Ruuth 1 - Wëël Jwøk

Thøw Cø Naømi Ki Wääte Kanya Bëëtge Möap

¹ 'Ba kanya bëët jø Icrielli tiet jøøa bëëdö na pïëmme, dï paac ajïtö ki meel. Ni ö nyen mørri ma ŋat Bethelem na en yi ŋööm Juuda ni aa po jø Möap kuna bëëde yie na wëëllö, ni beeye eni ki cïïe ki wääte karge riet.

² 'Ba nyeŋ nyenøgø beeye Elimëlëk, ni nyeŋ dhaagø mare beeye Naømi; 'ba nyeŋ wääte na näk ariiø beege Malön ki Këliwön. Ni gena jø paac mo cwøl ni Eeparata, ni beeye Bethelem mana en yi ŋööm Juuda. Ni cige po jø Möap ni bëëtge kaace.

³ 'Ba Elimëlëk cø Naømi athøw, ni dööŋ Naømi keere ki wääte karge riet.

⁴ Ni ö wääte ni nyöömge ri nyïïakuk Möap, ni nyeŋ nyïgögø beege Ørpa ki Ruuth. Ni putge bëëtö kaace ki cwiiri mo jïtö ka apaar.

⁵ Køøre Malön ki Këliwön athøw bëët, ni dööŋ miige ma Naømi ki ceŋŋe køør thøw wääte karge riet ki cwøre.

Kanya Døø Naømi Ki Ruuth Bethelem

⁶ Køøre Naømi ki määr wääte atïŋŋö ki Möap, ni eni døøa poge, kiper awïnynye ni Wuuö Jwøk jiye ma jø Icriel akønye ni ciek caammi.

⁷ Ni tïŋŋe ki kanya bëëtge yie ki määr wääte karge riet, ni aacge ki jöö ni ge aa ŋööm Juuda.

⁸ Ni ö Naømi ni cään määr wääte karge riet, ni kööe, «Cou, ni ö ŋati man nø ni døø po menni. Beerra man ö Wuuö Jwøki ni nyooth bäth ec mare jïïu, kaawat mana nyoothu bäth ec jïra ki wääta na thøw.

⁹ Beerra man ö Wuuö Jwøki ni wëëk ŋati man nø pïïn piny ni jïte ki paare ni bëëde ki cwøre.» Ni ö Naømi ni nuum dhøkge ni määtha geni; ni put nyïgögø jwøk døc ni döötge ege tïŋ maal.

¹⁰ Ni köge jïre, «Ø aay na aciel ki ïïni cøøn ni cøø baŋ jø pou.»

¹¹ 'Ba Naømi aköö, «Nyie määr nyïïa, aayu nø. ?Aŋø ni manynyu wääth ki aani en? ?A poot nyöötö ki wääta møøk këët, mo tïmö na cwøwu?

¹² Nyie määr nyïïa, cou døøgu nø, kiper aana nø jalø ni ba løny ki man jïta ki dïcwøø këët. ?Aŋø, këël a doo köö ni jïra da ŋäädhe ki man jïta ki dïcwøø dïwääni, ni nyööta ki wääta,

¹³ geni dou koorø këël mana dege døøŋŋø? ?A u doo kweer ki man nywøm uuni kiperge? Nyie määr nyïïa, ba løny, kiper bëëtö mara duua keec cwïny bääta mo kaala maru, kiper Wuuö Jwøk cere aluu raa.»

¹⁴ Køøre gena cäŋ jwøk døc ni döötge ege tïŋ maal, ni ö Ørpa ni nuum dhi mii cwøre ni määtha gø ni aae. 'Ba Ruuth adööŋ buut nyijøøgø.

¹⁵ Køøre Naømi aköö jï Ruuth, ni «Neenï, nyägï adøø baŋ jø poge, ni døø baŋ juu moe; ïïni thuwø, ci läp køør nyägï nø.»

¹⁶ 'Ba Ruuth aköö, ni «Kärï köö jaak ni aa buutï, niï köömma aani ni køørï kär løpa; kiper kanyo ciï yie jaak a cøøa yie, ni kanyo bëëdï yie aano bëëdö yie thuwø; jiy moï geno tïmö na jiy 'moa, ni ö Jwøk marï ni tïme na Jwøk mara.

¹⁷ Kanyo thøøï yie aano thøø yie, ni koony aani kanyo koony ïïni yie thuwø. 'Ba ni näk aano pääö ki ïïni, naa ba pääa thøøe kiree, Wuuö Jwøk aano jääle.»

¹⁸ 'Ba kanya jooti ya Naømi ni Ruuth manynya man aae ki eni møn, bäŋ gïn mør mo ee caanø këët.

¹⁹ Køøre gena aay karge riet këël mana pïïcge Bethelem. 'Ba kanya pïïcge Bethelem, paac bäre anitïŋŋa kiper pïï marge. Ni kö määnni, ni «?Man a Naømi møn?»

²⁰ 'Ba ena köö jïge, ni «Kär a cwøllu na ‹Naømi›. Beerra man cwøllu a na ‹Maara›, kiper Jwøk na en teeki jïre atïïö dëëra ki gïï mo døøya cwïnya mo keec.

²¹ Aana aay ni jïra da dïcwøø ko obwöre, ni ö Wuuö Jwøki ni duu aani ki ceŋŋa. ?Aŋø ni cøøru aani ni Naømi en? Wuuö Jwøk na en teeki jïre aana nø jääle, ni kïth bääta ki gïï mo leth.»

²² 'Ba Naømi aduuö ki Möap, ni eni duui ka Ruuth nyi jø Möap na näk cï nyaare. 'Ba kanya pïïcge Bethelem beeye kar kanya täk kac beega cwøl ni gäbci.