Tiet Ciik 11 - Wëël Jwøk

Par Luum Gïïa Tïïc Wuuö Jwøki Na Pwöc

¹ «'Ba uuni, u doo mëër ki Wuuö Jwøk na näk Jwøu, ni gwøgu ciik moe cooth, ki luup ŋøl moe ki gïïa kööm uuni ki ge.

² 'Ba wär ŋäyu dïcäŋi, ni paa wäätu na pwöny Wuuö Jwøki na näk Jwøu, 'ba beeye uuni ki dëëtu na pwönynyi ki køør gïïa jootu, ni beege dööŋö mare ki teek bade na dwøŋ,

³ ki ŋïïce moe ki tïïe moe moa tïïe Ijep dëër Peerø nyeny Ijep ki yi ŋöömme bäre,

⁴ ki gïna tïïe dëët jø leny mo Ijep ki dëët okwëënyi moge ki jïëth leny moge mo wø tut okwëënyi, kanya tïïc Naama Kwaar nee neejïk bäätge kanya ŋweecge køøru. Ni ö Wuuö Jwøki ni put ge thöör na bäre bäre kar kaaca.

⁵ Ni paa wäätu thuwø na joot gïïa tïïc Wuuö Jwøki jïïu dï paap këël mana pïïyu kany,

⁶ ki gïna tïïe dëër Daathan ka Abiram wäät Eliap nyïïkwaac Ruben, na ö ŋøømmi na pääe ki dïge ni put ge mwøny, ni beege geni ki jø mïëcge, ko oduŋkaare moge, ki jø tïïc moge, ki lääc paac moge bëët. Ni gïnögø täga dï jø Icriel ni nëënö jïge bëët.

⁷ 'Ba uuni ki dëëtu, tïïe moa døøŋŋø na tïïc Wuuö Jwøki bëët aneennu ki nyeŋŋu.

Luum Gwïëth Mano Joot Ki Køør Gwøk Ciik Jwøk

⁸ «Kiper manøgønø, beerra man gwøgu ciik bëët moi ni köömma uuni ki geni dïcäŋi en, kiper nou tïmö nou teek, ni cou yi ŋöömö ni lwørru gø na maru, ni beeye ŋöömmögø ni karu cään ki man ŋutu yie løøga enø nee lwørru na maru,

⁹ kiper nee cwiiri moo beetu yi ŋöömmögø nee tïmge ni thööth, ni beeye ŋöömma kööŋ Wuuö Jwøki kipere jï kwäyu nee cïbe jïge ki nyïïkwaacge, ni beeye ŋöömma näk caak ki maar kïc päl yie.

¹⁰ Kiper ŋöömö manøgø nou cou yie enø nou lwørru na maru, ba caal ŋööm Ijep na kälu yie, na wara piithu, ni jwøyu gø ki pïï mo kälu ki yi naam kaawat man wø jwøc ajïniina.

¹¹ 'Ba ŋöömö manø noo cou yie løøga enø, nee lwørru na maru, beeye ŋöömö mo yie da thuuri ki gøli, ni beeye ŋöömö mo jwøya køthi.

¹² Ni beeye ŋöömö mo ogwøk Wuuö Jwøki, ni Wuuö Jwøk na näk Jwøu bëëdö ni neeta gø cooth ki yi cwiir bäre.

¹³ «'Ba ni näk mo ciik moi ni köömma uuni ki geni dïcäŋi en you leŋø na karge, ni ciik moøgø beege ki man mëërru ki Wuuö Jwøk na näk Jwøu, ni tïnynyu gø ki cwïnynyu bäre ki jwïëyu bäre,

¹⁴ eni køth cwiir di jääŋö ki kanya näk kare, ni jääŋ mar dhi køth ki kanya näk kare kiper ŋöömmu, kiper nee beel mou ki nyïïjenni mou mo wø nyïïge nywøp na kwøŋ, ki mo wø nyïïge wel na mädhi nee ciekge jïïu.

¹⁵ Eni thuwø luum di cïbö yïth pwöle mou kiper lääc paac mou. 'Ba uuno bëëdö nou cämu ki caammi mou jaak ni jäŋŋu.

¹⁶ «'Ba gwøgu rou nee wïthu ba maaŋŋi, nou ba gaau wøk ki man tïnynyu juu møøk ni wøørru geni.

