Wëëlö Mana Göör Pøølli Baŋ Jø Röm 13 - Wëël Jwøk

¹ Wär jiy bëët bëënge jø wø näk ocuumö. Kiper bäŋ cuum mo ba ööi ki baŋ Jwøk. Ni cuumme bëët cuuma Jwøki.

² Kiper manøgønø, ŋat wø kwier dööt cuumme, wø kwiera rööny mar Jwøk. Ni jø wø kwier gø jïtö ka ajäla.

³ Kiper kwääri bäŋ gïn mo raac mo tïïcge dëët jø wø tïïc gïï mo beyø, 'ba beege jø wø tïïc gïï mo reyø. Ni näk miï manynya man bëëdï ni bäŋ lwär cwïnyï ki ŋata en teeki cere, tïïc gïno beer. Køøre nø, ïïno pwøe.

⁴ Kiper kwäärö ena ŋat tïïc mar Jwøk kiper niï bëënynyï. 'Ba ni näk miï tïïya gïn mo raac, wär lwäärï. Kiper eni opëëllö bäŋ wø kääri jaak. Kiper ena ŋat tïïc mar Jwøk, ŋat wø tïïc ajäla dëër ŋat wø tïïc raay.

⁵ Kiper manøgønø, dhaanhø doo leŋa luubö, ni ba lwäär wëëc Jwøk keere, 'ba kiper nee cwïnye bëëde ni leer thuwø.

⁶ Ni beeye tier manøgø thuwø ni wø cïpu ka ajwäk. Kiper jøøa näk ocuumö ge tïnynya Jwøk, ni beeye tïïögø kiree ni neetge.

⁷ Cïpu gïï wø cïpu jïge bëët. Cïpu teeŋ ajwäk bëët jï ŋat wø en ajwäki cere, ni lwäärru ŋat mo di lwäärö, ni wøørru ŋat mo di wøørø.

⁸ Kär dee pïïdö mar ŋat mør bäätu, 'ba tïme ni beeye mëër keere ki man mëërru ki røgu. Kiper ŋat wø mëër ki ŋat mør, ciik Jwøk ee thöörö.

⁹ 'Ba moa cem Jwøki, na kööe, ni «Kärï kännö ki luk, ni kärï nägö ki dhaanhø, ni kärï kwätö, ni kärï pädö,» ki møga bëët na cem, ena ri luummi na aciel en, na køp, ni «Ï doo mëër ki ŋat mør kaawat man wø mëërï ki dëërï.»

¹⁰ Mëër bäŋ gïn mo raac mo tïïe dëër ŋat mør. Kiper manøgønø, mëër beeye wø thöör ciik Jwøk.

¹¹ 'Ba ŋäyu kar kany thuwø ni beeye kanya dou päy yie ki yïth niine. Kiper kar pïëm man piem øøni ki gø acäännö ni kaala kar kanya kwøŋø jïëy ni ŋäädhø.

¹² Wäär anø pöödhö, ni cäŋ kare cään. Kiper manøgønø, beerra man wetø tïïe mo muudhö, ni røø kwöt nywïënyö mar tar.

¹³ Beerra man bëëdø ki bëëtö mo beer na man wø bëëdö ki gø ki waŋcäŋ, ni ø ba wïïri ni meeyø, wala øøna kääpe ni dëëtø yøø cïbö jï raay, wala ø wëëyø ni këëø.

¹⁴ 'Ba dëëtu wär cïpu jï Kwäärö ma Jecu Krictø, ni ba wëënnu dëël ki jöö man tïïc gïï wø manynye.