Biblia Todo Logo
Bìoball air-loidhne

- Sanasan -

Ruuth 3 - Wëël Jwøk


Luum Dööŋŋö Mar Ruuth ki Böeeth

1 Køøre Naømi cï nyaare ma Ruuth apëënynye ni kööe, ni «?Nya cï nyaara, ï ba cäänynya ki paarï nø, niï pïï piny yie?

2 ?A ennø, Böeeth, ni da määra bëëdï ki geni yi pwöthe, paa wat cwøra? Neenï, eni kwödö ki beel yi laara dïwääni.

3 'Ba ennø, lwøgï ni wïïrï dëërï ki maaw, ni kïthï dëërï ka abïï, ni ciï yi laara; 'ba kär riï nyoothï jï gø gøøc mano lønye ki cam.

4 'Ba kanyo but piny, kar niire wär neenï. Kanyo bute nø, wärï ciï ni tïŋï abïï maal ki jï kuna näk da tiete, ni butï piny; køøre gïno tïïyï ocaane jïrï.»

5 'Ba Ruuth aköö, ni «Gïïa caanï bëët yøø tïïa tïïö.»

6 Køøre Ruuth aci yi laara ni tïïc gïïa caan mii cwøre bëët.

7 'Ba kanya løny Böeethi ki cam, ni yie onø tïmö ni met, ena ci kuna but piny deŋ beel moa no ocooŋø. Ni ö Ruuthi ni tïŋ abïï maal mëëth ki jï kuna näk da tiete, ni put but piny.

8 'Ba na tïme na dhöör dï wäär, Böeeth abwøk, ni këëmme, ni joot dhaagø no obut piny jï kuna näk da tiete.

9 Ni kööe, «?Ïïna ŋa?» 'Ba aløk Ruuthi, ni «Aana ŋat tïïc marï ma Ruuth. Rïëp abïïnï bääta, kiper ïïna ŋata daa dööŋ ki gø.»

10 'Ba Böeeth aköö, «Nya nyaara, ïïno gwïëth Wuuö Jwøki; gïna tïïyï cään en na døøyï yia mo met, kaala bäth ec mana nyoothï dïkwøŋ, kiper mana kärï cäädhö køør jaga näk tïëŋu moa can wala moa näk kwääri.

11 'Ba kawaane, nyaara, kärï lwäyö; gïn pëënynyï en tïïa tïïö jïrï møn, kiper ŋäc jø powa bëët ni ïïna dhaagø mo bëëtö mare beer.

12 Ka adïëri møn, waana tuuŋ ki Elimëlëk, ni løny ki man dööŋa ki ïïni. 'Ba da dhaanhø mør thuwø mo tuuŋge døc mo kaala aani.

13 Ennø, but kany dïwääni; 'ba no tïme na aruunnø, ni näk ŋatøgø yie met ki man dööŋe ki ïïni, wøp, eno dööŋ ki ïïni; 'ba ni näk mo yie ba met ki man dööŋe ki ïïni, ŋëët Wuuö Jwøk na kwøw, aani, a dööŋ ki ïïni. Butï nø këël aruunnø.»

14 Køøre Ruuth abut piny jï kuna näk da tiet Böeeth këël aruunnø. 'Ba Ruuth apäny maal ki bäc øw kany wø poode ni dhaanhø ba løny ki ŋec. 'Ba Böeeth aköö, ni «Kär dee ŋat mo ŋäya gø ni dhaaŋŋøgø oöö yi laara.»

15 Køøre Böeeth aköö jï Ruuth, ni «Käl aleeŋŋa mana käärï ni peerï gø.» Ni peer gø, ni ö Böeethi ni rum yi gø ki beel ki gïr røm kwöre abïciel, ni jieø gø wï gø. Køøre Ruuth aci paac.

16 'Ba kanya pïïe paac ena pëëny mii cwøre, ni kööe, ni «?Cï nyaara, gïna ciï baŋe atïme nidïï?» Køøre gïna tïïc Böeethi bäre kipere acaane jïre.

17 Ni kööe, ni «Beel moi arøme jïra ki gïr røm kwöre abïciel ni mëëk gø aani, kiper ena köö, ni ‹Ï ba doo døøa baŋ mii cwørï ki ceŋŋï jaak.› »

18 Køøre Naømi aköö jï Ruuth, «Nya cï nyaara, neen jïre di turu, gøøc mano jootï gïno tägi; kiper Böeeth paa dhaanhø mo lïŋö ni luummögø ba thööre dïcäŋi.»

© The Bible Society of Ethiopia 

Bible Society of Ethiopia
Lean sinn:



Sanasan