Wëëlö Mana Göör Pøølli Baŋ Jø Röm 8 - Wëël Jwøk

Luum Kwøw Ki Ri Jwïëy

¹ Kiper manøgønø, kawaane bäŋ ajäla bäät jø wø en dëër Krictø Jecu.

² Kiper kwøw mana cïp Jwïëc Jwøki ki ri Krictø Jecu, aana päde cer raay ki thøø.

³ Kiper gïna ba maar lønyø jï ciik Jwøk ki man tïïc gø kiper mana døøyi ya dëëlli mo jääk, atïïc Jwøki kanya jääŋ Wääde kiree, ki dëël mo caala dëër dhaanhø ni da raay en, ni tïme no olämi kiper raay, ni jääl raay ri dëël.

⁴ Ni manøgø tïïe kaper nee bëënynyö mana many ciik Jwøki nee thur kare dëëtø, ø wø caath køør Jwïëc Jwøk ni patha køør mo dëël.

⁵ Kiper jø wø bëën dëël, cwïnyge ege cïp køør jap wø many dëëlli. 'Ba jø wø bëën Jwïëc Jwøk, cwïnyge ege cïp køør jap wø many Jwïëc Jwøki.

⁶ Ki man cïp cwïny køør dëël beeye thøø. 'Ba ki man cïp cwïny køør Jwïëc Jwøk beeye kwøw ki bëët-mëër.

⁷ Kiper cwïny man wø näk ocïp køør dëël, män ki Jwøk, ni dwør ciik Jwøk ba leŋe, ni ba maar lønyø jïre ki man leŋ gø.

⁸ Ni jø wø näk cwïnyge ege cïp ri mo dëël ba maar lønyø jïge ki man tïïcge gïï wø met yi Jwøki ki ge.

⁹ 'Ba uuni, u ba en ri mo dëël. U ena ri mo Jwïëc Jwøk, ni näk Jwïëc Jwøk bëëdö cwïnynyu møn. Kiper ŋat wø Jwïëc Krictø tøør cwïnye, ŋatøgø patha mare.

¹⁰ 'Ba ni näk Krictø ena cwïnynyu, këël na näk dëëtu othøw kiper raay, jwïëyu kwøw kiper bëënynyö.

¹¹ 'Ba ni näk Jwïëc ŋata tïŋ Jecu maal ki yi thøø bëëdö cwïnynyu, ŋata tïŋ Krictø Jecu maal ki yi thøø, dëëtu ni bëën thøø enø ocäŋ wëëk kwøw thuwø ki køør Jwïëye ni bëëdö cwïnynyu enø.

¹² Kiper manøgønø, nyïïmera, mana døø tïïö nø, ø ba doo bëën jap wø many dëëlli ki man bëëdø ni ø tïïya gïï wø cac dëëlli.

¹³ Kiper ni näk mou bëëdö nou tïïya gïï wø cac dëëlli, u thøw. 'Ba ni näk tïïe mo dëël you wëëk thøø ki køør Jwïëc Jwøk, uuno kwøw.

¹⁴ Kiper jiy bëët mo wø bwøth Jwïëc Jwøki, gena nyïï Jwøk.

¹⁵ Kiper u kär wëëk jwïëy mo tïïya uuni na laaŋe nou cäŋu lwäyö. 'Ba uuna wëëk Jwïëy mo tïïya uuni na nyïï Jwøk. Kiper kany wø jwöŋø, ni «Abba, Awuuö,»

¹⁶ beeye Jwïëc Jwøk kiree ni wø cäänö na aciel ki jwïëyø ni øøna nyïï Jwøk.

¹⁷ 'Ba ni näk øøna nyïïe nø, øøna lwiidhi, na lwiidhi mo Jwøk, ni øøna lwiidhi ki Krictø na aciel, ni näk mo ø jwøra gïï mo leth ki eni na aciel, kiper nøø jiem ki eni na aciel thuwø.

¹⁸ Kiper yaa caarø ni gïï leth ni nut ii ba doo rømø ki man pääri ka ajiem mano nyooth jïïø.

¹⁹ Kiper jammi bëët moa näk ocwääc Jwøki ge koora kanyo nyooth nyïï Jwøk yie, ni nyeŋge ege peerø.

²⁰ Kiper gïïo no ocwääö yøø omänö ki man cööp marge kare. Ni manøgø patha luumge, 'ba beeye luum ŋata bëënge, ni mooya ge ki ŋäädhe,

²¹ ki man näk mo gïïa näk ocwääö ki dëëtge käla wøk cer laŋ ni wø tøpge yie, ni jootge pät mana pät nyïï Jwøk ki gø ni bëëdö ka ajiem.

