Pwöc Leec Wïc 31 - Wëël Jwøk

Luup Moa Car Nyeya Ma Lemuëlli

¹ Moi beege luup mo perge leth mo nyeya ma Lemuël, moa ö menni na pwöny eni ki geni.

² Ena köö, ni «Wui wääda, ï na nyi yia, ï na jooda ki køør mana kööŋa jï Jwøk,

³ kär niï raanynya teek marï ki mään, ni kär niï cïpa riï jïge, ge ni wø raany nyeye.

⁴ «Wui Lemuël, patha gïn mo orømø ki man mäth nyeye ki køøŋ nyïïomøki, ni patha gïn mo orømø ki man ö kwääri ni paacge kwøŋ mo keec;

⁵ nee ba mäthge ni wïl wïthge ki ciik, ni wecge man ŋølge luup na karge mo jøøa can.

⁶ Køøŋø mo keec wär wëëk ŋat mo kare cään ki thøø, ni cïpï køøŋ nyïïomøki jï ŋat mo cwïnye okëënynyö ki køør bëëtö mare.

⁷ Wëëk eni maath ni wïl wïïe ki can mare, nee ba cäde ki leth bëëtö mare.

⁸ «Jap dhiï kiper jø wø ba løny ki man cäänge kiper dëëtge keerge, kiper adïëri thuwø mar jøøa no oööl bëët.

⁹ Jap dhiï, ni ŋølï luup na karge, ni cuŋŋï kiper adïëri mar jøøa no ocaarø ki jøøa can.»

Luum Bëët Dhaagø Mo Beer

¹⁰ Joot dhaagø mo beer teek døc! Teeŋ dhaaŋŋøgø pere leth ni kaala tii mo perge leth døc.

¹¹ Cwøre wø ŋäätha eni ki cwïnye bäre, ni bëëde ni ba can ki gïï mo perge leth.

¹² Dhaaŋŋøgø wø tïïya gïï mo beyø cooth kiper cwøre ki yïth nïr kwøw moe bëët, ni bäŋ gïn mo raac mo tïïe kiper gø.

¹³ Eni wø määnyö ki jïëc rööm ki waare, ni cwääc geni na abïïe, ni eni ceŋŋe wø rweenhnhi ri tïïc ni yie met.

¹⁴ Eni caala baabuur mar ŋat wø gädhö; cam mare wø di øømmø kany mo bäär.

¹⁵ Eni wø laara päny maal ni piny poot cøl, ni jiiŋ cam kiper jic paare, ni cïp kur mään mo wø tïïö jïre.

¹⁶ Eni wø cädö bäät pwödhö ni ŋeew gø, ni piith pwöth omøki ki jammi moa joode ki køør tïïc mare.

¹⁷ Eni tïïc mare wø di tïïö ni cwïnye ee cïbö bäre, ni bääte ee maaø ni teek døc.

¹⁸ Eni gïï wø gadhe wø di joodø ni duunnö, ni maac mare bäŋ wø laar thøø ki wäär.

¹⁹ Eni waarø wø di biidhø ni weny gø, ni cwäny dëëre ka abïï.

²⁰ Eni cere wø di peerø baŋ jøøa can, ni jap cere jï jø wø many køny.

²¹ Eni cwïnye ba päri kiper jic paare, kany wø tïme na ri kööny aŋalakiir, kiper jic paare bëët orööbö ka abïïk köö.

²² Eni dëëre wø di cwänynyö ka abïï rïëp, ni eni wø käära abïïe mo pøøth mo tïïc ka lïïna.

²³ Eni, cwøre bëëdö ni ŋäc ki kar acooŋa, kany wø bëëde ni eno pï piny dï jø døøk paac.

²⁴ Nyijøøgø wø kwöö ka abïïe ma lïïne ni gath geni, ni nyuuŋe ki kaae ni dwøk ge pwödhö ki jø wø gädhö.

²⁵ Eni, mak paac ni teek ki wøør røk bëëdö dëëre kaamar abïï, ni yie wø bëëdö ni met kiper cääŋŋe mo oööi.

²⁶ Eni dhee wø cara luup leec wïc, ni ö pwöc mëërri ni wø ba jøøl ni en leebe.

²⁷ Eni, bëët jic paare wø di neetø na wøp, ni ba many gø nee cäme jaak ni ba tïïö.

²⁸ Eni, obwöre moe wø ööa maal ni pwøcge eni, ni ö cwøre thuwø ni pwøc eni, ni kööe,

²⁹ «Da mään mo thööth mo tïïö ki gïï mo perge leth, 'ba ïïni, ceŋge bëët akaalï.»

³⁰ Wøp jaak dhaanhø wø di cøøgø, ni mïërö keere bäŋ gïn mo duue, 'ba dhaagø man wø lwäär Wuuö Jwøk wø di pwøø.

³¹ Cïpu pwøc jïre ki køør gïïa tïïe ki cere, ni pøøc eni yïth acooŋe ki køør tïïe moe.