¹⁷ Kiper ni näk mo teeŋ gïnögø tïïyu tïïö, wëëc Wuuö Jwøk liel dëëtu kaamar maac, ni män køth, ni tïme ni bäŋ køth këët, ni ö pinynyi ni tïme ni bäŋ cam mo ciek yie; ni laaru thumö yi ŋöömmo beer enø noo cïp Wuuö Jwøki jïïu.

¹⁸ «Kiper manøgønø, luup mo caana jïïu ii, beerra man kïthu geni cwïnynyu ni lääŋŋu geni døc, ni tïmge ni ge caala nyuudhi mo you twöö ceŋŋu, ni bëëtge kaamar gööre mo ena täärnyïmmu mo wïthu ba wïl ki ge.

¹⁹ Ni pwönynyu obwöre mou ki geni døc, ni bëëdu nou cara gïrge cooth kany wø pïïu piny mïëyu, ki kany wø cäädhu jöö, ki kany wø nyaaŋŋu dëëtu piny, ki kany wø päyu.

²⁰ Ni gööru geni dhøk uudi mou ki dhøk käälle mou,

²¹ kiper nee nïr kwøw mou ki mo obwöre mou nee tïmge ni thööth bäät ŋöömma kööŋ Wuuö Jwøki kipere jï kwäyu nee cïbe jïge, nou bëëdu nou nut cooth nou kwøw, kaawat man bëët maalli ni nut cooth en.

²² «Kiper ni näk mo rou you maa ki man gwøgu ciik moi ni köömma uuni ki geni en, ni kïthu geni bäät tïïc, ni beeye ki man mëërru ki Wuuö Jwøk na näk Jwøu, ni caathu køøre cooth, ni göögu ree,

²³ Wuuö Jwøk wïth juurre moi bëët rieme wøk nyïmmu, ni lwørru ŋøøp juurre moø ni teek ni døøŋŋø geni ki uuni yøø,

²⁴ ni kany mo you gudö ki tietu jaak, tïmö na ŋöömö maru. Ni tïm päl ŋöömmu ni tägi ka dï paap mana en jï løø tier-piny, këël mano këët Libaanø na en jï løø wï-piny; ni cäŋ tägö ki Naam Upareeti na en jï løø kur tuul-cäŋ, këël mano këët naama dwøŋ na en jï løø kur pänh-cäŋ.

²⁵ Ni tïme ni bäŋ dhaanhø mo maar lønyø ki man cuŋŋe nyïmmu kany wø näk da leny. 'Ba Wuuö Jwøk na näk Jwøu jiy moo en yi ŋöömmo nyøønnu ki tietu bëët, yïthge othäŋŋi ni mooc ge ki lwär mo dwøŋ kiperu, kaawat mana caan gø jïïu.

²⁶ «Neennu, dïcäŋi gwïëth ka acëënne cïba nyïmmu.

²⁷ Ni näk mo ciik mo Wuuö Jwøk na näk Jwøu mo köömma uuni ki geni dïcäŋi en leŋŋu leŋø, u di gwïëdhö.

²⁸ 'Ba ni näk ciik mo Wuuö Jwøk na näk Jwøu ba leŋŋu, ni gaau wøk ki øtjöö man ni köömma uuni ki gø dïcäŋi en, ni caathu køør juu møøk mo kuyu dïkwøŋ, u di cienø.

²⁹ 'Ba kanyo ö Wuuö Jwøki na näk Jwøu noo kïth uuni yi ŋöömmo cou yie nee lwørru na maru, kar kaace nø, luup gwïëth ocaannu bäät Kïn Geridhan, ni caannu luup acïëni bäät Kïn Gëëbal.

³⁰ 'Ba kïte moøgø ena løø Naam Jördan løøga buut jöör wø ci jï løø kur pänh-cäŋ, ni ge ena buut jera døøŋŋø na näk mo Mörë yi ŋööm jø Keenan mo wø bëëdö dï goor Jördan ni wø cwøl na Araaba, ni wø neet røkge ki Gëlgela.

³¹ 'Ba ennø, karu anø tïmö ni cään ki man ŋutu løø Naam Jördan løøga, ki man cou nee ŋöömma cïp Wuuö Jwøki na näk Jwøu jïïu nee lwørru na maru. Ŋöömmögø olwørru møn ni putu bëëtö yie.

³² Køøre nø, rou wär gwøgu, ni ö ciiki ki luup ŋøl bëët mo köömma uuni ki geni dïcäŋi en, ni kïthu ge bäät tïïc.