Pwöc Leec Wïc 9 - Wëël Jwøk

Pwöc Man Wø Joot Ki Køør Jïëc Cwödö Mar Leec Wïc

¹ Leec wïc ogëëdö ki øtø mare, mo ee cöönhnhö ki were abïriiø.

² Ni ŋäde ki rïŋö, ni nyööbe ki køøŋ nyïïomøki, ni ö eni ni jiiŋ akaaŋ.

³ Køøre jø tïïc moe ajääŋŋe wøk, ni ö eni ni cwöde ni ena bäät thuur kanya en maal dï pääny, ni kööe,

⁴ ni «Ŋat ma acaara mare thiinh, beerra man gää kany.» Ni kööe thuwø jï ŋata näk ba cädö,

⁵ ni «Ööï, ni cämï ki cam mara, ni mädhï ki køøŋ nyïïomøki mana nywøba.

⁶ Wec bëët thïnh acaara, niï bëëdï niï kwøw, ni cäädhï øtjöör ŋäc tiet luup.»

⁷ Ŋat wø kööm ŋat abuua wø käla lään wïc bääte, ni ŋat wø jook dhaanhø mo raac wø joota ajaany.

⁸ Kär ŋat abuua joogï, nee ba männe ki ïïni; jook dhaanhø mo wïïe leer, eni mëëyö ki ïïni.

⁹ Cïp pwöc jï dhaanhø mo wïïe leer, eni leec wïïe okadhi; pwöny dhaanhø mo mare beer, eni kwänynyö mare meede meedø.

¹⁰ Ki man lwäär Wuuö Jwøk beeye täk leec wïc, ni ki man ŋäc eni na en kur keere beeye ŋäc tiet luup.

¹¹ Kiper leec wïc beeye noo tïïc nïr kwøw moï ni thööth, ni meet ruun møøk bäät ruut kwøw moï.

¹² Ni näk mo wïïï leer, leec wïc marï oduunni jïrï, 'ba ni näk mo ïïna ŋat abuua, rääö marï okäärï keerï.

Pwöc Man Wø Joot Ki Køør Jïëc Cwödö Mar Dhaagø Mo Wïïe Känni

¹³ Dhaagø mo wïïe känni bëënna dïlweel, na acaara mare thiinh, ni bäŋ gïn ŋääe.

¹⁴ Eni wø pïïa piny dhi øde, ni pï piny bäät køøm bäät thuur kanya en maal dï pääny,

¹⁵ ni bëëde ni cøøra jø wø pöödhi ki øtjöö, jø wø cäädhi ki uutjïëthe moge na thïïŋ, ni kööe,

¹⁶ ni «Ŋat ma acaara mare thiinh, beerra man gää kany.» Ni kööe thuwø jï ŋata näk ba cädö,

¹⁷ ni «Ciin baŋ dhaagø mør ŋweeth kaamar pïï mo di kwalø, ni met kaamar møø mo cam no okanø.»

¹⁸ 'Ba eni na acaara mare thiinh kuue ni jøøa no othøw ena kaace, ni kuue thuwø ni wëëlle mo dhaaŋŋøgø ena kar bëët jwïëc jøøa no othøw.