Pwöc Leec Wïc 7 - Wëël Jwøk

Pwöc Ki Man Gwøk Røk Ki Cwøk Mar Kääbi

¹ Nyie wääda, gwøk luupa, ni kanï ciik 'moa cwïnyï.

² Gwøk ciik 'moa niï bëëdï niï kwøw, ni gwøgï pwöc 'moa kaamar guu waŋï.

³ Twöö geni lweetï, ni göörï ge piny yi cwïnyï.

⁴ Kööï jï leec wïc, ni «Ïïna coka,» ni cwølï ŋäc tiet luup na nyawadu mana pere leth;

⁵ kiper niï gwøkge cer kääbi, ni beeye dhaagø mo luupe pøøth.

⁶ Aani, aana räŋŋö wøk ki dha awëërnyeŋ mar øda,

⁷ ni jooda ŋat mør dï jøøa näk acaara marge thiinh, ni beeye nyilaal mo ba cädö dï wøpe.

⁸ Ni jooda eni ni pöödhö ki øtjöör wø cør lak po kääbi, ni lwør jöör wø coony øt dhaaŋŋøgø,

⁹ kanya päth cäŋŋi ni piny jïrri, ni tïm pinynyi na wäär.

¹⁰ Ni jooda dhaagø ni öö ni røømme ki eni, ni eno ruyö ka abïïk käp, ni cwïnye päŋ ki cwøk,

¹¹ dhaaŋ wø näk ŋat dïlweel, ni näk apwødha, ni tiere bäŋ wø mägi paare.

¹² Ennø, bëëdö øtjöö, ni ki kany mo thiinh eni ena thwørø, ni ree wø di kaannø yïth agääk jïëthe ni kurö.

¹³ Køøre cer nyilaarøgø amaae ni nuum dhi gø, ni cääne ki gøøni ni waŋe teek, ni kööe,

¹⁴ ni «Thääŋ rïŋ olämi mana cïba nut paac, ni dïcäŋi nïr kööŋ 'moa yaa thöörö.

¹⁵ Køøre ennø, aana öö naa røømma ki ïïni, ni manynya ïïni døc ni cwïnya lïëth, ni jooda ïïni ennø.

¹⁶ Kar niine mara yaa døøc mo mïërö ka abïïe mo beyø, ka abïïk kït ma lïïna mo käla Ijep.

¹⁷ Ni jøra kar niine mara ki riia mo ŋwäänynye met, ni pøra tør apøk jenni mo ŋwäänyge met thuwø.

¹⁸ Ööï, ni mïn yïthø dïwääni këël amöölla, ni døøyø yïthø mo met ki mëër marø.

¹⁹ Kiper cwøra tøør paac; ena aa kany mo bäär døc.

²⁰ ena aay no opïr gwel di käärö, ni kanyo pïïc dwääyi tar beeye no duue.»

²¹ Dhaaŋŋøgø nyilaal acøøge ki dhøk mo beer, ni tuut gø ki leep mo pøøth.

²² Køøre ki kany mo thiinh nyilaal aläp køøre, kaawat man wø ö dhieŋŋi wø kïthi baŋ ŋaal, kaawat man wø ö purra wø cääth ya ataw,

²³ gøøc mano ö tøŋŋi noo tuc yi cwïnye. Kaawat man wø ö wenye wø läät ya abïëp, kuue ni jwïëye di raanynyø.

²⁴ 'Ba ennø, nyie wääta, wïnynyu mara, ni cegu ïthu ki luup wø cara.

²⁵ Kär cwïnynyu løøu øtjöör dhaaŋŋøgø, ni ba gaau uutjïëthe moe.

²⁶ Kiper jiy moa päth cere na raanynye thööth, ni jiy moa thøw ki køøre thööth døc.

²⁷ Øt dhaaŋŋøgø beeye jöör kar bëët jwïëc jøøa no othøw, ni wø løøya kwör thuunhnhi.