Tiet Ciik 14 - Wëël Jwøk

Pwöc Kiper Jwøk Thøø Mana No Omänö

¹ «Uuni, uuna jic Wuuö Jwøk na näk Jwøu; kanyo näk mo dhaanhø jwöŋö kiper dhaanhø mo othøw, kär dëëre pwöde ki gïn mo beth, ni ba gwäär wïïe wøk.

² Kiper uuna jiy mo ena kur keerge jï Wuuö Jwøk na näk Jwøu. 'Ba Wuuö Jwøk uuna jiere kiper nou tïmu ni uuna jiy moa näk thööge dï jiy bëët moa en bäät piny.

Pwöc Kiper Gïïo Cam Ki Moa Näk Ba Cam

³ «Kär dee gïn mo Jwøk yie raac ki gø mo cammu.

⁴ 'Ba lääy moo cammu beege dhieŋ ki røømmø ka ateea,

⁵ ki purra, ki muur, ka aŋer, ko omøro, ki tääŋ, ki buba, ki röönna.

⁶ Lääy mano näk mo okiey moe okaaø, no okiey moe opääŋŋö na ariiø, ni luum man wø came ŋööe wøk ni cäŋ gø nyammø, beeye lääy mano cammu.

⁷ 'Ba røk lääy moa näk luum man wø camge ŋööge wøk ni cäŋge gø nyammø, ki røk moa näk okiey moge okaaø, athïrööl, ka apwøø, ka athinaak kär cammu; kiper këël na bëëtge ni luum man wø camge ŋööge wøk ni cäŋge gø nyammø, okiey moge kär kaa na ariiø. Teeŋ lääy moøgø beege lääy mo ba waany kiperu.

⁸ 'Ba røk lääy moa näk okiey moge okaa na ariiø, othur kär cammu. Kiper këël na bëëde no okiey moe okaa na ariiø, luum man wø came ba ŋöö wøk dhee ni cäŋ gø nyammø. Teeŋ lääy manøgø thuwø beeye lääy mo ba waany kiperu. Kär dee rïŋŋe mo cammu, wala u guta dëëre mana näk othøw.

⁹ «'Ba gïï mo løny jïïu ki man cammu geni røk gïï wø bëëdö yïth pïï bëët beege rec mo dëëtge da riith ki kwönne.

¹⁰ 'Ba gïn mo ree bäŋ riith, mo dëëre bäŋ kwönnö, kär cammu; kiper geno mänö ni kär cammu.

¹¹ «Løny jïïu ki man cammu weny bëët moa no ocaannø ni cammu.

¹² 'Ba weny mo ba dou camø beege coor, ka acuth, ko olwiith,

¹³ ki teeŋ akän bëët,

¹⁴ ki teeŋ agääe bëët,

¹⁵ ki uudö, ka agïïra, ko olwiith ki teeŋge bëët,

¹⁶ ki teeŋ tule bëët,

¹⁷ ka abööŋö, ki dïbëël, ka apööra mana näk ocurrunyö,

¹⁸ ka aliil, ko olwaarø ki teeŋge bëët, ka akwørajwöm, ka adilïga.

¹⁹ 'Ba twöŋi bëët mo dëëtge da bwöm ba dou camø, kiper geno mänö ni kär cammu.

²⁰ Wenyø mo ocaanø ni cammu, løny ki man cammu gø.

²¹ «'Ba gïn mo thøwa e keere kär cammu, kiper uuna jiy mo ena kur keeru jï Wuuö Jwøk na näk Jwøu. Løny jïïu ki man cïp gïn mo thøwa e keere jï wëëllö mo path mo bëëdö yi pääny maru kiper nee came, wala løny jïïu ki man dwøgu gø pwödhö ki jur. «Kär nyidiel thaallu ki caa menni.

Pwöc Kiper Paac Wïth Jammi

²² «Wär cïpu ki paac wïth jammi røk gïï wø ciek yïth pwöth mou ni wø piithu ki yi cwiir cooth.

²³ 'Ba gïïögø dou camø nyïm Wuuö Jwøk na näk Jwøu kanyo jiere noo caa ri nyeŋŋe. Ni gïïo cammu beege paac wïth jammi mou, ni beege mo beel, ki mo kwøk nyïïomøki, ki mo mädhi mou; ki kaai mo dhäk mou ki mo dïëk mou, kiper nou kwänynyu ki man lwäärru Wuuö Jwøk na näk Jwøu cooth.

²⁴ 'Ba kanyo ö Wuuö Jwøki na näk Jwøu noo gwïëth uuni yie, ni näk mo piny bäär døc, ni ba løny jï dhaanhø ki man kïth paac wïth jammi moe kanya jier Wuuö Jwøki na näk Jwøu noo caa ri nyeŋŋe kiper mana bäär kare,

²⁵ løny jïre ki man wiil paac wïth jammi moe ki gwel, ni kwany gwel cere ni ci kanyo jier Wuuö Jwøki na näk Jwøu.

²⁶ 'Ba kanyo pïïe kaace, løny jïre ki man ŋeew gwel ki gïïa manynye ki cwïnye jaak. Løny jïre ki man ŋëëe ki dhäk wala dïëk wala kwøk nyïïomøki wala teeŋ kwøŋ møøk, wala gïïo many cwïnye jaak, ni cam geni nyïm Wuuö Jwøk na näk Jwøu, ni mïn yie ki jø paare.

²⁷ 'Ba kär wïc wïl ki jø tuuŋ Libay mo bëëdö yïth päänye mou, kiper bäŋ ŋöömö mo odööŋ jïge na kurge yïthakiyu.

²⁸ «'Ba kany wø tïme na aŋuun dää cwiiri cooth, paac wïth jammi bëët moo joot ki yi cwiinøgø wär käli, ni cïbi kwör kän na en yïth päänye mou.

²⁹ Køøre jø tuuŋ Libay, kiper mana näk bäŋ ŋöömö mo odööŋ jïge na kurge yïthakiyu, ki juurre moa bëëdö dïïu, ki kïïe ki määr thuunhnhi moa en yïth päänye mou, geno ööi ni cämge ni jäŋge, kiper nee Wuuö Jwøk na näk Jwøu nou gwïëdhe ki tïïe bëët moo tïïyu ki ceŋŋu.