Wëëlö Mana Göör Pøølli Baŋ Jø Röm 16 - Wëël Jwøk

Pøøl Määtha Nyïïmëëe Röm

¹ A nyutha uuni cöögø ma Pibi, dhaaŋ wø tïny acooŋ Jwøk mana en yi Cencure,

² kiper nee eni pänhnhu ki nyeŋ Wuuö ki yi jöö man wø mïërö jï jø Jwøk, ni kønynyu eni ki gïno pëënynye jaak. Kiper ena kunyö ki jiy mo thööth, këël aani ki dëëra.

³ Määthu Paricka ka Akwila, jø wø tïïö ki aani na aciel ki nyeŋ Krictø Jecu.

⁴ Geni, jwïëcge ataakge kiper naa kwøa, ni patha a keera ni wø pwøc Jwøk kiperge, 'ba këël acook Jwøk mo juurre bëët thuwø.

⁵ Ni määthu acooŋ Jwøk ni wø cooŋ yi øtø marge. Määthu omëëya ma Epeeneta, ŋata kwøŋ jïëy ki Krictø yi Eecia.

⁶ Määthu Meeri, dhaaŋŋa tïïö døc dïïu.

⁷ Määthu Andarönika ki Junia na näk jø powa, jøøa ena øt twöc ki geni. Gena jiy mo nyeŋge lïëŋ dï nyïïatwieli, ni ge ena ri Krictø naa poodi.

⁸ Määthu Ampalieta na näk omëëya ki nyeŋ Wuuö.

⁹ Määthu Urbana ŋat wø tïïö ki øøni na aciel ri Krictø, ko omëëya ma Tayka.

¹⁰ Määthu Apele ŋata joot na adïëri na dhaanh Krictø. Ni määthu tuuŋ Aritøbula.

¹¹ Määthu Eerödien na näk nyï powa. Ni määthu tuuŋ Narcica ni en ri Wuuö.

¹² Määthu Taripana ki Taripöca, määra tïïö døc ki nyeŋ Wuuö. Ni määthu omëëya ma Perca, ŋata tïïö ki tïïc mo teek ki nyeŋ Wuuö.

¹³ Määthu Rupa, ŋata no ojier Wuue, ni määthu menni thuwø ni näk mera.

¹⁴ Määthu Acinkarita ki Palejan, ki Eermec, ki Pataröba, ki Eerma ki nyïïmëëe moa en buutge.

¹⁵ Määthu Pilölöga, ki Julia, ki Neeria ki coki ma dhaagø, ko Olimpa, ki jø Jwøk bëët moa en buutge.

¹⁶ Ni määthu røgu ki nuum dhøk na en kur keere na näk mar Jwøk. Uuna määth acooŋe mo Krictø bëët.

¹⁷ Nyïïmera, a kwaya uuni ki man gwøgu dëëtu ki jø wø käl apääk dïïu ni wø kïth dïdëët jööra pwöny uuni ki gø. Kwierru geni.

¹⁸ Kiper teeŋ jøøgø nø ba tïny Kwääyø ma Krictø, 'ba ge tïnynya yïthge, ni ge maaŋŋa wïth jø wø cwïnyge cwøk ki luup mo ŋweeth.

¹⁹ Teeŋ ka man bëët mwölli maru ni ŋäc jø bëëti ni mïn yia ki maru, a doo manynya man bëëdu thuwø ni wïthu leer ki man laaru gïno beer ŋäc, ni kuyu raay.

²⁰ 'Ba Jwøk ni wø cïp bëët-mëër, Ceethan olaar ŋiith tietu. Met ec mar Kwääyø ma Jecu Krictø bëëde bäätu.

²¹ Uuna määth Timöthi ni wø tïïö ki aani na aciel. Uuna määth Lucia ki Jeecan, ki Cøcipater na näk jø powa.

²² A na Tercia ni göör wëëlli en, uuna määdha ki nyeŋ Wuuö.

²³ Uuna määth Geea, ŋati ni bëëda paare en, ni wø pänh jø acooŋ Jwøk bëët. Ni uuna määth Eracta, ŋat wø pääŋ jammi pääny, ki cöögø ma Kwarta. [

²⁴ Met ec mar Kwääyø ma Jecu Krictø bëëde bäätu.]

Jwøk Di Pwøø

²⁵ Pwøc en jï ŋat wø løny jïre ki man wëëk u tëënnö ki køør luumma nyään na met ni wø køba, ni beeye luum Jecu Krictø, kaawat mana nyooth ri gïna näk tiere okwøŋ kan ki kany mo bäär,

²⁶ na nyooth kawaane ni tïïi ni ŋäc wïth juurre bëët ki køør luup moa näk ogöör nyïïkuk Jwøki, ki køør dwør Jwøk ni wø bëëdö na bäre bäre, kiper nee wïth juurre wëëk jïëy ni ŋääthge.

²⁷ Ajiem en jï Jwøk na wïïe leer keere na bäre bäre ki køør Jecu Krictø. Enøgønø.