Pwöc Leec Wïc 5 - Wëël Jwøk

Pwöc Kiper Man Kwier Bëët Käp

¹ Nyie wääda, cek ïthï ki pwöc leec wïc mara, ni këëllï ïthï piny døc baŋ acaare 'moa;

² kiper gïn mo beer ki gïn mo raac nee ŋäyï, ni ö luup kwänynyö ni bëëtge dhiï.

³ Kiper dhaagø ma kääbi dhee ŋweeth kaawat maar kïc, ni luup moe pøøth ni kaala maaw;

⁴ 'ba aŋuunne, luupe këënynyö kaamar tier keenø, ni bïnhnhe kaamar opëëllö mo dhøgi ariiø.

⁵ Teeŋ dhaaŋŋøgø, tiete cäätha baŋ thøø, ni kwör tiete cäätha kar bëët jwïëc jøøa no othøw.

⁶ Jöör kwøw bäŋ wø caare; eni wø wïdö jaak ki uutjïëthe mo reyø, ni mo nyïm kuue.

⁷ 'Ba ennø, u na wääta, wïnynyu mara, ni ba gaau wøk ki røk luup mo wø cara.

⁸ Døøc karï mo bäär ki dhaaŋŋøgø, ni ba nyiigï buut dhi øtø mare;

⁹ nee ajiem marï ba wëëgï ränynyö, ni ba nyäägï jwïëyï ceŋ jøøa reyø;

¹⁰ kiper nee jiy mo path ba jäŋge ki jammi moï, nee øt dhaanhø mør jaak ba pääŋe ki jap köörï;

¹¹ niï ba cooyï ra aŋuun kwøw marï, kanyo thum rïŋ dëërï bäre,

¹² ni kööï, ni «Pwöc yaa kwierø kaperŋø, ni bëët cwïnya no okweer ki köömmö!

¹³ Aani, ïtha kära ciiø ki dööt dïpööye 'moa, ni kära ïtha løø baŋge.

¹⁴ Ennø, aano løny naa pätha yi ränynyö naa nëënö jï jiy bëët.»

Pwöc Man Ö Dhaanhe Ni Ŋäc Cïïe Keere

¹⁵ Beerra man bëëdï niï ŋäya cïïï keere kaamar dhaanhø mo ŋäya pï aguula mare keere mo wø maadhe, ki pïï mo wø lwanynyi yi iith mare.

¹⁶ ?Aperŋø noo nyöödï wøk jaak, nee obwöre moï bëëtge ni bäŋ gïn kønyge, kaamar pï jøøro mo øøya wøk jaak uutjïëthe?

¹⁷ Beerra man bëët obwöre moï na moï keerï, niï ba rööp rege ki jøøa path.

¹⁸ Beerra man bëëdï ki cïïï ni uuno gwïëdhö, ni mïn iï ki eni na näk cï thïnhö marï,

¹⁹ ni bëëde ni mïërö jïrï kaamar mwök, no opwøø kaamar aŋer; ni päŋ cwïnyï ki mëër mare cooth, ni pär cwïnyï cooth ki gïre.

²⁰ ?Wääda, aperŋø ni pär cwïnyï kiper kääbi, na aperŋø ni gäämmï dhaagø mør jaak en?

²¹ Kiper uutjïëth tïïe mo dhaanhø nëënö jï Wuuö Jwøk, ni jïëth tïïe mo dhaanhø bëët wø di neetø.

²² Ŋata raac okïth raayi moe ya abïëp, ni ö eni ni twöyi raayi moe ki thøøli.

²³ Eno thøw kiper mana bäŋe pwöc mo ee kwanyø, ni rwäänye ki køør teek wïc mare na dwøŋ.