Pwöc Leec Wïc 4 - Wëël Jwøk

Luum Pwöc Mar Wuuö

¹ U no obwöre, wïnynyu pwöc wääu, ni cegu ïthu nee tiet luup jootu;

² kiper a wø cïpa pwöc mo beer jïïu; uuni, kär ciik 'moa weyu.

³ Kanya bëëda ki wära ni aana nyilaal, naa thiinh, ni waŋ mera ena bääta keera,

⁴ wära aana pwönynye, ni kööe, ni «Mak luup 'moa ki cwïnyï bäre, ni gwøgï ciik 'moa, niï bëëdï niï kwøw.

⁵ Lwør leec wïc, ni lwørï ŋäc tiet luup. Kär wïïï wïl ki luup mo wø cur dhaa, ni ba gaaï wøk rege.

⁶ Kär leec wïc weyï, eni, ï gwøe gwøø; bëëdï niï mëër ki gø, eni, ï koore koorø.

⁷ Many leec wïc nee ci jïrï, kiper leec wïc beeye gïn mo letha pere døc, ni manynyï ŋäc tiet luup nee ci jïrï røk jammi moa perge leth bëët.

⁸ Tïïc kare ni dwøŋ, eni karï odøøc mo dwøŋ; ni näk iï gäämö, ï mooe mooø ki wödö.

⁹ Eno tïmö jïrï kaamar adun ajiem mo ena wïïï, ni tïme jïrï na adun mïërö.»

¹⁰ Nyie wääda, wïny mara ni jïëyï moa cara, køøre ruut kwøw moï tïmö ni thööth.

¹¹ Ïïna pwönynya ki øtjöör leec wïc, ni bwødha ïïni ki uutjïëthe moa thïïŋ.

¹² Kany wø cäädhï, bäŋ gïï mo galla ïïni, ni kany wø rïïŋï, tietï ba cwanynyï.

¹³ Mak pwöc, ni ba lwäänhnhï gø; gwøk eni, kiper ena tier kwøw marï.

¹⁴ Kärï cør øtjöör jø raay, ni ba bëëdï ki bëët jøøa reyø.

¹⁵ Män riï ki jöörge ni ba cørï yie; ni kwierï gø ni cørï jöörï.

¹⁶ Kiper ge bäŋ wø buti ni näk bäŋ gïn raac mo ege tïïö, ni nyeŋge ba gämmi kany wø bäŋe dhaanhø mo ege wëëk päth yïth raay.

¹⁷ Kiper rääö ege tïïö na cam marge, ni dïwït ege tïïö na maath marge.

¹⁸ 'Ba jöör bëët jøøa beyø caala man wø ö tiet øwi, ni wø rïënyi ni tar mare cäänhnha maal këël mano pïïe ya aŋuun tar mar dïcäŋ.

¹⁹ 'Ba jöör bëëtö mar jøøa reyø caala bëët muudhö, ni gïï wø cwany tietge ba jootge.

²⁰ Nyie wääda, cek ïthï ki luup 'moa, ni këëllï ïthï piny ki gïïa cara.

²¹ Kär ge lwäänhnhï nyïmï; kan geni yi cwïnyï.

²² Kiper beege kwøw jï jø wø joot geni, ni wëëk dëëtge bäre jöönnö.

²³ Ki røk jammi bëët, koor wïïï, kiper beeye jøøro mar kwøw.

²⁴ Luup tööt kär dee gø dhiï; ni bëët leebï ni kare bäär ki luup atade.

²⁵ Beerra man bëët waŋï ni raŋŋa nyïmï keere, ni teeï waŋï nyïmï ni tiir.

²⁶ Tïïc øtjöörï ni pøøth kiper tietï, køøre uutjïëth tïïe moï bëët othur karge.

²⁷ Kärï gaa wøk bäät cwïïc wala bäät caam; män tierï ki jöör raay.