël na bëëde ni gïna tïïe ba doo duunnö ki thøø bääte, kiper bäŋ män yïthakicge dïkwøŋ.

⁷ Ni beeye tiere gø en ni köömma uuni ki man cïbu päänye adäk kur keerge kiper dëëtu.

⁸ «'Ba ni näk Wuuö Jwøk na näk Jwøu ŋöömmu nyaanhe nyaanhø, kaawat mana kööŋe ki gø jï kwäyu, ni cïp ŋøøm bëët jïïu moa caane ni cïbe cïbö jï kwäyu,

⁹ ni koorru wïthu ki man gwøgu ciik moi ni köömma uuni ki ge dïcäŋi en, ni mëërru ki Wuuö Jwøk na näk Jwøu, nou caatha køøre cooth, uuni päänye adäk møøk dou meeda bäät päänye moi na adäk ii kiper dëëtu.

¹⁰ Gïnögø otïïyu kiper nee dhaanhø mo bäŋ ajäla bääte nee remme ba køny piny dï ŋöömö maru mano cïp Wuuö Jwøki na näk Jwøu noo dööŋ jïïu na maru, nee bäŋe kwör mo en bäätu.

¹¹ «'Ba ni näk da dhaanhø mo män ki watge, ni møør piny nyïme, ni ö maal, ni gøøc gø, ni thøøe, ni reŋ yi pääny aciel røk päänye moi na adäk ii,

¹² jø døøŋŋø mo pääny mana bëëde yie doo jäägö ki jiy ni lwørge eni kaace, ni duuge gø cer ŋata doo cool kwör, kiper nee 'näk.

¹³ 'Ba kär cwïnynyu pädhö kipere, 'ba putu kwör ŋata näk bäŋ gïn mo ee baaø cool dï pou ma Icriel, kiper nee bëëtö maru tïme ni beer.

Pwöc Kiper Nyeŋ Keee

¹⁴ «Kär dee ŋat mo daaga gïna nyooth keew mar watge kare, mana no ocwöth kwäyu piny dïkwøŋ, yi ŋöömmo dööŋ jï ŋati man nø yi ŋöömmo cïp Wuuö Jwøki na näk Jwøu jïïu nou lwørru na maru.

Pwöc Kiper Jø Wø Lööŋŋi

¹⁵ «U ba doo jïëy ki luum dhaanhø aciel keere mo köö kar løøk, ni ‹Gïnögø na tïïyi ya ŋatøgø, a nutö.› 'Ba luubö doo tïmö na kare ki køør gïna caan jiyi ariiø wala adäk moa tïïc gïnögø buutge.

¹⁶ «Ni näk da dhaanhø mo cäänö ki tööt dëër dhaanhø mør kar løøk, ni kööe ni ŋatøgø da gïn mo raac mo ee tïïö,

¹⁷ geni na ariiø yøø ni pïëmö yïthakicge enø, wär cuŋge nyïm Wuuö Jwøk, nyïm dïlämme ki jø wø ŋøl luup yïth nïne moøgø.

¹⁸ Ni ö jø wø ŋøl luup ni pëënyge geni, ni tetge geni døøc. 'Ba noo jootge gø ni ŋata löö ki watge caana tööt, ni eni löö ka gïn mo patha adïëri,

¹⁹ eni gïna cooŋe ki cwïnye nee tïïc dëër watge wär tïïc dëëre, nou raanynya gïna raac na en dïïu.

²⁰ Køøre owïny jiy møga ni lwäcge, ni ba tïïge ki teeŋ gïno ni raac enø dïïu këët.

²¹ 'Ba kär cwïnynyu pädhö kipere, kiper jwïëy cool ka jwïëy, ni kwör waŋ cool ka waŋ, ni kwör lëëö cool ka lëëö, ni kwör cenø cool ka cenø, ni kwör tielø cool ka tielø.