Tiet Ciik 17 - Wëël Jwøk

¹ «Kär dee ŋat mo cïpö ki dhieŋ wala røømmø no olämi jï Wuuö Jwøk na näk Jwøu mo da gïn mo oränynyö dëëre, wala da gïn mo ogwäyö ree, kiper beeye gïn mo Wuuö Jwøk na näk Jwøu yie raac ki gø.

Pwöc Kiper Gïno Tïïc Kiper Ŋat Mo Wøøra Juu Møøk

² «'Ba ni näk mo da dïcwøø wala dhaagø mo bëëdö dïïu, yïth päänye mou moo cïp Wuuö Jwøki na näk Jwøu jïïu, mo ojoodø ni tïïö ki gïn mo raac nyïm Wuuö Jwøk na näk Jwøu, ni dhala luumma tuut Wuuö Jwøki ki jiye,

³ ni aae ni tïny juu møøk, ni lam geni, wala lama cäŋ wala dwääy wala jap maal bëët mou kära köömmö ki geni nee lammu,

⁴ kanyo caani jïïu wala noo wïnynyu gø, wär tier gïnögø manynyu ni pëënynyu gø døøc. 'Ba ni näk moo tïmö na adïëri møn, noo joodø ni gïna näk Jwøk yie raac ki gø ee tïïö dï Icriel,

⁵ dïcwøønøca wala dhaaŋŋeca na tïïc gïna raac enø, wär kïthu dhi kiir maru, ni këëru gø ki kïte këël mano thøøe.

⁶ Teeŋ ŋatøgø wär näk ki køør gïno caan jøøa tïïc gïnögø buutge, ni beege jiy ariiø wala jiy adäk. 'Ba kär dee dhaanhø mo 'näk ki køør gïn mo caana dhaanhe acielli.

⁷ 'Ba jøøa tïïc gïnögø buutge, ceŋge wär kwøŋge møør maal ki man 'näkge gø, køøre ceŋ jiy møga wär läwge cään, nou raanynya gïna raac na en dïïu.

Pwöc Kiper Gïno Tïïc Kiper Løøk Mo Teek

⁸ «'Ba ni näk da løøk mo teek døc mo løøa nyïm dïŋut luup mou, mo ba løny jïge ki man ŋølge gø, kiper man näk di kamø wala ba kam, teeŋ ka luum kwör, ki luum gïïpinyi, ki luum gïï mo ŋwiili mo otägö yïthakic jiy, wär öge maal ni cige kanyo näk ojier Wuuö Jwøki na näk Jwøu.

⁹ Ni cige baŋ dïlämme, ni beege jø tuuŋ Libay, ki dïŋut luup mano en tïïci cere kar kaaca, ni pëënyge geni. Køøre luupögø oŋølge jïge.

¹⁰ 'Ba wär tïïcge kaawat mano ŋøli jïge ni ge ena kanyo näk ojier Wuuö Jwøki. Ni gwøkge rege ki man tïïcge gïïa pwöny geni ki ge bëët.

¹¹ 'Ba wär tïïcge ki køør luup mo opwöny geni ki ge, kaawat mano ŋøli jïge. Kärge gaa wøk bäät cwïïc wala bäät caam ki ri luup mo opwöny geni ki geni.

¹² 'Ba ŋato wïïe tïmö ni teek, ni ba wïny dwør dïlämi man wø cuŋŋi ni wø tïïö nyïm Wuuö Jwøk na näk Jwøu, ni ba wïny dwør dïŋut luup, ŋatøca wär 'nägu; nou raanynya gïna raac dï Icriel.

¹³ Køøre nø, gïnögø owïny jiyi bëët, ni lwäcge, ni ba tïm wïthge ni teek këët.

Pwöc Kiper Røøny Nyeya Ki Gïïo Tïïe

¹⁴ «'Ba kanyo cou yi ŋöömmo cïp Wuuö Jwøki na näk Jwøu jïïu, noo lwørru na maru nou bëëdu yie, kanymør u köö nou röönyö ki nyeya, kaamar wïth juurre moo en lagu kaace.

¹⁵ 'Ba wär näk mo nyeya mano røønynyu jiera Wuuö Jwøki na näk Jwøu, ni beeye dhaanhø mo lwørru ri tuuŋu, ni ba röönyu ki jur mo paa tuuŋu.

¹⁶ 'Ba nyenynyøgø ba doo määnyö ko okwëënyi mo thööth kiper dëëre, wala eni tïïya jiy nee døøge Ijep nee cäŋ jïtö ko okwëënyi mo thööth. Kiper acaan Wuuö Jwøki jïïu, ni ‹Käru døøk ki jöö manøgø këët.›

¹⁷ Ni ö nyeya manøgø ni ba määnye ki mään mo thööth, nee cwïnye ba gaa wøk ki Wuuö Jwøk; ni ba määnye ki warkey ki gwel-bïrö mo päl kiper dëëre.

¹⁸ «'Ba kanyo røøny nyeya manøgø, noo cïbi bäät wälu, eni ciik wär ŋwaal piny ki yi wëëlö mana en baŋ dïlämme, ni beege jø tuuŋ Libay.

¹⁹ Ni ö wëëlö manøgø ni bëëde buute ni kwäänö ki gø ki yïth nïr kwøw moe bëët, nee kwänynye ki man bëëde ni lwäär ki Wuuö Jwøk na näk Jwøe, ki man gwøk ciik bëët, ni kïth ge bäät tïïc,

²⁰ kiper nee cwïnye ba jïte ka atöör bäät tuuŋge, nee ba gaa bäät cwïïe wala bäät caame ki ri ciik, kiper nee eni ki nyïïkwaaye nee bëëtge ki cwiiri mo thööth yi nyec marge yïthakic jø Icriel.