²² Ni ŋääø ni gïïo no ocwääö yi piny bäre yøø wø bëëdö ni ge cooyø ciel ki cooyø mo rööma coony mäc lwaar, këël kawaane.

²³ Ni paa gïïa näk ocwääö keerge ni wø cooyi, 'ba këël øøni ki dëëtø, øøna näk këël wï Jwøk mo Jwïëc Jwøk, ø wø cooyø ki cwïnynyø kany poodø ni ø køya kanyo ŋec øøni ni øøna nyïïe, ni beeye kanyo wiil dëëtø yie.

²⁴ Kiper beeye ŋääthögø na piem øøni ki køøre. 'Ba gïn mo nëënö ni ŋäädhi, manøgø patha ŋäädhe. ?Aŋa wø ŋääth gïn mo ee nø neen?

²⁵ 'Ba ni näk mo ø ŋäätha gïn mo kärø neenø, ø koora gø ni cwïnynyø yøø cïp piny.

²⁶ Kaawat manøgø thuwø, Jwïëc Jwøk wø kønya øøni kiper mana jägø. Kiper lam mana døø lämö ki gø kuuø. 'Ba beeye Jwïëc Jwøk ki dëëre ni wø kwääö kiperø nyïm Jwøk, ni eni jwöŋö ki cwïnye bäre ki dwøl mo ba maar caan ki dhøk.

²⁷ 'Ba ŋat wø dar cwïny jiy, gïna en cwïny Jwïëc Jwøk ŋääe, kiper beeye Jwïëc Jwøk ni wø kwääö kiper jø Jwøk keda mana many Jwøki.

²⁸ 'Ba ŋääø ni Jwøk tïïö ri jammi bëët nee bëënyge jï jøw wø mëër ki eni, jøøa näk ee cwølø keda mana manynye.

²⁹ Kiper jøøa ŋääe cøøn, ee miiø thuwø ki man tïmge ni kïtge caala kït Wääde, kiper nee eni tïme na kaa dï nyïïmëëe mo thööth.

³⁰ 'Ba jøøa näk ee miiø, ee cwølø thuwø. Ni jøøa näk ee cwølø, ee jïëö thuwø ni marge beer. Ni jøøa näk ee jïëö ni marge beer, ee jiemø thuwø.

³¹ ?Agïnaŋø nø, noo caanø kiper gïïögø? ?Ni näk mo Jwøk ena kurø, aŋa noo männi ki øøni?

³² ?Ŋata kär män Wääde kiree, 'ba acïbe kiperø bëët, jammi bëët ba dee mëëga øøni ki eni na aciel?

³³ ?Aŋa noo känni ki luubö mo raac bäät jøøa jier Jwøki? Kiper beeye Jwøk wø jïëc dhaanhø ni mare beer.

³⁴ ?Aŋa noo jääl dhaanhø? ?Beeye Krictø Jecu? Patha eni, kiper beeye eni na thøw, ni tïŋ maal ki yi thøø, ni en bäät cwïï Jwøk, ni wø kwääö kiperø.

³⁵ ?Aŋa noo pää øøni ki mëëc Krictø? ?Aŋø, beeye gïïo leth noo jwørø, wala moo thäŋ yïthø ki ge, wala caannø, wala meel, wala wääth dëël, wala kany mo raac ma kar thøø, wala opëëllö?

³⁶ Kaawat mana gööri, ni «Beeye kiperï ni bëëtwa ni wa di nääŋŋö cooth, ni waano tïmö kaamar dïëk mo di ŋarø.»

³⁷ Jïre bäär. 'Ba ki yïth gïïögø bëët teeka øøni ki køør ŋata mëër ki øøni, ni bäŋ gïn mo maarge tïïc.

³⁸ Kiper ŋääa døøc ni thøø, wala kwøw, wala nyïïatwiet maal, wala gïïa jïge da teek maalø, wala gïï ni nutö ii, wala japo ööi, wala moa jïge da teek,

³⁹ wala gïï mo ena maal, wala gïï mo ena piny tiet ŋøøm, wala gïn mør jaak dëët moa näk ocwääö bëët, bäŋ gïrpiny aciel dïge mo doo maara lønyø jïre ki man pää øøni ki mëëc Jwøk ni en dëër Krictø Jecu na näk Kwääyø.