Tiet Ciik 10 - Wëël Jwøk

Pwöc Modhe Kiper Ciik Moa Cäŋ Göör Bäät Opäp Kïte

¹ «'Ba kar kaace Wuuö Jwøk aköö jïra, ni ‹Tööï ko opäp kïte ariiø mo caala moa dïkwøŋ, ni tïïyï ka acandu jaath, ni ööï baŋa bäät kïdi.

² Køøre luup moa en bäät opäp kïte moa dïkwøŋ na gøøï piny, ocäŋa göör bäät opäp kïte moøgø; køøre nø, okïthï ya acanduk.›

³ «Kanyøgønø, aana tïïö ka acanduk ki jaadha cwøl ni cïta, ni tööa ko opäp kïte ariiø mo caala moa dïkwøŋ, ni cøøa ni etha maal bäät kïdi, no opäp kïte karge riedi ena cera.

⁴ Ni ö Wuuö Jwøki ni gööt bäät opäpögø ki gööre mo caala moa dïkwøŋ, ni beege ciik moa näk apaar na caan Wuuö Jwøki jïïu bäät kïdi, ni dwøre cura dï maac, yi cäŋa näk cäŋ acooŋa. Ni ö Wuuö Jwøki ni mëëk ge aani.

⁵ Køøre aana duu piny ki bäät kïdi, ni kïtha opäp kïte ya acanduk mana näk yaa nø tïïc, ni ge poot ena yie ennø, kaawat mana ö Wuuö Jwøki na kööm aani.»

⁶ ('Ba jø Icriel gena tïŋŋö ki kanya cwøl ni Bëëröth-Bene-Jaakan, ni pïïcge Möcëëröt. 'Ba Aran athøø kaace, ni koonyi; ni ö wääde ma Eliedhar ni läw kare ni tïïc tïï dïlämi.

⁷ 'Ba gena tïŋŋö kaace, ni cige Gudgöda, ni cäŋge tïŋŋö Gudgöda ni pïïcge Jöthbata, yi ŋöömma näk yie da nyeŋ näm mo yïthge da pïï.

⁸ 'Ba kanya poode ni ge ena lak Kïn Körëp, kar kaaca Wuuö Jwøk jø tuuŋ Libay acïp kur keerge, kiper na acanduk man wø nyooth luumma tuut Wuuö Jwøki ki jiy nee bielge, nee cuŋge nyïm Wuuö Jwøk nee eni tïnyge, nee ge gwëëthge ki nyeŋŋe; ni putge bëëtö ni ge tïïya tïïögø këël dïcäŋi en.

⁹ Kiper manøgø nø, jø tuuŋ Libay ge ba jïti ki ŋøøm yïthakic nyïïmëëkge, wala kany mo maara dööŋö jï nyïïkwaacge. 'Ba beeye Wuuö Jwøk noo dööŋ jïge ni caala ŋöömma doo dööŋ na kurge, kaawat mana caani ya Wuuö Jwøki na näk Jwøu jïge.)

¹⁰ «'Ba aani, aana ruu bäät kïdi ki nïne ma pïëraŋween, ni beeye dïcäŋ ki wäär, kaawat mana tïïa dïkwøŋ, ni ö Wuuö Jwøki ni cäŋ kwaac mara wïnynyö kar kaaca thuwø, ni käre jïëy ki man thöör uuni këët.

¹¹ Køøre Wuuö Jwøk aköö jïra, ni ‹Ö maal ni bwøthï maal nyïm jiy, nee cige yi ŋöömö, nee lwørge na marge, ni beeye ŋöömma kööŋa kipere jï kwäcge nee mëëga geni.›

Pwöc Modhe Kiper Man Lwäär Jwøk

¹² «?Ennø, u na jø Icriel, agïnaŋø ni many Wuuö Jwøki na näk Jwøu baŋu? Gïn many Wuuö Jwøki na näk Jwøu beeye ki man lwäärru eni, ni caathu køøre, ni mëërru ki eni, ni tïnynyu eni ki cwïnynyu bäre ki jwïëyu bäre,

¹³ ni gwøgu ciik Wuuö Jwøk, ki gïïa kööm uuni ki ge, mo caana jïïu dïcäŋi en, kiper nou bëënynyu.

¹⁴ «Neennu, Wuuö Jwøk na näk Jwøu, maal ki kare bäre, ki piny bäre ki gïïa en yie bëët, moe.

¹⁵ 'Ba Wuuö Jwøk abëëdö ni yie met ki kwäyu, ni mëër ki geni døc, ni beeye tiere gø na jier uuni, u na nyïïkwaacge, yïthakic wïth juurre bëët, kaawat man bëëde dïcäŋi en.

¹⁶ Ennø, wiillu cwïnynyu ni tïmu nou bëënna eni, ni ba bëëdu ni wïthu teek këët.

¹⁷ Kiper Wuuö Jwøk na näk Jwøu beeye Jwøk mo dwøŋŋa eni ki juu møga, ni ena kwääc kwääri, ni ena Jwøk mo dwøŋ mo teek, mo di lwäärö, mo ba jëënyö, mo ba ŋeew ki jammi mo wø cïp ki piny.

¹⁸ Eni luubö di ŋølø na kare jï kïïc ki cï thøø, ni eni mëër ki wëëllö mo path, ni cïpö jïre ki cam ka abïï.

¹⁹ Kiper manøgønø, u doo mëër ki wëëllö mo path, kiper uuna kwøŋ bëëtö na wëëlle mo path yi ŋööm Ijep.

²⁰ Lwäärru Wuuö Jwøk na näk Jwøu, ni tïnynyu eni, ni göögu dëëre, ni kööŋŋu ri nyeŋŋe keere.

²¹ Beeye eni na doo jiemø, ni beeye eni na Jwøu, na tïïc gïï ii kiperu, na näk gïï mo døøŋŋø mo di lwäärö, na neennu ki nyeŋŋu.

²² Kanya ci kwäyu Ijep, gena jiy ma pïërabïriiø keerge; 'ba ennø, Wuuö Jwøk na näk Jwøu uuna tïïe nou thööth kaamar ceer ni wø en maal.